பாதுகாப்பு ஆராய்ச்சி மற்றும் மேம்பாட்டு அமைப்பும் (DRDO) இந்தியக் கடற்படையும் இணைந்து, ஒடிசாவில் வங்காள விரிகுடாக் கடற்கரைக்கு அப்பால் உள்ள கடற்படையின் ஹெலிகாப்டர் தளத்திலிருந்து, கடற்படை கப்பல் எதிர்ப்பு குறுகிய தூர ஏவுகணையின் (NASM-SR) முதல் ஏவுகணைத் தாக்குதலை வெற்றிகரமாக நடத்தியுள்ளன. இந்தச் சோதனையின் போது, ஒரே ஹெலிகாப்டரிலிருந்து இரண்டு ஏவுகணைகள் அடுத்தடுத்து ஏவப்பட்டன. இதன் மூலம், மேம்பட்ட வான்வழி கப்பல் எதிர்ப்பு ஏவுகணை அமைப்பின் முதல் ஏவுகணைத் தாக்குதல் இதுவாகும்.
சந்திப்பூரில் உள்ள ஒருங்கிணைந்த சோதனைத் தளத்தில் (ITR) நிறுவப்பட்ட ரேடார், மின்-ஒளியியல் அமைப்பு மற்றும் தொலை அளவியல் போன்ற பல்வேறு தொலைவு கண்காணிப்புக் கருவிகளைப் பயன்படுத்திப் பெறப்பட்ட தரவுகளின்படி, அனைத்து சோதனை நோக்கங்களும் முழுமையாக நிறைவேற்றப்பட்டன. ஒரே நேரத்தில் பல இலக்குகளைத் தாக்கும் திறனை நிரூபித்ததோடு, இந்த ஏவுகணைகள் கடலடித் தாக்குதல் திறனையும் வெளிப்படுத்தின. இந்த சோதனை ஏவுதல்களை, பாதுகாப்பு ஆராய்ச்சி மற்றும் மேம்பாட்டு அமைப்பின் (DRDO) மூத்த விஞ்ஞானிகள், இந்தியக் கடற்படை மற்றும் விமானப்படையின் பயனர் பிரதிநிதிகள் மற்றும் மேம்பாடு-உற்பத்திக் கூட்டாளிகள் (DcPP) ஆகியோர் கண்டுகளித்தனர்.
NASM-SR ஏவுகணையானது ஒரு திட உந்துவிசை ஊக்கியையும் நீண்ட நேரம் எரியும் நிலைநிறுத்தியையும் பயன்படுத்துகிறது. தேடுபொறி, ஒருங்கிணைந்த வானூர்தி மின்னணுவியல் தொகுதி, ஒளியிழை சுழல்நோக்கி அடிப்படையிலான நிலைம இயக்க வழிசெலுத்தல் அமைப்பைப் பயன்படுத்தும் மேம்பட்ட வழிசெலுத்தல் மற்றும் வழிகாட்டுதல், வானொலி உயரமானி, மேம்பட்ட கட்டுப்பாடு மற்றும் வழிகாட்டுதல் நெறிமுறை, உயர் அலைவரிசை இருவழித் தரவு இணைப்பு மற்றும் ஜெட்-வேன் கட்டுப்பாடு போன்ற அனைத்து முக்கிய துணை அமைப்புகளும் DRDO மற்றும் இந்தியத் தொழில்துறைகளின் வெவ்வேறு ஆய்வகங்களால் உள்நாட்டிலேயே உருவாக்கப்பட்டுள்ளன.
இந்த ஏவுகணை அமைப்பானது, ஹைதராபாத்தை தளமாகக் கொண்ட இமாரத் ஆராய்ச்சி மையத்தால், ஹைதராபாத்தில் உள்ள பாதுகாப்பு ஆராய்ச்சி மற்றும் மேம்பாட்டு ஆய்வகம்; புனேவில் உள்ள உயர் ஆற்றல் பொருட்கள் ஆராய்ச்சி ஆய்வகம்; சண்டிகரில் உள்ள முனைய எறிபொருள் ஆராய்ச்சி ஆய்வகம் மற்றும் ஐ.டி.ஆர் சண்டிபூர் ஆகிய பிற டி.ஆர்.டி.ஓ ஆய்வகங்களுடன் இணைந்து உருவாக்கப்பட்டுள்ளது. இந்த ஏவுகணைகள் தற்போது டி.சி.பி.பி நிறுவனத்தால், பிற இந்தியத் தொழிற்சாலைகள் மற்றும் புத்தொழில் நிறுவனங்களின் உதவியுடன் தயாரிக்கப்பட்டு வருகின்றன.
வெற்றிகரமான முதல் கட்ட ஏவுகணைச் சோதனைக்காக, பாதுகாப்பு அமைச்சர் திரு ராஜ்நாத் சிங், டி.ஆர்.டி.ஓ, இந்திய கடற்படை, இந்திய விமானப்படை மற்றும் டி.சி.பி.பி கூட்டாளிகள் உள்ளிட்ட தொழில்துறையினரைப் பாராட்டினார். இந்த ஏவுகணையின் உருவாக்கம், பாதுகாப்புப் படைகளின் திறன்களைப் பெருமளவில் மேலும் மேம்படுத்தும் என்றும் அவர் கூறினார்.
பாதுகாப்பு ஆராய்ச்சி மற்றும் மேம்பாட்டுத் துறையின் செயலாளரும், டி.ஆர்.டி.ஓ-வின் தலைவருமான டாக்டர் சமீர் வி காமத், வெற்றிகரமான ஏவுகணைச் சோதனைகளில் ஈடுபட்ட குழுக்களுக்கு வாழ்த்து தெரிவித்தார்.
திவாஹர்