இந்தியா-நியூசிலாந்து தடையற்ற வர்த்தக ஒப்பந்தத்தின் கீழ் கல்வி, திறமையாளர் இடமாற்றம் மற்றும் பல்துறை வாய்ப்புகளைப் பயன்படுத்திக்கொள்ளுமாறு மத்திய அமைச்சர் பியூஷ் கோயல் வலியுறுத்தல்.

இந்தியா-நியூசிலாந்து தடையற்ற வர்த்தக ஒப்பந்தம் (FTA) கையெழுத்திடப்படுவதற்கு முந்தைய நாள், மத்திய வர்த்தகம் மற்றும் தொழில்துறை அமைச்சர் திரு. பியூஷ் கோயல் மற்றும் நியூசிலாந்து வர்த்தகம் மற்றும் முதலீட்டுத் துறை அமைச்சர் திரு. டாட் மெக்ளே ஆகியோர் ஆக்ராவில் நடைபெற்ற ஒரு தொழில்துறை கலந்துரையாடல் நிகழ்ச்சியில் பங்கேற்றனர். மீன்வளம், கால்நடை வளர்ப்பு மற்றும் பால்வளத்துறை இணை அமைச்சர் திரு. எஸ்.பி. பாகேலும் இந்தக் கலந்துரையாடலில் பங்கேற்றார். இந்தக் கலந்துரையாடல், தோல் மற்றும் காலணி, ஆயுஷ், மருத்துவ சாதனங்கள், இலகு பொறியியல், விளையாட்டுப் பொருட்கள் துறைகள் மற்றும் உத்தரப் பிரதேசத்தைச் சேர்ந்த லகு உத்யோக் பாரதி ஆகியவற்றின் முன்னணி தொழில்துறைப் பிரதிநிதிகளை ஒன்றிணைத்தது. இந்தியாவின் தோல் உற்பத்தித் திறன், மருந்துத் தொழில், மருத்துவ சாதனங்கள் தொழில், பொறியியல் பொருட்கள் ஆகியவற்றின் ஆழத்தையும் பன்முகத்தன்மையையும் பிரதிபலிக்கும் வகையில் தொழில்துறையினர் தங்கள் கருத்துக்களை முன்வைத்தனர்.

அனைவரையும் உள்ளடக்கிய, தொலைநோக்குடைய, மற்றும் இந்தியாவின் தேசிய முன்னுரிமைகளில் ஆழமாக வேரூன்றிய வர்த்தகக் கூட்டாண்மைகளை உருவாக்கும் பிரதமர் திரு நரேந்திர மோடியின் தொலைநோக்குப் பார்வைக்கு இணங்க, இந்தியா-நியூசிலாந்து தடையற்ற வர்த்தக ஒப்பந்தம் என்பது வெறும் ஒரு கட்டண ஒப்பந்தத்தை விட மிக மேலானது என்று இரு அமைச்சர்களும் வலியுறுத்தினர். இது இரு நாடுகளிலும் உள்ள உற்பத்தியாளர்கள், விவசாயிகள், குறு, சிறு மற்றும் நடுத்தர நிறுவனங்கள், பெண் தொழில்முனைவோர், மாணவர்கள் மற்றும் திறமையான தொழில் வல்லுநர்களுக்குப் பயனளிக்கும் வகையில் வடிவமைக்கப்பட்ட ஒரு விரிவான கட்டமைப்பாகும். இது சந்தை அணுகல், விவசாய உற்பத்தித்திறன், முதலீடு, திறமையாளர் இடப்பெயர்வு, விளையாட்டு, சுற்றுலா மற்றும் மக்கள்-மக்களுக்கு இடையேயான உறவுகளில் ஒத்துழைப்பு ஆகியவற்றை உள்ளடக்கியது.

திவாஹர்