மத்திய வேளாண்மை, விவசாயிகள் நலன் மற்றும் ஊரக வளர்ச்சித் துறை அமைச்சர் திரு சிவராஜ் சிங் சௌஹான், “ஃப்ரூட் ஹொரைசன் 2026” தொடர்பான முக்கிய நிகழ்வுகளில் பங்கேற்பதற்காக, மே 6 மற்றும் 7 ஆகிய தேதிகளில் உத்தரப் பிரதேச மாநிலம் லக்னோவிற்குச் செல்கிறார்.
மத்திய வேளாண்மைத் துறை அமைச்சர் திரு சிவராஜ் சிங் சௌஹான் முன்னிலையில் நடைபெறும் இந்த இரண்டு நாள் நிகழ்வானது, நாட்டில் பழ உற்பத்தி, தர மேம்பாடு, பதப்படுத்துதல் மற்றும் ஏற்றுமதியை ஊக்குவிப்பதை நோக்கமாகக் கொண்டுள்ளது. இத்திட்டம், விவசாயிகள், விஞ்ஞானிகள், ஏற்றுமதியாளர்கள் மற்றும் பிற பங்குதாரர்களை ஒரு பொதுவான தளத்தில் ஒன்றிணைத்து, பழத் துறைக்கு ஒரு புதிய திசையை வழங்க முயல்கிறது.
மே 6 ஆம் தேதி, லக்னோ, கோமதி நகரில் உள்ள ஹோட்டல் ரெனைசன்ஸில், மத்திய அமைச்சர் திரு சிவராஜ் சிங் சௌஹான் ஏற்றுமதியாளர்கள் மற்றும் பிற பங்குதாரர்களுடன் நேரடி கலந்துரையாடல்களை நடத்துவார். திட்டமிடப்பட்டபடி, அமைச்சர் இன்று மாலை முற்போக்கு ஏற்றுமதியாளர்களைச் சந்திப்பார், மேலும் ஏற்றுமதியாளர்கள், இயக்குநர்கள் மற்றும் பிற பங்குதாரர்களுடன் கலந்துரையாடல்களையும் நடத்துவார். இந்தக் கலந்துரையாடலில், பழ ஏற்றுமதியை அதிகரிப்பது, சந்தைச் சவால்களைப் புரிந்துகொள்வது மற்றும் இத்துறைக்கான சிறந்த உத்திகளை வகுப்பது ஆகியவற்றில் கவனம் செலுத்தப்படும்.
இந்தப் பேச்சுவார்த்தைகள் நாட்டின் பழ வர்த்தகத்தை வலுப்படுத்தி, விவசாயிகளுக்குச் சிறந்த வாய்ப்புகளை உருவாக்கும் என எதிர்பார்க்கப்படுகிறது.
முக்கிய நிகழ்ச்சி மே 7 ஆம் தேதி லக்னோ, ரஹ்மான் கேராவில் உள்ள ICAR-மத்திய மிதவெப்பமண்டல தோட்டக்கலை நிறுவனத்தில் (CISH) நடைபெறும். நிகழ்ச்சி நிரலின்படி, காலை 10:00 மணி முதல், மத்திய அமைச்சர் திரு சிவராஜ் சிங் சௌஹான், விவசாயிகள், நாற்றங்கால் பங்குதாரர்கள் மற்றும் பதப்படுத்தும் துறையின் பிரதிநிதிகளுடன் கலந்துரையாடுவார். இதைத் தொடர்ந்து நடைபெறும் முக்கிய அமர்வில், உத்தரப் பிரதேச அரசு அமைச்சர்களான திரு சூர்ய பிரதாப் ஷாஹி மற்றும் திரு தினேஷ் பிரதாப் சிங் ஆகியோரும் கலந்துகொள்வார்கள்.
இந்த நிகழ்ச்சியின் விரிவான நிகழ்ச்சி நிரலில், தர மேம்பாடு, ஏற்றுமதி, மதிப்புக்கூட்டல், நிராகரிப்பு இல்லாத நிலை, மற்றும் பழத் துறையை வலுப்படுத்துவதில் உழவர் உற்பத்தியாளர் அமைப்புகள் (FPOs), உழவர் உற்பத்தியாளர் குழுக்கள் (FPCs), சுய உதவிக் குழுக்கள் (SHGs) ஆகியவற்றின் பங்கு ஆகியவை குறித்த கலந்துரையாடல்கள் அடங்கும். இந்த நிகழ்வு, தோட்டக்கலை மற்றும் பழ ஏற்றுமதித் துறைகளில் புத்தாக்கம், தொழில்நுட்பத்தைப் பயன்படுத்துதல் மற்றும் சந்தை வாய்ப்புகளுக்குப் புதிய வழிகளைத் திறக்கும் என்று எதிர்பார்க்கப்படுகிறது.
உத்தரப் பிரதேசத்திலும் நாடு முழுவதிலும் பழத் துறையின் வளர்ச்சியைத் துரிதப்படுத்துவதற்கான ஒரு முக்கிய படியாக லக்னோ நிகழ்வு பார்க்கப்படுகிறது. இந்நிகழ்ச்சியில், மத்திய அரசு மற்றும் உத்தரப் பிரதேச அரசின் மூத்த அதிகாரிகளுடன், பல மூத்த விஞ்ஞானிகளும் கலந்துகொள்வார்கள்.
எம்.பிரபாகரன்