இந்தியக் குடியரசுத் தலைவர் திருமதி திரௌபதி முர்மு அவர்கள், மத்தியப் பிரதேச மாநிலம் ஜபல்பூரில் உள்ள ராணி துர்காவதி பல்கலைக்கழகத்தின் 36வது பட்டமளிப்பு விழாவில் இன்று (ஜூன் 21, 2026) கலந்துகொண்டு சிறப்பித்தார்.
இந்நிகழ்ச்சியில் பேசிய குடியரசுத் தலைவர், எந்தவொரு தனிநபர் அல்லது சமூகத்தின் வளர்ச்சிக்கும் கல்வியே மிகவும் பயனுள்ள வழிமுறை என்று கூறினார். எனவே, பழங்குடியின சமூகத்தின் கல்வி முன்னேற்றத்திற்காகப் பாடுபடுவது மிகவும் முக்கியத்துவம் வாய்ந்தது. பழங்குடியின இளைஞர்கள் தங்களின் பழங்குடியின அடையாளத்தையும் தனித்துவத்தையும் அதன் அசல் வடிவில் பாதுகாத்துக்கொண்டே, நவீன வளர்ச்சியில் பங்களிப்பதற்கான வாய்ப்பைப் பெறுவதை நாம் கூட்டாக உறுதி செய்ய வேண்டும். மேலும், பழங்குடியின சமூகத்தின் பாரம்பரியத் திறன்களும் அறிவும் பல்வேறு ஊடகங்கள் மூலம் பரப்பப்பட வேண்டும். பழங்குடியினரின் அறிவு மற்றும் கைவினை மரபுகள் குறித்த ஒரு விரிவான ஆய்வு, நாட்டின் அனைத்து குடிமக்களுக்கும் பயனளிக்கும். ராணி துர்காவதி பல்கலைக்கழகம் போன்ற கல்வி நிறுவனங்கள் இது தொடர்பாக சிறப்பு முயற்சிகளை மேற்கொள்ள வேண்டும்.
மாணவர்களுக்குக் கல்வி கற்பிப்பதைத் தவிர, உயர்கல்வி நிறுவனங்கள் புத்தாக்கம் மற்றும் ஆராய்ச்சிக்கான முக்கிய மையங்களாகவும் செயல்படுகின்றன என்று குடியரசுத் தலைவர் கூறினார். மாணவர்களிடையே படைப்பாற்றல் சிந்தனை, அறிவியல் மனப்பான்மை மற்றும் தொழில் முனைவு உணர்வை வளர்ப்பது இந்த நிறுவனங்களின் முக்கியப் பொறுப்பாகும். மேலும், மாணவர்களிடையே இந்தியக் கலாச்சாரம், பாரம்பரியங்கள் மற்றும் மொழிகள் மீது பெருமித உணர்வை ஏற்படுத்துவதும் இவற்றின் கடமையாகும். நவீனத்துவமும் பாரம்பரியமும் இணக்கமாகக் கலப்பதன் மூலம் நாட்டின் சமச்சீரான வளர்ச்சி அடையப்படும்.
நாட்டிற்கும் சமூகத்திற்கும் நன்மை பயக்கும் படிப்புகளுக்கும் ஆராய்ச்சிகளுக்கும் முக்கியத்துவம் அளிக்கப்பட வேண்டும் என்று ஜனாதிபதி கூறினார். சுற்றுச்சூழல் பாதுகாப்பு, பெண்கள் மேம்பாடு, விளிம்புநிலை மக்களின் வளர்ச்சி, தூய்மை மற்றும் சமூக நல்லிணக்கம் போன்ற பாடங்கள் பாடத்திட்டத்தில் சேர்க்கப்படும்போது சமூகம் பயனடைகிறது. இத்தகைய பாடங்களில் செய்யப்படும் படிப்பும் ஆராய்ச்சியும் நாட்டின் வளர்ச்சிக்கான திட்டங்களை வகுப்பதற்கும் உதவுகின்றன.
இன்று உலகம் அதிவேகமாக மாறி வருகிறது என்று குடியரசுத் தலைவர் கூறினார். நமது மொழியும் வாழ்க்கை முறையும் கூட அதிவேகமாக மாறி வருகின்றன. ஆனால், சில நித்திய விழுமியங்கள் எப்போதும் நமக்கு வலிமையளிக்கின்றன என்பதை நாம் மறந்துவிடக் கூடாது. இந்தியப் பண்பாட்டின் விழுமியங்களையும் இலட்சியங்களையும் தங்கள் வாழ்வின் அடித்தளமாகக் கொள்ளுமாறு அவர் மாணவர்களுக்கு அறிவுறுத்தினார். உண்மை, அகிம்சை, கருணை, சேவை மற்றும் நேர்மை போன்ற விழுமியங்கள் ஒவ்வொரு காலகட்டத்திலும் மக்களின் உள்ளார்ந்த உணர்வின் ஒரு பகுதியாகவே இருந்து வந்துள்ளன என்று அவர் கூறினார். இந்த விழுமியங்களைத் தழுவுவதன் மூலம், அவர்களால் கடினமான சூழ்நிலைகளைக்கூட உறுதியுடன் எதிர்கொண்டு, சிறந்த குடிமக்களாக உருவாகி, தேசத்தைக் கட்டியெழுப்புவதில் குறிப்பிடத்தக்க பங்களிப்பைச் செய்ய முடியும்.
மாணவர்கள் தங்கள் குடும்பங்கள் அல்லது பல்கலைக்கழகங்களின் பிரதிநிதிகள் மட்டுமல்ல; அவர்கள் தேசத்தின் அபிலாஷைகள் மற்றும் அதன் எதிர்காலத்தின் சிற்பிகள் என்று குடியரசுத் தலைவர் அவர்களிடம் கூறினார். அவர்களின் அறிவு, ஆற்றல் மற்றும் உறுதியின் மூலமாகவே விக்ஸித் பாரத் கனவு நனவாகும். அவர்கள் தங்கள் கல்வியையும் திறமையையும் தனிப்பட்ட வெற்றிக்காக மட்டுமல்லாமல், சமூகத்தின் பெரும் நன்மைக்காகவும் பயன்படுத்த வேண்டும் என்று அவர் வலியுறுத்தினார். தங்களைச் சுற்றியுள்ள நலிந்த மற்றும் கிராமப்புற சமூகங்கள் எதிர்கொள்ளும் சவால்களைப் புரிந்துகொண்டு, அவர்களின் தேவைகளுக்கு ஏற்ற தீர்வுகளை உருவாக்கி, அவர்களுக்கு அதிகாரம் அளித்து, அவர்களை வளர்ச்சியின் பிரதான நீரோட்டத்திற்குக் கொண்டுவர பங்களிக்க வேண்டும் என்று அவர் அறிவுறுத்தினார்.
டிஜிட்டல் தொழில்நுட்பம், புத்தொழில் நிறுவனங்கள், பசுமை ஆற்றல், விண்வெளி ஆராய்ச்சி மற்றும் நவீன உள்கட்டமைப்பு போன்ற துறைகளில் நாடு புதிய உயரங்களை எட்டி வருவதாக ஜனாதிபதி கூறினார். இந்த வாய்ப்புகளைப் பயன்படுத்திக்கொண்டு உலக அரங்கில் தடம் பதிக்க வேண்டும் என்று அவர் இளைஞர்களுக்கு அறிவுறுத்தினார். மேலும், சுற்றுச்சூழலுக்கான தங்கள் பொறுப்பை நிறைவேற்ற வேண்டும் என்றும் அவர் அறிவுறுத்தினார். நீர், காடுகள் மற்றும் நிலத்தைப் பாதுகாத்தல், தூய்மையான ஆற்றலைப் பயன்படுத்துதல், பல்லுயிர்ப் பாதுகாப்பு மற்றும் நிலையான வளர்ச்சி ஆகியவற்றிற்கான அர்ப்பணிப்பு அவர்களின் வாழ்க்கைப் பயணத்தின் ஒரு ஒருங்கிணைந்த பகுதியாக இருக்க வேண்டும் என்றும் அவர் கூறினார்.
திவாஹர்