மத்தியப் பிரதேசத்தின் ரைசன் மாவட்டத்தில் உள்ள ரமாசியா கிராமத்தில் இருந்து, மத்திய வேளாண்மை, விவசாயிகள் நலன் மற்றும் ஊரக வளர்ச்சித் துறை அமைச்சர் திரு. சிவராஜ் சிங் சௌஹான், நாடு தழுவிய ‘கேத் பச்சாவ் அபியான்’ திட்டத்தைத் தொடங்கி வைத்தார். மண் பாதுகாக்கப்பட்டால், விவசாயம் செழிக்கும், விவசாயிகள் வலுவடைவார்கள், தேசமும் வளம் பெறும் என்ற தெளிவான செய்தியை அவர் விவசாயிகளுக்கு வழங்கினார். சமச்சீரான உரப் பயன்பாடு, மண் பரிசோதனை, மண் சுகாதார அட்டைகள், இயற்கை விவசாயம், நீர் பாதுகாப்பு மற்றும் அறிவியல் பூர்வமான வேளாண் நடைமுறைகளை ஊக்குவிக்க வேண்டும் என்றும் அவர் அழைப்பு விடுத்தார்.
ஜூன் 1 முதல் ஜூன் 30 வரை நாடு முழுவதும் நடைபெறும் ஒரு மாத கால பிரச்சாரத்தை தொடங்கி வைத்துப் பேசிய திரு. சௌஹான், பூமி நமது தாய் என்றும், அதன் ஆரோக்கியத்தைப் பாதுகாப்பது ஒரு கூட்டுப் பொறுப்பு என்றும் கூறினார். இரசாயன உரங்கள் மற்றும் பூச்சிக்கொல்லிகளை கண்மூடித்தனமாகப் பயன்படுத்துவதைத் தவிர்க்குமாறும், அதற்குப் பதிலாக அறிவியல் சோதனைகளின் அடிப்படையில் மண்ணின் உண்மையான தேவைகளுக்கு ஏற்ப மட்டுமே உரங்களைப் பயன்படுத்துமாறும் அவர் விவசாயிகளுக்கு வேண்டுகோள் விடுத்தார். இரசாயனங்களின் அதிகப்படியான பயன்பாடு மண்ணின் வளத்தைக் குறைத்து, மண்ணில் உள்ள நன்மை தரும் நுண்ணுயிரிகளை அழித்து, விவசாய உற்பத்தித்திறனை நேரடியாகப் பாதித்து, சாகுபடி செலவுகளை அதிகரிக்கிறது என்று அவர் குறிப்பிட்டார்.
பூமித்தாயைப் பாதுகாப்பதற்கான ஒரு தேசிய உறுதிமொழியே ‘கேத் பச்சாவ் அபியான்’ என்று மத்திய அமைச்சர் கூறினார். இந்த இயக்கத்தின் கீழ், விவசாயிகளிடையே விழிப்புணர்வை ஏற்படுத்துவதற்காக, வேளாண் விஞ்ஞானிகள், வேளாண் பல்கலைக்கழகங்களின் வல்லுநர்கள், வேளாண் அறிவியல் மையங்களின் அதிகாரிகள், வேளாண் துறை குழுக்கள் மற்றும் பொதுப் பிரதிநிதிகள் நாடு முழுவதும் உள்ள கிராமங்களுக்குச் செல்வார்கள். மண் பரிசோதனை, சமச்சீரான ஊட்டச்சத்து மேலாண்மை, இயற்கை விவசாயம், நவீன விதைப்பு நுட்பங்கள், நீர் பாதுகாப்பு மற்றும் மேம்பட்ட வேளாண் நடைமுறைகள் குறித்து விவசாயிகளுக்குக் கல்வி புகட்டப்படும்.
நிலத்தின் உண்மையான தேவைகளுக்கு ஏற்ப உரமிட, ஒவ்வொரு விவசாயியும் மண் சுகாதார அட்டையை வைத்திருக்க வேண்டும் என்று அவர் வலியுறுத்தினார். இது, சாகுபடிச் செலவுகளைக் குறைத்து, உற்பத்தித்திறனை அதிகரித்து, நீண்ட காலத்திற்கு மண் வளத்தைப் பராமரிக்க உதவும் என்றும் அவர் கூறினார். அரசு விவசாயிகளுக்கு மானிய விலையில் உரங்களை வழங்கினாலும், இது அதிகப்படியான பயன்பாட்டை ஊக்குவிக்கக் கூடாது என்று திரு. சௌஹான் தெளிவுபடுத்தினார். நீடித்த வேளாண்மை என்பது, உரங்களை விவேகத்துடனும் சமச்சீராகவும் பயன்படுத்துவதைப் பொறுத்தே அமைகிறது என்றும் அவர் வலியுறுத்தினார்.
விவசாயத்தை மேலும் லாபகரமாக்குவது இந்திய அரசின் முக்கிய முன்னுரிமையாகத் தொடர்கிறது என்று திரு சௌஹான் கூறினார். இப்பகுதியில் சோயாபீன், நெல் மற்றும் பயறு வகைப் பயிர்களுக்காக சிறப்பு கள செயல்விளக்கங்கள் ஏற்பாடு செய்யப்படும் என்றும் அவர் தெரிவித்தார். மேம்படுத்தப்பட்ட விதைகளைப் பயன்படுத்துதல், அறிவியல் பூர்வமான விதைப்பு முறைகள், லேசர் லெவலர்கள் போன்ற நவீன தொழில்நுட்பங்கள் மற்றும் நீரைச் சிக்கனமாகப் பயன்படுத்தும் விவசாய முறைகள் ஆகியவற்றில் விவசாயிகளுக்குப் பயிற்சி அளிக்கப்படும். வேளாண் அறிவியல் மையங்கள் மற்றும் நிபுணத்துவ நிறுவனங்களின் ஆதரவுடன் வழக்கமான பயிற்சித் திட்டங்களும் நடத்தப்படும்.
மத்திய அமைச்சர், இந்தப் பிரச்சாரத்துடன் பெண்கள் அதிகாரமளித்தலையும் தொடர்புபடுத்தினார். சுயஉதவிக் குழுக்கள் மூலம் பெண்கள் வேலைவாய்ப்பு, வருமானம் ஈட்டும் நடவடிக்கைகள் மற்றும் சுயதொழில் வாய்ப்புகளுடன் இணைக்கப்படுவார்கள் என்று அவர் கூறினார். தகுதியுள்ள பெண்களுக்குப் பயிற்சி, நிதியுதவி மற்றும் சிறு தொழில்களைத் தொடங்குவதற்கான வாய்ப்புகள் வழங்கப்படும். இதன் மூலம் அவர்கள் தன்னிறைவு பெற்று, குடும்ப வருமானத்தை அதிகரிக்கப் பங்களிக்க முடியும்.
இளைஞர்கள் குறித்துப் பேசிய திரு சௌஹான், அவர்களுக்கு வழிகாட்டுதல், திறன் மேம்பாடு மற்றும் ஆயத்தமாதலுக்கான சிறந்த வாய்ப்புகள் உருவாக்கப்படும் என்று கூறினார். கிராமப்புற மேம்பாடு என்பது சாலைகள், வீடுகள் மற்றும் அடிப்படை உள்கட்டமைப்புடன் மட்டும் நின்றுவிடாமல், கிராமங்களுக்குள் வேலைவாய்ப்பு, வருமானம் மற்றும் தன்னிறைவை உருவாக்குவதையும் உள்ளடக்கியது என்று அவர் குறிப்பிட்டார்.
ரமாசியா கிராமத்தில் தொடங்கப்பட்ட இந்த இயக்கம், காலப்போக்கில் பொதுமக்களின் பங்கேற்புடன் ஒரு மாபெரும் மக்கள் இயக்கமாக உருவெடுக்கும் என்று திரு சிவராஜ் சிங் சௌஹான் கூறினார். அதிகாரிகள் தவறாமல் கிராமங்களுக்குச் சென்று, விவசாயிகளுக்குத் தொழில்நுட்ப உதவிகளை வழங்கி, விவசாயத்தைக் காப்பாற்றுவதற்கான உறுதிப்பாடு களத்தில் செயலாக மாற்றப்படுவதை உறுதி செய்ய வேண்டும் என்றும் அவர் அறிவுறுத்தினார். செழிப்பான கிராமங்கள், வலுவூட்டப்பட்ட விவசாயிகள், தன்னிறைவு பெற்ற பெண்கள் மற்றும் ஒரு ஒளிமயமான எதிர்காலம் ஆகியவற்றை அரசு மற்றும் சமூகத்தின் கூட்டு முயற்சிகளால் மட்டுமே அடைய முடியும் என்று கூறிய அவர், விவசாயிகள், பெண்கள் மற்றும் இளைஞர்கள் வளர்ச்சி முன்னெடுப்புகளில் தீவிரமாகப் பங்கேற்க வேண்டும் என வேண்டுகோள் விடுத்தார்.
பிரதமர் திரு நரேந்திர மோடி, தொலைநோக்குப் பார்வை கொண்டவரும், வருங்கால சந்ததியினருக்காகத் திட்டமிடுபவரும் ஆவார் என்று மத்திய அமைச்சர் கூறினார். பூமித்தாய் தற்போதைய தலைமுறைக்கு மட்டுமல்ல, இனி வரவிருக்கும் தலைமுறையினருக்கும் சொந்தமானது என்று அவர் குறிப்பிட்டார். எனவே, வருங்கால சந்ததியினருக்கு உணவு உற்பத்தி செய்ய முடியாத அளவிற்கு அதன் நிலை ஒருபோதும் மோசமடையக் கூடாது என்று அவர் கூறினார். மண் ஆரோக்கியமாகவும் வளமாகவும் இருப்பதை உறுதிசெய்ய, நிலத்தின் உண்மையான ஊட்டச்சத்துத் தேவைகளின் அடிப்படையில் சமச்சீர் உரங்களைப் பயன்படுத்த விவசாயிகள் ஊக்குவிக்கப்படுவார்கள்.
கள்ள உரங்கள் மற்றும் பூச்சிக்கொல்லிகளுக்கு எதிரான விழிப்புணர்வை ஏற்படுத்துவதிலும் இந்தப் பிரச்சாரம் கவனம் செலுத்தும் என்று அவர் மேலும் அறிவித்தார். உள்ளூர் வேளாண்-காலநிலைக்கு ஏற்ற பயிர் தேர்வு மற்றும் விதை இரகங்கள், பொருத்தமான விவசாய முறைகள், விதை நேர்த்தி முறைகள் மற்றும் பிற அறிவியல் பூர்வமான வேளாண் நடைமுறைகள் குறித்து விவசாயிகளுக்கு வழிகாட்டப்படும். மண் வளத்தை மேம்படுத்த பசுந்தாள் உரம் பயன்படுத்துவது குறித்த தகவல்களும் பரப்பப்படும். மேலும், இந்தப் பிரச்சாரத்தின் மூலம் மத்திய மற்றும் மாநில அரசுகளின் பல்வேறு திட்டங்களின் பலன்கள் நாடு முழுவதும் உள்ள விவசாயிகளுக்கு வழங்கப்படும்.
இந்நிகழ்ச்சியில் ஏராளமான விவசாயிகள், வேளாண் விஞ்ஞானிகள், வேளாண் அறிவியல் மையங்களின் வல்லுநர்கள், மக்கள் பிரதிநிதிகள் மற்றும் நிர்வாக அதிகாரிகள் கலந்துகொண்டனர். இந்நிகழ்ச்சியில், ஊட்டச்சத்துக் குறைபாடுள்ள குழந்தைகளுக்கு ஊட்டச்சத்துப் பெட்டிகளும் விநியோகிக்கப்பட்டன.
எஸ்.சதிஸ் சர்மா