அறிவியல் மற்றும் தொழில்நுட்பம், புவி அறிவியல் ஆகிய துறைகளின் மத்திய இணை அமைச்சரும் (தனிப் பொறுப்பு), பிரதமர் அலுவலகம், பணியாளர், பொதுக் குறைகள், ஓய்வூதியங்கள், அணுசக்தி மற்றும் விண்வெளி ஆகிய துறைகளின் இணை அமைச்சருமான டாக்டர் ஜிதேந்திர சிங் இன்று கூறுகையில், கடந்த பத்தாண்டுகளில் அறிவியல் மற்றும் தொழில்நுட்பத் துறையால் (DST) முன்னெடுக்கப்பட்ட தொழில்நுட்பம் சார்ந்த புத்தாக்கமே இந்தியாவின் பொருளாதார மறுமலர்ச்சிக்கு முக்கியக் காரணமாகும் என்றும், அதன் பங்களிப்பு ஆராய்ச்சியில் இருந்து தொழில்துறை, புத்தொழில் நிறுவனங்கள் மற்றும் தேசிய வளர்ச்சி வரை விரிவடைந்துள்ளது என்றும் தெரிவித்தார்.
ஆராய்ச்சியைப் பொருளாதார விளைவுகளுடன் ஒருங்கிணைக்கும் ஒரு புதிய கொள்கை திசையைப் பிரதிபலிக்கும் வகையில், அறிவியல் இனி “ஆய்வகங்களிலிருந்து சந்தைகளுக்கும், கருத்துக்களிலிருந்து தாக்கத்திற்கும்” நகர வேண்டும் என்று அமைச்சர் கூறினார்.
புது தில்லியில் உள்ள இந்திய தேசிய அறிவியல் அகாதமி (INSA) அரங்கில் நடைபெற்ற அறிவியல் மற்றும் தொழில்நுட்பத் துறையின் 56வது நிறுவன நாள் விழாவில் டாக்டர் ஜிதேந்திர சிங் உரையாற்றினார். இந்நிகழ்ச்சியில், இந்திய அரசின் முதன்மை அறிவியல் ஆலோசகர் பேராசிரியர் அஜய் குமார் சூட், அறிவியல் மற்றும் தொழில்நுட்பத் துறையின் செயலாளர் பேராசிரியர் அபய் கரண்டிகர் ஆகியோருடன் முன்னணி விஞ்ஞானிகள், கல்வியாளர்கள் மற்றும் அறிவியல் துறை உறுப்பினர்களும் கலந்துகொண்டனர்.
விண்வெளி மற்றும் அணுசக்தி போன்ற துறைகளைத் தனியார் பங்கேற்புக்குத் திறந்துவிட்ட கொள்கை முடிவுகளின் ஆதரவுடன், கடந்த பத்தாண்டுகளில் இந்தியாவின் அறிவியல் மற்றும் தொழில்நுட்பத் துறையானது ஒரு தீர்க்கமான மாற்றத்திற்கு உள்ளாகியுள்ளது என்று அமைச்சர் கூறினார். இந்த நடவடிக்கைகள், புத்தொழில் நிறுவனங்களுக்கும் தொழில்துறைக்கும் புதிய வாய்ப்புகளைத் திறந்துவிட்டுள்ளதாகவும், இதன்மூலம் இந்தியா தனது பரந்த மனிதவளத்தைப் பயன்படுத்திக்கொள்ளவும், உலகளாவிய புத்தாக்கச் சூழலில் தனது நிலையை வலுப்படுத்திக்கொள்ளவும் வழிவகை ஏற்பட்டுள்ளதாகவும் அவர் குறிப்பிட்டார்.
விண்வெளித் துறையின் விரைவான விரிவாக்கத்தைக் குறிப்பிட்டு, டாக்டர் ஜிதேந்திர சிங் கூறுகையில், தனியார் நிறுவனங்களுக்கு இத்துறை திறக்கப்பட்ட சில ஆண்டுகளிலேயே, ஸ்டார்ட்அப் நிறுவனங்களால் முன்னெடுக்கப்படும் புத்தாக்கங்களில் இந்தியா ஒரு எழுச்சியைக் கண்டு வருகிறது என்றும், செயற்கைக்கோள் தொழில்நுட்பங்கள் போன்ற துறைகளில் புதிய திறன்கள் உருவாகி, அவை பொருளாதார வளர்ச்சிக்கும் தேசிய தயார்நிலைக்கும் பங்களிக்கின்றன என்றும் தெரிவித்தார். வளர்ந்து வரும் தொழில்நுட்பத் துறைகள் முழுவதிலும் இதேபோன்ற உத்வேகம் உருவாகி வருவதாகவும் அவர் மேலும் கூறினார்.
தொழில் மற்றும் தனியார் துறையிலிருந்து தனித்து இருந்துகொண்டு எந்தவொரு நாடும் அறிவியலில் முன்னேற முடியாது என்று கூறிய அமைச்சர், அரசு, கல்வித்துறை மற்றும் தொழில்துறை ஆகியவற்றுக்கு இடையே ஆழமான ஒத்துழைப்பு தேவை என்றும் அழைப்பு விடுத்தார். மருந்துத் துறை போன்ற முக்கியத் துறைகள் உட்பட, பல்வேறு பிரிவுகளில் இந்தியா தனது சொந்தத் தொழில்நுட்பங்களை அதிகளவில் உருவாக்கி வருவதாகக் குறிப்பிட்ட அவர், உள்நாட்டு ஆராய்ச்சியின் முக்கியத்துவத்தையும் வலியுறுத்தினார்.
அதிக மேற்கோள் காட்டப்படும் ஆராய்ச்சி வெளியீடுகளின் பங்கு அதிகரித்து, தரம் மற்றும் தாக்கம் ஆகிய இரண்டையும் பிரதிபலிப்பதால், இந்தியாவின் உலகளாவிய அறிவியல் அந்தஸ்தும் கணிசமாக வலுப்பெற்றுள்ளது என்று டாக்டர் ஜிதேந்திர சிங் கூறினார். ஒரு தசாப்தத்திற்கு முன்பு சில நூறுகளாக இருந்த இந்தியாவின் ஸ்டார்ட்அப் சூழலமைப்பு, இன்று இரண்டு லட்சத்திற்கும் மேலாக விரிவடைந்திருப்பதை, வேகமாக முதிர்ச்சியடைந்து வரும் புத்தாக்கக் களத்திற்கான சான்றாக அவர் சுட்டிக்காட்டினார்.
அறிவியல் நிறுவனங்கள் தங்களின் சாதனைகளைத் தீவிரமாகப் பகிர்ந்துகொள்ள வேண்டும் என்றும், சம்பந்தப்பட்ட தரப்பினருடன் ஈடுபட வேண்டும் என்றும் அமைச்சர் வலியுறுத்தினார். கூட்டாண்மைகளை ஈர்ப்பதற்கும், பரந்த சமூகத் தாக்கத்தை உறுதி செய்வதற்கும் வெளிப்படைத்தன்மையும் மக்களைச் சென்றடைவதும் அவசியம் என்றும் அவர் குறிப்பிட்டார். புதுமைப் படைப்பாளர்கள் ஊக்குவிக்கப்பட வேண்டும் என்றாலும், இளம் திறமையாளர்களைத் தெளிவுடனும் யதார்த்தத்துடனும் வழிநடத்தும் ஒரு வெளிப்படையான மற்றும் தகுதி அடிப்படையிலான சூழலமைப்பை உருவாக்குவதும் சம முக்கியத்துவம் வாய்ந்தது என்று அவர் கூறினார்.
பழைய அமைப்புகளை மறுசீரமைத்தல் மற்றும் முடிவெடுப்பதில் அதிகாரப் பரவலாக்கம் உள்ளிட்ட, செயல்திறனை மேம்படுத்துவதையும் தற்கால தொழில்நுட்பத் தேவைகளுக்கு ஏற்ப நிறுவனங்களைச் சீரமைப்பதையும் நோக்கமாகக் கொண்ட தற்போதைய நிர்வாக சீர்திருத்தங்களையும் அவர் மேலும் குறிப்பிட்டார்.
முன்னதாக, முதன்மை அறிவியல் ஆலோசகர் பேராசிரியர் அஜய் குமார் சூட், ஆராய்ச்சியை தொழில்நுட்ப மேம்பாடு மற்றும் வணிகமயமாக்கலுடன் ஒருங்கிணைக்க வேண்டியதன் அவசியம் குறித்துப் பேசினார். அதே நேரத்தில், அறிவியல் மற்றும் தொழில்நுட்பத் துறை செயலாளர் பேராசிரியர் அபய் கரண்டிகர், இந்தியாவின் அறிவியல் மற்றும் புத்தாக்கச் சூழலமைப்பை வலுப்படுத்துவதற்காக அனுசந்தன் தேசிய ஆராய்ச்சி அறக்கட்டளை, ஆராய்ச்சி, மேம்பாடு மற்றும் புத்தாக்க நிதி (RDI Fund) மற்றும் தேசிய குவாண்டம் இயக்கம் போன்ற முக்கிய முன்னெடுப்புகளை எடுத்துரைத்தார்.
தொடர்ச்சியான சீர்திருத்தங்கள், வலுவான நிறுவனக் கட்டமைப்புகள் மற்றும் அனைத்துத் தரப்பினரின் தீவிரப் பங்கேற்புடன், இந்தியாவின் அறிவியல் மற்றும் தொழில்நுட்பச் சூழலமைப்பானது, வரும் ஆண்டுகளில் நாட்டின் பொருளாதார வளர்ச்சியையும் உலகளாவிய தலைமைத்துவத்தையும் வடிவமைப்பதில் ஒரு தீர்க்கமான பங்கை வகிக்கும் என்று டாக்டர் ஜிதேந்திர சிங் நம்பிக்கை தெரிவித்தார்.
எஸ்.சதிஸ் சர்மா