தேசிய நெடுஞ்சாலைகள் கட்டுமானம் மற்றும் பராமரிப்புப் பணிகளில் ஈடுபட்டுள்ள பணியாளர்கள் மீது வெப்ப தாக்கத்தைக் குறைக்க தேசிய நெடுஞ்சாலை ஆணையம் நடவடிக்கை .

தற்போதைய கோடை காலத்தில் நிலவும் கடும் வெப்ப அலை மற்றும் இயல்பை விட அதிகமான வெப்பநிலையைக் கருத்தில் கொண்டு, பணியாளர்களின் ஆரோக்கியத்தைப் பாதுகாப்பதற்கும், வெப்ப அலை நிலவும் போது தேசிய நெடுஞ்சாலைப் பயனாளிகளின் பாதுகாப்பை உறுதி செய்வதற்கும் முன்னெச்சரிக்கை நடவடிக்கைகளைக் கட்டாயமாக்கும் நோக்கில் தேசிய நெடுஞ்சாலை ஆணையம் (NHAI) விரிவான வழிகாட்டுதல்களை வெளியிட்டுள்ளது. இந்த வழிகாட்டுதல்கள், NHAI அதிகார வரம்பிற்குட்பட்ட கட்டுமானத் தளங்கள், பராமரிப்புப் பணிகள் மற்றும் சுங்கச்சாவடிகளுக்கான கட்டாயப் பாதுகாப்பு நெறிமுறைகளை விவரிக்கின்றன. சிறந்த நடைமுறைகளின் அடிப்படையிலான இந்தப் பாதுகாப்பு நடவடிக்கைகள், பணியாளர்கள் மற்றும் தொழிலாளர்களின் நலனை உறுதி செய்வதற்காக அனைத்து ஒப்பந்ததாரர்கள், சலுகையாளர்கள் மற்றும் சுங்கக் கட்டண வசூல் முகமைகளால் உடனடியாகச் செயல்படுத்தப்படும்.

கட்டுமானம் மற்றும் பராமரிப்பு திட்டங்களுக்கான வழிகாட்டுதல்கள்

பொதுவாக மதியம் 12:00 மணி முதல் மாலை 4:00 மணி வரையிலான உச்ச வெப்ப நேரங்களைத் தவிர்ப்பதற்காக, தொழிலாளர்களுக்கு மாற்றி மாற்றி வேலை நேரங்களை வழங்குமாறு ஒப்பந்ததாரர்கள் மற்றும் சலுகையாளர்களுக்கு NHAI அறிவுறுத்தியுள்ளது. தார் இடுதல், பற்றவைத்தல் போன்ற அதிக உழைப்பு தேவைப்படும் மற்றும் வெப்பத்தை உருவாக்கும் பணிகள் அதிகாலை அல்லது இரவு நேரங்களில் மேற்கொள்ளப்பட வேண்டும். கடுமையான வெப்ப எச்சரிக்கைகளின் போது, ​​சீரான இடைவெளிகளில் கட்டாயமான குளிர்ச்சி இடைவேளைகள், அதிக எண்ணிக்கையில் பரிந்துரைக்கப்பட்டுள்ளன.

பணியாளர்களைச் சூழலுக்குப் பழக்கப்படுத்துவதில் சிறப்பு கவனம் செலுத்தப்பட்டுள்ளது. இதன் மூலம், புதிய அல்லது மீண்டும் பணிக்குத் திரும்பும் பணியாளர்கள், 3 முதல் 5 நாட்கள் வரையிலான காலகட்டத்தில் படிப்படியாகக் கடினமான பணிகளுக்குப் பழக்கப்படுத்தப்படுவது உறுதி செய்யப்படுகிறது. மேலும், வெப்பத்தாக்கம் உட்பட, வெப்பம் தொடர்பான நோய்கள் அல்லது உடல்நலப் பிரச்சினைகளைக் கண்டறிந்து, அவற்றுக்கு எதிர்வினையாற்றுவதற்கும் பணியாளர்களுக்குப் பயிற்சி அளிக்கப்பட வேண்டும்.

தளத்தில் போதுமான ஆதரவை உறுதி செய்வதற்காக, முறையான காற்றோட்ட வசதியுடன் கூடிய தற்காலிக நிழலான ஓய்விடங்களும், குளிர்ச்சியான மற்றும் குடிப்பதற்கு உகந்த குடிநீருக்கான தடையற்ற அணுகலும் வழங்கப்பட வேண்டும். முதலுதவி நிலையங்கள், ரோந்து வாகனங்கள் மற்றும் தள மேற்பார்வையாளர்கள் வாய்வழி நீரேற்ற உப்புகள் (ORS) மற்றும் குளுக்கோஸை இருப்பு வைத்திருக்க வேண்டும். கட்டுமானத் தளங்களில் பாதுகாப்பு உபகரணங்களை அணிவது கட்டாயமாக இருந்தாலும், காற்றோட்டமான, பருத்தி அடிப்படையிலான, நன்கு தெரியும் மேலங்கிகளைப் பயன்படுத்த அறிவுறுத்தப்பட்டுள்ளது.

அவசரகாலத் தயார்நிலையும் வலுப்படுத்தப்பட்டுள்ளது. தேசிய நெடுஞ்சாலை ஆணையத்தின் (NHAI) ரோந்து ஆம்புலன்ஸ்களில் பனிக்கட்டிப் பொதிகள், குளிர் நீர் மற்றும் நரம்பு வழி திரவங்கள் வழங்கப்பட உள்ளன. அதிக வெப்பம் காரணமாக ஏற்படும் வெப்பம் தொடர்பான சிக்கல்கள் மற்றும் வாகனப் பழுதுகளை எதிர்கொள்ளும் நெடுஞ்சாலைப் பயனாளர்களுக்கு உதவுவதற்காக, வழித்தட ரோந்துப் பிரிவுகள் (RPUs) கண்காணிப்பின் அதிர்வெண்ணை அதிகரிக்க அறிவுறுத்தப்பட்டுள்ளன.

சுங்கச்சாவடிகள் மற்றும் செயல்பாடுகளுக்கான வழிகாட்டுதல்கள்

சுங்கச்சாவடி செயல்பாடுகளுக்காக, காலை 11:00 மணி முதல் பிற்பகல் 3:00 மணி வரையிலான உச்ச வெப்ப நேரங்களில், உகந்த பணிநேர மேலாண்மை மற்றும் சுழற்சி முறையிலான பணிப்பட்டியல்கள் மூலம் பணியாளர்கள் வெளியில் இருப்பதைத் தவிர்க்குமாறு தேசிய நெடுஞ்சாலை ஆணையம் (NHAI) அறிவுறுத்தியுள்ளது. உச்ச நேரச் சுங்கச்சாவடிப் பாதையில் பணியில் இருக்கத் தேவையில்லாத நிர்வாக மற்றும் பராமரிப்புப் பணிகளுக்கு இரவு நேரங்கள் திறம்படப் பயன்படுத்தப்படும். மேலும், பணியாளர்களுக்கும் பயணிகளுக்கும் உதவுவதற்காக, வெப்பம் தொடர்பான உடல்நலப் பாதிப்புகளைக் கண்டறிந்து அவற்றுக்குத் தீர்வு காண்பது குறித்தும் சுங்கச்சாவடி ஊழியர்களுக்குப் பயிற்சி அளிக்கப்படும்.

மேலும், சுங்கச்சாவடிகள், ஓய்விடங்கள் மற்றும் அலுவலகக் கட்டிடங்களில் குளிரூட்டப்பட்ட குளிர் அறைகள் உருவாக்கப்படும். சாலைப் பாதைகளுக்கு அருகிலும் திறந்தவெளிகளிலும் பணிபுரியும் பணியாளர்களுக்கு நிழல் வழங்குவதற்காக தற்காலிகக் கொட்டகைகளும் மேற்கூரைகளும் அமைக்கப்படும். கூடுதலாக, அனைத்து சுங்கச்சாவடி இடங்களிலும் குளிர்ந்த குடிநீர், ORS மற்றும் குளுக்கோஸ் ஆகியவை தொடர்ந்து கிடைப்பது கட்டாயமாக்கப்பட்டுள்ளது. விதிமுறைகள் பின்பற்றப்படுவதை உறுதிசெய்ய, NHAI கள அதிகாரிகள் திட்டப் பகுதிகள் மற்றும் சுங்கச்சாவடிகள் முழுவதும் வாராந்திர ஆய்வுகளை மேற்கொள்வார்கள்.

இந்த நடவடிக்கைகள், வெப்ப அலையின் தாக்கத்தைக் குறைப்பதோடு, தேசிய நெடுஞ்சாலை கட்டுமானம் மற்றும் செயல்பாடுகள் தடையின்றி நடைபெறுவதையும் உறுதிசெய்ய உதவும். தேசிய நெடுஞ்சாலை ஆணையம் (NHAI), பணியாளர்களின் நலனுக்கும் நாடு முழுவதும் உள்ள தேசிய நெடுஞ்சாலைப் பயனாளிகளின் பாதுகாப்பிற்கும் முன்னுரிமை அளிப்பதில் உறுதியாக உள்ளது.

எம்‌.பிரபாகரன்