எல்லைச் சாலைகள் அமைப்பின் (BRO) ‘தந்தக்’ திட்டம், ஏப்ரல் 1961-ல் நிறுவப்பட்டதிலிருந்து பூட்டானில் ஆற்றிய 65 ஆண்டுகால அர்ப்பணிப்புமிக்க சேவையைக் குறிக்கும் வகையில், தனது 66-வது நிறுவன தினத்தை ஏப்ரல் 24, 2026 அன்று பூட்டானின் திம்புவில் கொண்டாடியது. இந்நிகழ்வு, இந்தியாவுக்கும் பூட்டானுக்கும் இடையிலான கூட்டாண்மையை வலுப்படுத்துவதற்கான நீடித்த உறுதிப்பாட்டை மீண்டும் உறுதிப்படுத்தியது. தொழில்முறைச் சிறப்பு மற்றும் சமூக ஈடுபாடு ஆகிய இரண்டையும் பிரதிபலிக்கும் தொடர் நிகழ்வுகளுடன் இந்த நிறுவன தினக் கொண்டாட்டங்கள் நடைபெறுகின்றன. திம்புவில் நடைபெற்ற பள்ளிகளுக்கிடையேயான வினாடி வினாப் போட்டி, சிறந்த பணியாளர்களைப் பாராட்டுதல் மற்றும் கடமையின்போது தங்கள் உயிரைத் தியாகம் செய்தவர்களுக்கு ஆழ்ந்த அஞ்சலி செலுத்துதல் ஆகியவை இதில் அடங்கும்.
பூட்டானின் முதல் மோட்டார் வாகனச் சாலையை அமைத்தது முதல் முக்கிய தேசிய உள்கட்டமைப்பை மேம்படுத்துவது வரை, டான்டாக் திட்டம் நாடு தழுவிய இணைப்பு மற்றும் வளர்ச்சியின் ஒரு மூலக்கல்லாக உருவெடுத்து, பூட்டானின் சமூக-பொருளாதார மாற்றத்தில் ஒரு முக்கியப் பங்காற்றியுள்ளது. இத்திட்டத்தின் கீழ், திராஷிகாங்கை திம்புவுடன் இணைக்கும் மூலோபாய முக்கியத்துவம் வாய்ந்த கிழக்கு-மேற்கு நெடுஞ்சாலை உட்பட 1,500 கி.மீ-க்கும் அதிகமான சாலைகள் அமைக்கப்பட்டுள்ளன. புவென்ட்சோலிங்-திம்பு நெடுஞ்சாலை, பாரோ சர்வதேச விமான நிலையம் மற்றும் யோங்புலா விமான நிலையம் ஆகியவற்றைக் கட்டுவதிலும் இது முக்கியப் பங்காற்றியுள்ளது. மேலும், பூட்டான் முழுவதும் பாலங்கள், நீர்மின் உள்கட்டமைப்பு, தொலைத்தொடர்பு வலையமைப்புகள், மருத்துவமனைகள், பள்ளிகள் மற்றும் பிற முக்கிய நிறுவன வசதிகளின் வளர்ச்சிக்கும் இது பெருமளவில் பங்களித்துள்ளது.
சமீபத்திய ஆண்டுகளில், டான்டாக் திட்டம் நவீனமயமாக்கல் மற்றும் திறன் மேம்பாட்டில் கவனம் செலுத்தியுள்ளது. இதில், சங்கமம்–ஹா (முதற்கட்டம் ஆகஸ்ட் 1, 2025 அன்று திறக்கப்பட்டது) மற்றும் சுமார் 168 கிலோமீட்டர் நீளமுள்ள சம்ட்ரூப் ஜோங்கார்–ட்ராஷிகாங் நெடுஞ்சாலை போன்ற முக்கிய சாலைப் பகுதிகளை இரட்டை வழிப்பாதையாக மாற்றுவதும் அடங்கும். இதன் மூலம் பயண நேரம், பாதுகாப்பு மற்றும் இணைப்புத்திறன் ஆகியவை குறிப்பிடத்தக்க அளவில் மேம்படுத்தப்பட்டுள்ளன. மேலும், பெரும் நிலச்சரிவுகள் மற்றும் சாலைகள் அடித்துச் செல்லப்படுதல் உள்ளிட்ட இயற்கை சீற்றங்களின் போது, சாதனை நேரத்தில் இணைப்புத்திறனை மீட்டெடுத்து, இத்திட்டம் தனது அசாதாரணமான மீள்திறனையும் வெளிப்படுத்தியுள்ளது.
இதன் மூலம், டான்டாக் திட்டமானது, பூட்டான் முழுவதும் மூலோபாய முக்கியத்துவம் வாய்ந்த பணிகளைத் தொடர்ந்து செயல்படுத்தி வருகிறது. இதில், நங்லாம்–தேவதாங், சம்ராங்–ஜோமோட்சங்க்கா மற்றும் கோடக்பா–சோபாலே ஆகிய தென்கிழக்குப் பகுதிகளில் சாலை கட்டுமானம் மற்றும் மேம்பாட்டுத் திட்டங்கள், டாம்சு–சுக்கா அச்சில் நெடுஞ்சாலைகளை வலுப்படுத்துதல், பாலம் கட்டுதல் மற்றும் பான்பாங்–நங்லாம் மற்றும் தேவதாங்–சம்ட்ரூப்சோலிங் பகுதிகள் உள்ளிட்ட மாற்று வழித்தடங்களை உருவாக்குதல் ஆகியவை அடங்கும். இந்த முன்னெடுப்புகள் பூட்டானின் வளர்ச்சி முன்னுரிமைகள் மற்றும் சுற்றுச்சூழல் உணர்திறன்களுடன் இயைந்துள்ளன.
இந்தியப் பிரதமர் திரு நரேந்திர மோடி அவர்கள், 2025 நவம்பர் 11 அன்று பூட்டானுக்கு விஜயம் செய்தார். அப்போது, இருதரப்பு ஒத்துழைப்பையும் நட்புறவையும் ஆழப்படுத்துவதற்கான தங்களின் பகிரப்பட்ட உறுதிப்பாட்டை இரு நாடுகளும் மீண்டும் வலியுறுத்தின. பல தசாப்தங்களாக ‘டான்டாக்’ திட்டத்தின் பங்களிப்புகள், இந்தக் கூட்டாண்மை மற்றும் பரஸ்பர முன்னேற்ற உணர்வுடன் நெருக்கமாக இணைந்துள்ளன.
திவாஹர்