பாதுகாப்பு அமைச்சர் திரு ராஜ்நாத் சிங் அவர்கள், ‘பாதுகாப்பு திரிவேணி சங்கம் – தொழில்நுட்பம், தொழில் மற்றும் வீரம் சங்கமிக்கும் இடம்’ என்ற கருப்பொருளில், உத்தரப் பிரதேச மாநிலம் பிரயாக்ராஜில் மே 04, 2026 அன்று நடைபெறும் வட தொழில்நுட்பக் கருத்தரங்கைத் தொடங்கி வைப்பார். மூன்று நாட்கள் நடைபெறும் இந்த நிகழ்வானது, இந்திய ராணுவத்தின் வடக்கு மற்றும் மத்திய கட்டளைப் பிரிவுகள் மற்றும் இந்திய பாதுகாப்பு உற்பத்தியாளர்கள் சங்கம் (SIDM) ஆகியவற்றால் கூட்டாக ஏற்பாடு செய்யப்பட்டுள்ளது.
செயல்பாட்டுச் சவால்களை எதிர்கொள்வதற்காக, அதிநவீன உள்நாட்டுத் தொழில்நுட்பங்களைக் காட்சிப்படுத்தவும் ஒருங்கிணைக்கவும் இந்தக் கருத்தரங்கம் ஒரு உயிரோட்டமான தளமாக அமையும். இந்தக் கண்காட்சியில், நாடு முழுவதிலுமிருந்து குறு, சிறு மற்றும் நடுத்தர நிறுவனங்கள் (MSMEs), தனியார் பாதுகாப்புத் தொழில்நுட்ப நிறுவனங்கள், புத்தொழில் நிறுவனங்கள் மற்றும் சீருடை அணிந்த புதுமைப் படைப்பாளர்கள் உள்ளிட்ட பல்வேறு பங்கேற்பாளர்கள் இடம்பெறுவார்கள். 284 நிறுவனங்கள் தங்களின் சமீபத்திய கண்டுபிடிப்புகளையும் தொழில்நுட்பங்களையும் காட்சிப்படுத்தும் அரங்குகளை அமைக்கின்றன. இந்திய இராணுவத்திற்கு ஒரு நிலையான மற்றும் தன்னிறைவான பாதுகாப்புச் சூழலமைப்பை மேம்படுத்துவதற்காக, களப் பயன்பாட்டிற்கு ஏற்ற தொழில்நுட்பங்களைக் கண்டறிதல், பராமரிப்பு செயல்முறைகளை நெறிப்படுத்துதல் மற்றும் கொள்முதலை முறைப்படுத்துதல் ஆகியவற்றை இந்த நிகழ்வு நோக்கமாகக் கொண்டுள்ளது.
மாறிவரும் பாதுகாப்புச் சவால்களை எதிர்கொள்வதற்கு, அதிநவீன தொழில்நுட்பங்களின் செயல்பாட்டு முக்கியத்துவத்தையும் தொடர்ச்சியான புத்தாக்கத்தின் தேவையையும் இந்திய ராணுவம் தொடர்ந்து வலியுறுத்தி வருகிறது. 2026, மே 06 அன்று நிறைவடையவுள்ள இந்த நார்த் டெக் சிம்போசியம், பாதுகாப்புப் படைகள், விஞ்ஞானிகள், தொழில்துறைத் தலைவர்கள் மற்றும் கல்விச் சமூகம் ஆகியவற்றுக்கு இடையே ஒரு பாலமாகச் செயல்பட்டு, தேசியப் பாதுகாப்பையும் தொழில்நுட்பச் சிறப்பையும் வலுப்படுத்தும் நோக்கில் ஒத்துழைப்பை வளர்க்கும் என எதிர்பார்க்கப்படுகிறது.
எம்.பிரபாகரன்