இந்திய அரசின் கனரகத் தொழில்கள் அமைச்சகம் (MHI), அதன் செயலாளர் திரு. கம்ரான் ரிஸ்வி அவர்களின் தலைமையில், 2026 ஏப்ரல் 29 அன்று புது தில்லியில் ஒரு உயர்மட்டக் கூட்டத்தை நடத்தியது. தனியார் துறையில் மின்சாரப் பேருந்துகள் (இ-பேருந்துகள்) மற்றும் மின்சார சரக்குந்துகளை (இ-சரக்குந்துகள்) ஏற்றுக்கொள்வதை விரைவுபடுத்துவதற்குத் தேவையான நிதி வழிமுறைகள் குறித்து விவாதிப்பதே இக்கூட்டத்தின் நோக்கமாகும். இ-பேருந்துகள் மற்றும் இ-சரக்குகளை ஏற்றுக்கொள்வதில் உள்ள நிதிச் சவால்கள், அவற்றுக்கான நிதியுதவியின் தற்போதைய நிலை, நிதிச் சவால்களை எதிர்கொள்வதற்கான சாத்தியமான தீர்வுகள் மற்றும் தேவைப்படும் அரசாங்க ஆதரவு ஆகியவற்றை அறிந்துகொள்வதே இக்கூட்டத்தின் நோக்கங்களாக இருந்தன.
கூட்டத்தின் போது, தனியார் துறை பங்குதாரர்களால் மின்சாரப் பேருந்துகள் மற்றும் மின்சார லாரிகளைப் பயன்படுத்துவதில் உள்ள நிதிச் சவால்களை எதிர்கொள்வதற்காக, மின்சார வாகனங்களுக்கான நிதியுதவி தொடர்பான முக்கியத் தலையீடுகள் விவாதிக்கப்பட்டன. நிதி நிறுவனங்களால் வழங்கப்படும் கடன்களின் அபாயத்தைக் குறைப்பதற்கான பகுதி கடன் உத்தரவாதத் திட்டங்கள், அத்துடன் தனியார் துறை வாங்குபவர்களுக்கான கடன் செலவைக் குறைப்பதை நோக்கமாகக் கொண்ட வட்டி மானிய வழிமுறைகள் ஆகியவை பரிசீலனையில் இருந்த முக்கிய ஆதரவு வழிமுறைகளாகும்.
பொதுப் போக்குவரத்து, குறிப்பாகப் பேருந்துகள், இந்தியா முழுவதும் போக்குவரத்தின் முதுகெலும்பாகத் திகழ்கின்றன. அதே சமயம், சரக்குந்துகள் உள்நாட்டுப் பொருட்களின் கணிசமான பங்கைக் கொண்டு செல்வதன் மூலம் சரக்குப் போக்குவரத்தில் முக்கியப் பங்கு வகிக்கின்றன. வர்த்தக வாகனப் பிரிவானது, சாலைப் போக்குவரத்து உமிழ்வுகள், எரிபொருள் நுகர்வு மற்றும் நுண்துகள் மாசுபாடு ஆகியவற்றிற்குக் குறிப்பிடத்தக்க பங்களிப்பை வழங்குகிறது. இந்தச் சூழலில், இந்தியாவின் கரியமில வாயு வெளியேற்றக் குறைப்பு இலக்குகளை அடைவதற்கும், 2070-ஆம் ஆண்டிற்குள் நிகர பூஜ்ஜியம் என்ற நாட்டின் இலக்கை முன்னெடுத்துச் செல்வதற்கும் பேருந்துகள் மற்றும் சரக்குந்துகளை மின்மயமாக்குவது அவசியமாகும்.
இக்கூட்டத்தில், இந்திய அரசின் நிதிச் சேவைகள் துறை மற்றும் உலக வங்கி (இந்தியா) உள்ளிட்ட நிதி மற்றும் தொழில்துறை சூழல் அமைப்பைச் சேர்ந்த முக்கியப் பங்குதாரர்கள் பரவலாகப் பங்கேற்றனர். முக்கிய பொது மற்றும் தனியார் துறை வங்கிகள், வங்கி சாரா நிதி நிறுவனங்கள் (NBFCs), SIDBI, NIIF உள்ளிட்ட உச்ச நிறுவனங்கள், பேருந்து நடத்துநர்கள், லாரி நடத்துநர்கள், அசல் உபகரண உற்பத்தியாளர்கள் (OEMs) மற்றும் பிற முக்கியப் பங்குதாரர்கள், அத்துடன் இந்திய வாகன உற்பத்தியாளர்கள் சங்கம் (SIAM), அகில இந்திய மோட்டார் போக்குவரத்து காங்கிரஸ் (AIMTC), மற்றும் இந்தியப் பேருந்து நடத்துநர்கள் கூட்டமைப்பு (BOCI) போன்ற தொழில்துறை அமைப்புகளும் பங்கேற்றன.
இந்த முன்னெடுப்பு, வர்த்தக வாகனப் பிரிவில் மின்சாரப் பயன்பாட்டிற்கு மாறுவதை சாத்தியமாக்குவதில் கனரகத் தொழில்கள் அமைச்சகத்தின் செயல்திறன் மிக்க அணுகுமுறையைப் பிரதிபலிக்கிறது. அரசுத் துறைகள், பலதரப்பு நிறுவனங்கள், நிதி நிறுவனங்கள் மற்றும் தொழில் துறைப் பங்குதாரர்களை ஒரு பொதுவான தளத்தில் ஒன்றிணைப்பதன் மூலம், மின்சார வாகனங்களை ஏற்றுக்கொள்வதில் உள்ள முக்கியத் தடைகளைக் களைவதற்கான செயல்படுத்தக்கூடிய நிதித் தீர்வுகளை உருவாக்குவதை MHI நோக்கமாகக் கொண்டுள்ளது. இதன்மூலம், ஆத்மநிர்பர் பாரத் மற்றும் விக்சித்பாரத்@2047 ஆகிய தொலைநோக்குப் பார்வைகளின் கீழ், எரிசக்திப் பாதுகாப்பு, மாசு உமிழ்வுக் குறைப்பு மற்றும் உள்நாட்டு மேம்பட்ட உற்பத்தி ஆகிய இந்தியாவின் பரந்த இலக்குகளுக்கு இது ஆதரவளிக்கிறது.
எம்.பிரபாகரன்