உலகின் நான்காவது பெரிய பொருளாதாரமாகவும், 140 கோடி மக்களின் தாயகமாகவும் விளங்கும் இந்தியா, உலகப் பொருளாதாரத்தின் ஒரு முக்கியத் தூணாகத் திகழ்கிறது என்று கொரியக் குடியரசின் அதிபர் மேதகு லீ ஜே மியுங் இன்று தெரிவித்தார்.
புது தில்லியில் நடைபெற்ற இந்தியா-கொரியா வர்த்தக மன்றத்தில் உரையாற்றிய அவர், வணிகத்தையும் வர்த்தகத்தையும் மேலும் விரிவுபடுத்துவதற்கு கணிசமான வாய்ப்புகள் உள்ளதாகவும், இருதரப்பு வர்த்தகத்தில் குறிப்பிடத்தக்க வளர்ச்சிக்கு இடமிருப்பதாகவும், விரிவான பொருளாதார கூட்டாண்மை ஒப்பந்தம் குறித்த தற்போதைய பேச்சுவார்த்தைகளுடன் தொடர்ச்சியான முயற்சிகள் மேற்கொள்ளப்பட்டால், அது இரட்டிப்பாகும் என எதிர்பார்க்கப்படுவதாகவும் குறிப்பிட்டார்.
கூட்டு முயற்சியின் மூலமாகவும், செயற்கை நுண்ணறிவில் இந்தியாவின் பலத்தைப் பயன்படுத்திக் கொள்வதன் மூலமாகவும், உயர் தொழில்நுட்பத் தொழில்துறைகளை எதிர்காலத்திற்குத் தயார்படுத்த வேண்டியதன் அவசியத்தை அவர் வலியுறுத்தினார். மேலும், கப்பல் போக்குவரத்துத் துறையில் ஒத்துழைப்பு வலுப்படுத்தப்படும் என்றும் அவர் கூறினார்.
இரு நாடுகளுக்கும் இடையே வலுவான மக்கள் நம்பிக்கையைக் கட்டியெழுப்புவதற்கு, பொருளாதார ஒத்துழைப்பைக் கடந்து செல்ல வேண்டியதன் முக்கியத்துவத்தையும் ஜனாதிபதி வலியுறுத்தினார்.
இந்தியா-கொரியா வர்த்தக மன்றத்தின் தொடக்க அமர்வில் உரையாற்றிய மத்திய வர்த்தகம் மற்றும் தொழில்துறை அமைச்சர் திரு பியூஷ் கோயல், வர்த்தகம், தொழில், மூலோபாய வளங்கள் மற்றும் தூய்மையான ஆற்றல் ஆகிய நான்கு பணிக்குழுக்களை உள்ளடக்கிய இந்தியா-கொரியா தொழில்துறை ஒத்துழைப்புக் குழுவிற்கான புரிந்துணர்வு ஒப்பந்தம் (MoU) கையெழுத்திடப்பட்டதை, இருதரப்பு பொருளாதார ஈடுபாட்டை வலுப்படுத்துவதற்கான ஒரு மைல்கல் நடவடிக்கையாக எடுத்துரைத்தார். இந்தியா-கொரியா வர்த்தக மன்றத்தில் இன்று மொத்தம் 16 புரிந்துணர்வு ஒப்பந்தங்கள் கையெழுத்திடப்பட்டன.
பிரதமர் திரு நரேந்திர மோடியும், ஜனாதிபதி திரு லீ ஜே மியுங்கும், அதிக முதலீடுகளை ஊக்குவிக்கவும், மேலும் பல கொரிய நிறுவனங்கள் இந்திய சந்தையில் நுழைவதை எளிதாக்கவும், இந்தியாவில் கொரியாவிற்கான ஒரு பிரத்யேகப் பகுதியாக, உடனடியாகப் பயன்படுத்தக்கூடிய உள்கட்டமைப்புடன் கூடிய ஒரு பெரிய தொழில்துறை நகரத்தை நிறுவுவது குறித்து விவாதித்ததாக திரு கோயல் மேலும் தெரிவித்தார். கடந்த மூன்றரை ஆண்டுகளில் 38 வளர்ந்த பொருளாதார நாடுகளுடன் செய்து கொள்ளப்பட்ட ஒன்பது தடையற்ற வர்த்தக ஒப்பந்தங்கள் மூலம் சாத்தியமான, இந்தியாவின் பெரிய உள்நாட்டுத் தேவையையும், உலகளாவிய மொத்த உள்நாட்டு உற்பத்தியில் கிட்டத்தட்ட மூன்றில் இரண்டு பங்கிற்கான இந்தியாவின் முன்னுரிமை அணுகலையும் கொரிய நிறுவனங்கள் பயன்படுத்திக்கொள்ள இந்த முயற்சி உதவும் என்று அவர் குறிப்பிட்டார்.
தற்போதைய 27 பில்லியன் அமெரிக்க டாலரிலிருந்து 2030-ஆம் ஆண்டுக்குள் இருதரப்பு வர்த்தகத்தை 54 பில்லியன் அமெரிக்க டாலராக இரட்டிப்பாக்க வேண்டும் என இந்தியா மற்றும் கொரியக் குடியரசின் தலைமைகள் இலக்கு நிர்ணயித்துள்ளதாகவும், இதற்கு ஆண்டுக்கு சுமார் 18% வளர்ச்சி விகிதம் தேவைப்படும் என்றும் திரு கோயல் கூறினார். இந்த இலக்கு, கூட்டாண்மையின் உண்மையான ஆற்றலை முழுமையாக வெளிப்படுத்தவில்லை என்றும் அவர் மேலும் கூறினார். அத்துடன், பொருளாதார ஒத்துழைப்பின் அடுத்தகட்டத்தை முன்னெடுத்துச் செல்வதற்கான முயற்சிகளுக்கு அவர் அழைப்பு விடுத்தார்.
மேலும் சமச்சீரான பொருளாதாரக் கூட்டாண்மையை அடைவதற்காக, வரியல்லாத தடைகளைக் களைதல், மூல விதிகளைத் தளர்த்துதல், சந்தை அணுகலை விரிவுபடுத்துதல் மற்றும் வணிகம் செய்வதை மிகவும் எளிதாக்குதல் உள்ளிட்டவற்றை உள்ளடக்கிய, விரிவான பொருளாதாரக் கூட்டாண்மை ஒப்பந்தத்தை (CEPA) மேம்படுத்துவதற்கு, இரு நாடுகளும் ஒரு விரைவுவழி, திட்டப்பணி முறையிலான அணுகுமுறையில் செயல்பட ஒப்புக்கொண்டுள்ளதாக அமைச்சர் தெரிவித்தார்.
குறைக்கடத்திகள், மின்னணுவியல், மேம்பட்ட உற்பத்தி, மின்-இயக்கம், பசுமை ஆற்றல், கப்பல் கட்டுமானம் மற்றும் டிஜிட்டல் வர்த்தகம் போன்ற துறைகள் இரு பொருளாதாரங்களுக்கும் இடையே வலுவான பரஸ்பரப் பூர்த்தித் தன்மைகளை வழங்குகின்றன என்று அவர் வலியுறுத்தினார். இந்தியாவும் கொரியாவும் கூட்டு உற்பத்தி, கூட்டு வடிவமைப்பு, கூட்டு உருவாக்கம், கூட்டுப் புத்தாக்கம் ஆகியவற்றின் மூலம் ஒத்துழைத்து, உயர்தரமான மற்றும் போட்டித்தன்மை வாய்ந்த விலையிலான தயாரிப்புகளை உலகளாவிய சந்தைகளுக்குக் கூட்டாக வழங்க முடியும் என்றும் அவர் குறிப்பிட்டார்.
இந்தியாவின் பொருளாதாரப் பயணப் பாதையை எடுத்துரைத்த திரு. கோயல், தற்போது 4 டிரில்லியன் அமெரிக்க டாலர் பொருளாதாரமாக உள்ள நாடு, தனது 100வது சுதந்திர தினத்தைக் கொண்டாடும் 2047ஆம் ஆண்டுக்குள் 30 டிரில்லியன் அமெரிக்க டாலர் பொருளாதாரத்தை எட்டும் ஒரு செயல்திட்டத்தில் உள்ளது என்று கூறினார். பெரிய மற்றும் திறமையான இளைஞர் சமூகம், 140 கோடி குடிமக்களின் அபிலாஷைகள், மற்றும் அதிகரித்து வரும் வருமானத்துடன் வேகமாக விரிவடைந்து வரும் நடுத்தர வர்க்கம் ஆகியவற்றால் உந்தப்படும் இந்த மாற்றத்தை, வணிகங்களுக்கு வாழ்நாளில் ஒருமுறை மட்டுமே கிடைக்கும் வாய்ப்பு என்று அவர் விவரித்தார்.
உலகளாவிய கொந்தளிப்புகள் இருந்தபோதிலும், துணிச்சலான சீர்திருத்தங்கள், பிரம்மாண்டமான உள்கட்டமைப்பு முதலீடுகள், மற்றும் இணக்கத்தை எளிமையாக்குதல், ஒழுங்குமுறைச் சுமைகளைக் குறைத்தல் உள்ளிட்ட, வணிகம் செய்வதை எளிதாக்கும் வலுவான கொள்கை உந்துதல் ஆகியவற்றின் காரணமாக இந்தியா ஸ்திரத்தன்மையின் சோலையாகத் திகழ்கிறது என்று அவர் மீண்டும் வலியுறுத்தினார்.
இரு நாடுகளுக்கும் இடையிலான நீண்டகால உறவை நினைவு கூர்ந்த திரு கோயல், இந்தியாவும் கொரியாவும் இரண்டாயிரம் ஆண்டுகளுக்கும் மேலாக நீடிக்கும், நம்பிக்கை, பகிரப்பட்ட ஜனநாயக விழுமியங்கள் மற்றும் வலுவான நாகரிகப் பிணைப்புகளில் வேரூன்றிய, காலத்தால் சோதிக்கப்பட்ட உறவுகளைப் பகிர்ந்து கொள்கின்றன என்று கூறினார். இந்தியாவில் கொரிய நிறுவனங்களின் வெற்றியையும், நாட்டின் வளர்ச்சிப் பயணத்திற்கு அவற்றின் பங்களிப்பையும் அவர் பாராட்டினார்.
இந்தப் பயணம் இந்தியா-கொரியா உறவுகளில் ஒரு புதிய அத்தியாயத்தின் தொடக்கமாக அமையும் என்ற நம்பிக்கையை வெளிப்படுத்திய திரு கோயல், இரு நாடுகளுக்கும் இடையிலான தொடர்ச்சியான ஒத்துழைப்பு மற்றும் பரஸ்பர செழிப்புக்குத் தனது நல்வாழ்த்துக்களைத் தெரிவித்தார்.
FICCI-யின் தலைவரும், RPG குழுமத்தின் துணைத் தலைவருமான திரு அனந்த் கோயங்கா, குறைக்கடத்திகள் மற்றும் மின்சார வாகனங்கள் முதல் டிஜிட்டல் தொழில்நுட்பங்கள் மற்றும் செயற்கை நுண்ணறிவு வரை, இந்தியாவின் அளவிலான வளர்ச்சி கொரியாவின் புத்தாக்க பலங்களுடன் தடையின்றி இணைகிறது என்று கூறினார். இரு நாடுகளும் இணைந்து, மீள்திறன் கொண்ட மற்றும் எதிர்காலத்திற்குத் தயாரான ஒரு பொருளாதார வழித்தடத்தை உருவாக்க முடியும் என்றும் அவர் குறிப்பிட்டார்.
உலகளாவிய விநியோகச் சங்கிலிகளில் நடைபெற்று வரும் மறுசீரமைப்பை எடுத்துரைத்த திரு கோயங்கா, வெளிப்புற அதிர்ச்சிகளால் அதிகம் பாதிக்கப்படாத மற்றும் நீண்டகால மீள்திறனை நோக்கிய, பன்முகப்படுத்தப்பட்ட, புதுமைகளை மையமாகக் கொண்ட ஒரு பொருளாதார வழித்தடத்தை உருவாக்குவதற்கு இந்தியாவிற்கும் கொரியாவிற்கும் ஒரு தனித்துவமான வாய்ப்பு உள்ளது என்று குறிப்பிட்டார்.
திவாஹர்