இந்திய அரசின் வர்த்தகம் மற்றும் தொழில்துறை அமைச்சகத்தின் கீழ் செயல்படும் வேளாண் மற்றும் பதப்படுத்தப்பட்ட உணவுப் பொருட்கள் ஏற்றுமதி மேம்பாட்டு ஆணையம் (APEDA), ஒடிசாவின் பாலங்கிரிலிருந்து ஆஸ்திரியாவிற்கு முதன்முறையாக உலர்ந்த முழு முட்டைப் பொடியின் வணிகரீதியான ஏற்றுமதிக்கு வழிவகுத்தது. இது, இந்தியாவிலிருந்து மதிப்புக்கூட்டப்பட்ட வேளாண் மற்றும் பதப்படுத்தப்பட்ட உணவு ஏற்றுமதியை ஊக்குவிப்பதில் ஒரு குறிப்பிடத்தக்க மைல்கல்லாக அமைந்துள்ளது.
இந்த சரக்கு, APEDA-வில் பதிவுசெய்யப்பட்ட ஏற்றுமதியாளரான பாலங்கிரைச் சேர்ந்த OVO ஃபார்ம் பிரைவேட் லிமிடெட் நிறுவனத்தால் ஏற்றுமதி செய்யப்பட்டது. இந்த ஏற்றுமதியானது, இந்திய மதிப்புக்கூட்டப்பட்ட கோழிப் பொருட்களுக்கு உலகளவில் அதிகரித்து வரும் வரவேற்பைப் பிரதிபலிப்பதோடு, பதப்படுத்தப்பட்ட முட்டைப் பொருட்களை உயர்தர சர்வதேச சந்தைகளுக்கு ஏற்றுமதி செய்வதற்கான புதிய வழிகளையும் திறக்கிறது.
பிராந்திய முட்டை மதிப்புச் சங்கிலியை வலுப்படுத்தவும், ஏற்றுமதி சார்ந்த வளர்ச்சியை ஊக்குவிக்கவும், ஏற்றுமதியாளர் 2025-ஆம் ஆண்டில் பாலங்கிரில் ஒரு அதிநவீன முட்டை பதப்படுத்தும் ஆலையை நிறுவினார். இந்த ஆலை, EIC தரநிலைகள், ஐரோப்பிய ஒன்றியத்தின் சுகாதாரத் தேவைகள் மற்றும் உலகளவில் அங்கீகரிக்கப்பட்ட பிற விதிமுறைகள் உட்பட, தேசிய மற்றும் சர்வதேச உணவுப் பாதுகாப்பு மற்றும் தரத் தரநிலைகளுக்கு இணங்க உலர்ந்த முட்டைப் பொருட்களைத் தயாரிக்கிறது. இந்த ஆலை FSSC 22000 பதிப்பு 6-இன் கீழ் சான்றளிக்கப்பட்டதுடன், ஹலால் மற்றும் கோஷர் சான்றிதழ்களையும் பெற்றுள்ளது.
உலர்த்தப்பட்ட முழு முட்டைப் பொடியானது, அதன் நீண்ட நாள் கெடாமல் இருக்கும் தன்மை, எளிதான போக்குவரத்து மற்றும் பன்முகப் பயன்பாடு ஆகியவற்றின் காரணமாக, உணவு பதப்படுத்தும் தொழில், பேக்கரிகள், மிட்டாய் தயாரிப்பு மற்றும் மருந்துத் தொழில்களில் பரவலாகப் பயன்படுத்தப்படுகிறது. திரவ முட்டைகளை ஸ்ப்ரே-டிரையிங் முறையில் உலர்த்துவதன் மூலம் தயாரிக்கப்படும் இந்தத் தயாரிப்பு, சர்வதேச தரநிலைகளுக்கு இணங்குவதை உறுதி செய்வதற்காகக் கடுமையான தரக் கட்டுப்பாட்டு நடவடிக்கைகளுக்கு உட்படுத்தப்படுகிறது.
22.6 மெட்ரிக் டன் உலர்ந்த முழு முட்டைப் பொடி அடங்கிய ஏற்றுமதி சரக்கை, ஏபிஇடிஏ (APEDA) தலைவர் திரு அபிஷேக் தேவ், ஐஏஎஸ் அவர்கள் காணொளி வாயிலாகக் கொடியசைத்துத் தொடங்கி வைத்தார். இந்நிகழ்ச்சியில், ஒடிசா அரசின் மீன்வளம் மற்றும் கால்நடை வள மேம்பாட்டுத் (F&ARD) துறையின் ஆணையர் மற்றும் செயலாளர் திரு பிரேம் சந்த், ஐஏஎஸ் அவர்களும், பாலங்கீர் மாவட்ட ஆட்சியர் மற்றும் மாவட்ட ஆட்சியர் திரு கௌரவ் சிவாஜி இஸ்லால்வார், ஐஏஎஸ் அவர்களும் கலந்து கொண்டனர். ஏற்றுமதி நிறுவனத்தின் பிரதிநிதிகள், ஏபிஇடிஏ-வின் மூத்த அதிகாரிகள் மற்றும் பிற பங்குதாரர்களும் இந்த நிகழ்ச்சியில் பங்கேற்றனர்.
பதப்படுத்தும் உள்கட்டமைப்பை வலுப்படுத்துதல், உணவுப் பாதுகாப்பு மற்றும் தர மேலாண்மை அமைப்புகளைப் பின்பற்றுவதை ஊக்குவித்தல், மற்றும் ஆய்வகப் பரிசோதனைத் திறன்களை மேம்படுத்துதல் ஆகியவற்றை நோக்கமாகக் கொண்ட தனது நிதி உதவித் திட்டங்கள் மூலம், ஏபிஇடிஏ ஏற்றுமதியாளருக்கு ஆதரவை வழங்கியுள்ளது. இந்தத் தலையீடுகள் ஏற்றுமதிப் போட்டித்திறனை மேம்படுத்தவும், உலகளாவிய சந்தைகளின் கடுமையான தேவைகளைப் பூர்த்தி செய்ய இந்திய ஏற்றுமதியாளர்களைத் தயார்படுத்தவும் உதவுகின்றன.
ஆஸ்திரியா மற்றும் பல ஐரோப்பிய நாடுகள், பல்வேறு உணவு மற்றும் தொழில்துறைப் பயன்பாடுகளுக்காக முட்டைப் பொடியை இறக்குமதி செய்கின்றன. இந்த சரக்கின் வெற்றிகரமான ஏற்றுமதியானது, ஐரோப்பிய ஒன்றியத்தில் இந்திய பதப்படுத்தப்பட்ட உணவுப் பொருட்களுக்கான அதிகரித்து வரும் தேவையை எடுத்துக்காட்டுவதோடு, உயர்தரமான விவசாய மற்றும் உணவுப் பொருட்களை வழங்கும் நம்பகமான நாடாக இந்தியாவின் நிலையையும் வலுப்படுத்துகிறது.
இந்த ஏற்றுமதியானது, கோழி இறைச்சி பதப்படுத்துதலில் மேலும் முதலீட்டை ஊக்குவிப்பதோடு, ஒடிசாவின் வேளாண் பதப்படுத்துதல் சூழலமைப்பை வலுப்படுத்தி, மாநிலத்திலிருந்து மதிப்புக்கூட்டப்பட்ட பொருட்களின் ஏற்றுமதியை விரிவுபடுத்துவதற்கான புதிய வாய்ப்புகளையும் உருவாக்கும் என எதிர்பார்க்கப்படுகிறது.
திவாஹர்