இந்தியாவின் வானிலை முன்னறிவிப்பு சேவைகளை மேலும் துல்லியமானதாகவும், செயற்கை நுண்ணறிவு (AI) தொழில்நுட்பத்தை அடிப்படையாகக் கொண்டதாகவும் மாற்றும் நோக்கில், மத்திய அறிவியல் & தொழில்நுட்பம், பூமி அறிவியல் துறை மற்றும் பிரதமர் அலுவலகம், பணியாளர் நலன், பொதுமக்கள் குறைதீர், ஓய்வூதியம், அணு ஆற்றல் மற்றும் விண்வெளித் துறைகளின் இணை அமைச்சராக உள்ள டாக்டர் ஜிதேந்திர சிங் இன்று இரண்டு புதிய மேம்பட்ட வானிலை முன்னறிவிப்பு சேவைகளை அறிமுகப்படுத்தினார்.
இன்று அறிமுகப்படுத்தப்பட்ட இந்த இரண்டு புதிய சேவைகளில், இந்திய வானிலை ஆய்வு மையம் (IMD) முதன்முறையாக செயற்கை நுண்ணறிவு (AI) தொழில்நுட்பத்தை பயன்படுத்தி உருவாக்கிய “நாட்டின் பல்வேறு பகுதிகளில் பருவமழை முன்னேற்றத்தை கணிக்கும் AI அடிப்படையிலான அமைப்பு” மற்றும் “உத்தரப் பிரதேசத்திற்கான உயர் துல்லிய மழைப்பொழிவு முன்னறிவிப்பு சேவை” ஆகியவை அடங்கும். இந்த அமைப்புகள் இந்திய வானிலை ஆய்வு மையம் (IMD), புனேயில் உள்ள இந்திய வெப்பமண்டல வானிலை ஆய்வு நிறுவனம் (IITM) மற்றும் தேசிய நடுத்தர கால வானிலை முன்னறிவிப்பு மையம் (NCMRWF) ஆகியவற்றின் கூட்டு முயற்சியால் உருவாக்கப்பட்டுள்ளன.
இதுகுறித்து பேசிய டாக்டர் ஜிதேந்திர சிங், கடந்த ஒரு தசாப்தத்தில் இந்தியாவின் வானிலை முன்னறிவிப்பு திறனில் மிகப்பெரிய மாற்றம் ஏற்பட்டுள்ளதாக தெரிவித்தார். தொழில்நுட்ப வளர்ச்சி, தரவு ஒருங்கிணைப்பு மற்றும் மேம்பட்ட கணிப்பு மாதிரிகள் மூலம் IMD சேவைகளின் துல்லியமும், மக்கள் நம்பிக்கையும் அதிகரித்துள்ளதாக அவர் கூறினார். மேலும், IMD தற்போது ஆட்சி நிர்வாகம், பேரிடர் மேலாண்மை, வேளாண் திட்டமிடல் மற்றும் அன்றாட பொதுமக்கள் முடிவெடுப்புகளில் முக்கிய பங்கு வகிக்கிறது என்றும் தெரிவித்தார்.
புதியதாக அறிமுகப்படுத்தப்பட்ட இந்த அமைப்புகள், வழக்கமான வானிலை முன்னறிவிப்பிலிருந்து தாக்கத்தை மையமாகக் கொண்ட மற்றும் தீர்மான உதவி வழங்கும் முன்னறிவிப்பு முறைக்கான முக்கிய முன்னேற்றமாகும் என்றும் அவர் கூறினார். இது விவசாயிகள், நிர்வாகிகள், பேரிடர் மேலாண்மை அதிகாரிகள் மற்றும் பொதுமக்களுக்கு துல்லியமான, இடவாரியான மற்றும் செயற்பாட்டு தகவல்களை வழங்கும் திறன் கொண்டதாக இருக்கும் எனவும் தெரிவித்தார்.
இந்த அறிமுக விழா, புதுதில்லியில் உள்ள பூமி அறிவியல் அமைச்சகத்தின் மகிகா அரங்கில் நடைபெற்றது. இதில் பூமி அறிவியல் அமைச்சகச் செயலாளர் டாக்டர் எம். ரவிச்சந்திரன், இந்திய வானிலை ஆய்வு மையத்தின் தலைமை இயக்குநர் டாக்டர் மிருத்யுஞ்ஜய் மொஹபாத்ரா, IITM புனே இயக்குநர் டாக்டர் சூர்யசந்திர ராவ் உள்ளிட்ட விஞ்ஞானிகள், அதிகாரிகள் மற்றும் ஊடக பிரதிநிதிகள் கலந்து கொண்டனர்.
இந்தியாவின் வானிலை கட்டமைப்பு வேகமாக நவீனமயமாக்கப்பட்டு வருவதை குறிப்பிட்ட அமைச்சர், பத்து ஆண்டுகளுக்கு முன்பு இந்தியாவில் வெறும் 16 முதல் 17 டாப்ளர் வானிலை ரேடார்கள் மட்டுமே இருந்த நிலையில், தற்போது அவற்றின் எண்ணிக்கை சுமார் 50 ஆக உயர்ந்துள்ளதாகவும், “மிஷன் மௌசம்” திட்டத்தின் கீழ் மேலும் 50 ரேடார்கள் நிறுவ திட்டமிடப்பட்டுள்ளதாகவும் தெரிவித்தார். தானியங்கி வானிலை நிலையங்கள், உயர் திறன் கணினி வசதிகள் மற்றும் டிஜிட்டல் தகவல் பரவல் அமைப்புகள் ஆகியவை முன்னறிவிப்பு திறனையும், முன்எச்சரிக்கை அமைப்புகளையும் மேம்படுத்தியுள்ளதாகவும் அவர் கூறினார்.
AI அடிப்படையிலான பருவமழை முன்னேற்ற கணிப்பு அமைப்பு, ஒவ்வொரு புதன்கிழமையும் நான்கு வாரங்களுக்கு முன்பே பருவமழை நகர்வை சாத்தியக்கூறு அடிப்படையில் கணித்து வழங்கும். இந்த சேவை, வேளாண்மை மற்றும் விவசாயிகள் நல அமைச்சகத்தின் தகவல் பரவல் அமைப்பின் மூலம் 16 மாநிலங்களிலும், 3,000-க்கும் மேற்பட்ட துணை மாவட்டங்களிலும் உள்ள விவசாயிகளுக்கு உதவும் வகையில் வடிவமைக்கப்பட்டுள்ளது. செயற்கை நுண்ணறிவு கணிப்பு மாதிரிகள், நீண்டகால முன்னறிவிப்பு அமைப்புகள் மற்றும் புள்ளிவிவர நுட்பங்கள் இணைந்து இந்த சேவையை உருவாக்கியுள்ளன.
இரண்டாவது சேவையாக அறிமுகமான “உத்தரப் பிரதேச உயர் துல்லிய மழைப்பொழிவு முன்னறிவிப்பு அமைப்பு”, 1 கிலோமீட்டர் பரப்பளவு துல்லியத்தில் 10 நாட்களுக்கு முன்பே மழை கணிப்பை வழங்கும் திறன் கொண்டதாகும். தானியங்கி மழை அளவையர்கள், வானிலை நிலையங்கள், டாப்ளர் ரேடார்கள் மற்றும் செயற்கைக்கோள் தரவுகள் ஆகியவற்றை ஒருங்கிணைத்து, AI அடிப்படையிலான நவீன கணிப்பு முறைகள் பயன்படுத்தப்பட்டுள்ளன.
இந்த திட்டம் வேளாண்மை, நீர்வள மேலாண்மை, புதுப்பிக்கத்தக்க ஆற்றல், நகர்ப்புற திட்டமிடல், பேரிடர் மேலாண்மை மற்றும் அடிக்கட்டு துறைகளுக்கு மிகவும் பயனுள்ளதாக இருக்கும் என அமைச்சர் தெரிவித்தார். விவசாயிகள் விதைப்பு, பாசனம், பயிர் பாதுகாப்பு மற்றும் அறுவடை திட்டமிடல் போன்ற முடிவுகளை இப்போது மிகத் துல்லியமாக எடுக்க முடியும் என்றும் அவர் கூறினார்.
கடந்த பத்து ஆண்டுகளில் கடுமையான வானிலை நிகழ்வுகளை கணிக்கும் திறனில் இந்தியா சுமார் 40 சதவீத முன்னேற்றத்தை கண்டுள்ளதாகவும், சூறாவளியின் பாதை, வலிமை மற்றும் கரையைக் கடக்கும் நேரம் குறித்த 72 மணி நேர கணிப்புகளில் கடந்த ஐந்து ஆண்டுகளில் 30 முதல் 35 சதவீதம் வரை துல்லியம் அதிகரித்துள்ளதாகவும் அவர் தெரிவித்தார்.
மாறிவரும் காலநிலை மற்றும் அதிகரித்து வரும் தீவிர வானிலை நிகழ்வுகள் காரணமாக துல்லியமான மற்றும் உடனடி முன்னறிவிப்புகள் மிகவும் அவசியமானதாகிவிட்டதாகவும், தற்போதைய சூழலில் அறிவியல் ரீதியாக மேம்பட்டதுடன், நிர்வாக மற்றும் பொதுமக்கள் தீர்மானங்களுக்கு உடனடி ஆதரவு வழங்கக்கூடிய அமைப்புகள் தேவைப்படுகின்றன என்றும் அவர் கூறினார்.
பிரதமர் நரேந்திர மோடி தலைமையிலான மத்திய அரசு, நாட்டின் வானிலை மற்றும் காலநிலை சேவைகளை நவீனமயமாக்க பல மாற்றுத்திறன் வாய்ந்த திட்டங்களை செயல்படுத்தி வருவதாக அமைச்சர் தெரிவித்தார். “மிஷன் மௌசம்”, ரேடார் வலையமைப்பு விரிவாக்கம், கண்காணிப்பு அமைப்புகள் வலுப்படுத்தல், தரவு தொடர்பு வசதிகள் மேம்பாடு மற்றும் உயர் திறன் கணினி வசதிகள் ஆகியவை இந்தியாவின் வானிலை முன்னறிவிப்பு சூழலை தொழில்நுட்ப ரீதியாக வலுப்படுத்தி வருவதாகவும் கூறினார்.
மேலும், வானிலை எச்சரிக்கைகள் மற்றும் ஆலோசனைகள் தற்போது மொபைல் செயலிகள், SMS, வாட்ஸ்அப், கிசான் தளங்கள், தொலைக்காட்சி மற்றும் பல்வேறு டிஜிட்டல் தளங்கள் வழியாக பொதுமக்களுக்கு சென்றடைவதாகவும், உள்ளூர் நிர்வாகங்கள் மற்றும் தொடர்புடைய துறைகள் அவற்றை சரியான நேரத்தில் பின்பற்றுவது பேரிடர் சேதங்களை குறைப்பதில் முக்கியம் என்றும் அவர் வலியுறுத்தினார்.
பூமி அறிவியல் அமைச்சகச் செயலாளர் டாக்டர் எம். ரவிச்சந்திரன் கூறுகையில், புதியதாக அறிமுகமான இந்த சேவைகள் அனைத்தும் விவசாயம் உள்ளிட்ட பல துறைகளின் தேவைகளை கருத்தில் கொண்டு உருவாக்கப்பட்டவை என்றும், எண் அடிப்படையிலான வானிலை கணிப்பு முறைகள் மற்றும் AI தொழில்நுட்பங்கள் இணைந்து பயன்படுத்தப்பட்டுள்ளதாகவும் தெரிவித்தார்.
மேலும், பருவமழை முன்னேற்ற கணிப்பு தற்போது மாவட்ட அளவிலான துல்லியமான தகவல்களை வழங்கும் என்றும், உத்தரப் பிரதேச திட்டம் 1 கி.மீ. துல்லியத்தில் செயல்பாட்டு மழை கணிப்புகளை உருவாக்கும் இந்தியாவின் திறனை நிரூபிப்பதாகவும் கூறினார். எதிர்காலத்தில் இதுபோன்ற சேவைகள் நாடு முழுவதும் விரிவுபடுத்தப்படும் என்றும் தெரிவித்தார்.
இறுதியாக, டாக்டர் ஜிதேந்திர சிங், இந்த புதிய வானிலை முன்னறிவிப்பு சேவைகள் இந்தியாவை காலநிலை மாற்றத்துக்கு எதிரான வலுவான, டிஜிட்டல் திறன் கொண்ட மற்றும் மக்களை மையமாகக் கொண்ட வானிலை சேவை அமைப்பாக மாற்றும் முக்கியமான முன்னேற்றமாக இருக்கும் என குறிப்பிட்டார்.
எஸ். சதிஷ் சர்மா