நகர்ப்புறப் போக்குவரத்தை வலுப்படுத்துவதற்கும், ஓட்டுநர்களின் வாழ்வாதாரத்தை மேம்படுத்துவதற்கும் ஒரு முக்கிய நடவடிக்கையாக, மத்திய வர்த்தகம் மற்றும் தொழில்துறை அமைச்சரும், மும்பை வடக்கு நாடாளுமன்ற உறுப்பினருமான திரு பியூஷ் கோயல், 2026 ஏப்ரல் 23 அன்று மும்பையில் பாரத் டாக்ஸி ஓட்டுநர் இணைப்புத் திட்டத்தைத் தொடங்கி வைத்தார். காண்டிவலி மேற்கில் உள்ள கம்லா விஹார் ஸ்போர்ட்ஸ் கிளப்பில் ஏற்பாடு செய்யப்பட்ட இந்நிகழ்ச்சியில், நூற்றுக்கணக்கான ஆட்டோ ரிக்ஷா மற்றும் வாடகைக் கார் ஓட்டுநர்கள், போக்குவரத்து சங்கப் பிரதிநிதிகள் மற்றும் கூட்டுறவு சங்க உறுப்பினர்கள் கலந்துகொண்டனர். ஓட்டுநர்களின் பங்கேற்பை மேம்படுத்தவும், வெளிப்படைத்தன்மையை அதிகரிக்கவும், சிறந்த வருமான வாய்ப்புகளை உருவாக்கவும் உதவும் கட்டமைக்கப்பட்ட டிஜிட்டல் தளங்களுக்கான அணுகலை விரிவுபடுத்துவதே இந்தத் திட்டத்தின் நோக்கமாகும்.
கூட்டத்தில் உரையாற்றிய திரு பியூஷ் கோயல், இந்தியாவின் வளர்ந்து வரும் போக்குவரத்துச் சூழலை வலுப்படுத்துவதில் கூட்டுறவு மற்றும் தொழில்நுட்பத்தால் இயக்கப்படும் மாதிரிகளின் முக்கியத்துவத்தை வலியுறுத்தினார். பாரத் டாக்ஸி, ஓட்டுநர்களைப் பங்காளர்களாகப் பங்கேற்கச் செய்வதோடு, வெளிப்படைத்தன்மை, வருமானம் மற்றும் உழைப்பின் கண்ணியத்தை மேம்படுத்தக்கூடிய டிஜிட்டல் கருவிகளிலிருந்து அவர்கள் பயனடையவும் வழிவகுக்கிறது என்று அவர் கூறினார். இத்தகைய முயற்சிகள் இந்தியாவின் நகர்ப்புறப் போக்குவரத்து அமைப்புகளின் எதிர்காலத் திசையைப் பிரதிபலிக்கின்றன என்றும் அவர் குறிப்பிட்டார்.
முக்கிய நகரங்களில் ஓட்டுநர்களுக்கு முன்னுரிமை அளிக்கும் போக்குவரத்து அமைப்புகளை வலுப்படுத்தும் பரந்த முயற்சிகளின் ஒரு பகுதியாக இந்த புதிய பயனர் சேர்க்கை இயக்கம் அமைகிறது. புதிய பயனர் சேர்க்கை செயல்முறைகளை எளிமையாக்குவதன் மூலமும், செயல்பாட்டுத் திறனை மேம்படுத்துவதன் மூலமும், பயணத் தேவைக்கான நிலையான அணுகலை உறுதி செய்வதன் மூலமும், இந்த முயற்சி ஓட்டுநர்கள் மற்றும் பயணிகள் இருவருக்கும் ஒரு நிலையான மற்றும் அனைவரையும் உள்ளடக்கிய சூழலமைப்பை உருவாக்க முயல்கிறது. டெல்லி என்சிஆர், குஜராத், சண்டிகர் மற்றும் லக்னோ உள்ளிட்ட, ஒழுங்கமைக்கப்பட்ட போக்குவரத்து வலையமைப்புகள் சீராக விரிவடைந்து வரும் நகரங்களின் வளர்ந்து வரும் வலையமைப்பில் மும்பையும் இணைகிறது.
சமீபத்திய செயல்பாட்டுக் குறிகாட்டிகள் இந்தத் தளத்தின் வளர்ச்சியைப் பிரதிபலிக்கின்றன. இதில் 5.17 லட்சத்திற்கும் அதிகமான ஓட்டுநர்கள் ஈடுபட்டுள்ளனர், 50 லட்சத்திற்கும் மேற்பட்ட வாடிக்கையாளர்கள் இணைக்கப்பட்டுள்ளனர், மேலும் ஒவ்வொரு மாதமும் நகரங்கள் முழுவதும் கிட்டத்தட்ட 10 லட்சம் பயணங்கள் மேற்கொள்ளப்படுகின்றன. இந்நிகழ்ச்சியில் பேசிய பாரத் டாக்ஸியின் தலைமைச் செயல்பாட்டு அதிகாரி (COO) திரு விவேக் பாண்டே, மும்பை ஒரு அதிக ஆற்றல் வாய்ந்த சந்தை என்றும், உள்ளூர் ஓட்டுநர் சங்கங்களிடமிருந்து கிடைத்த வலுவான ஆதரவு, இந்தத் தளத்தின் விரிவாக்கத் திட்டங்கள் மற்றும் நகரில் ஒரு வலுவான ஓட்டுநர் சூழலமைப்பை உருவாக்குவதற்கான அதன் அர்ப்பணிப்பு ஆகியவற்றின் மீதான நம்பிக்கையை வலுப்படுத்தியுள்ளது என்றும் கூறினார்.
அடுத்த மூன்று ஆண்டுகளில் இந்தியாவின் அனைத்து முக்கிய நகரங்களிலும் பாரத் டாக்ஸி செயல்பட வேண்டும் என்ற மாண்புமிகு உள்துறை மற்றும் கூட்டுறவுத் துறை அமைச்சர் திரு அமித் ஷா அவர்களின் தொலைநோக்குப் பார்வையுடன் இந்த விரிவாக்கம் ஒத்துப்போகிறது. இந்த தேசிய வளர்ச்சித் திட்டத்தில் மும்பை ஒரு முக்கிய மைல்கல்லாக விளங்குகிறது. பெருநகரப் பகுதிகளில் உள்ள ஓட்டுநர்கள் மற்றும் பயணிகளின் மாறிவரும் தேவைகளுக்குப் பதிலளிக்கும் வகையில், தொழில்நுட்பம் சார்ந்த, அனைவரையும் உள்ளடக்கிய மற்றும் கூட்டுறவுப் போக்குவரத்து கட்டமைப்புகளை உருவாக்குவதில் அரசாங்கம் தொடர்ந்து கவனம் செலுத்துவதை இந்தத் திட்டம் அடிக்கோடிட்டுக் காட்டுகிறது.
எம்.பிரபாகரன்