மகாராஷ்டிர மாநிலம் வார்தாவில் இன்று (ஏப்ரல் 16, 2026) நடைபெற்ற மகாத்மா காந்தி அந்தர்ராஷ்ட்ரிய ஹிந்தி விஸ்வவித்யாலயாவின் ஆறாவது பட்டமளிப்பு விழாவில் இந்தியக் குடியரசுத் தலைவர் ஸ்ரீமதி திரௌபதி முர்மு கலந்து கொண்டார்.
இந்நிகழ்ச்சியில் பேசிய குடியரசுத் தலைவர், இந்தியாவின் ஆன்மா இந்திய மொழிகள் மூலம் வெளிப்படுகிறது என்றார். கலாச்சாரம், உணர்வு மற்றும் விழிப்புணர்வு எனும் ஒற்றை நீரோடை பல்வேறு இந்திய மொழிகள் வழியே பாய்கிறது. வடகிழக்குப் பகுதி மாணவர்கள் உட்பட, நாடு முழுவதிலும் உள்ள பல்வேறு மாநிலங்களைச் சேர்ந்த மாணவர்கள் மகாத்மா காந்தி அந்தர்ராஷ்ட்ரிய ஹிந்தி விஸ்வவித்யாலயத்தில் கல்வி பயின்று வருவதை அவர் மகிழ்ச்சியுடன் குறிப்பிட்டார். மொழிகளுக்கிடையேயான இந்த உரையாடல் பாரம்பரியம், ஹிந்தி உட்பட அனைத்து இந்திய மொழிகளின் முன்னேற்றத்திற்கும் பங்களிக்கும் என்று அவர் அடிக்கோடிட்டுக் காட்டினார்.
நமது பாரம்பரியத்தில் பெருமிதம் கொள்ளுமாறு மாணவர்களுக்குக் குடியரசுத் தலைவர் அறிவுறுத்தினார். இந்தத் தேசியப் பெருமித உணர்வுடன், இரண்டு தேசிய நோக்கங்களுக்கு அவர்கள் சிறப்புக் கவனம் செலுத்த வேண்டும் என்று அவர் கூறினார். இந்த நோக்கங்கள், இந்தியத்தன்மை, நமது தேசிய அடையாளம் மற்றும் நமது சக குடிமக்கள், குறிப்பாக இளைஞர்களின் திறமை மற்றும் தன்னம்பிக்கையுடன் உள்ளார்ந்த முறையில் பிணைக்கப்பட்டுள்ளன. அவை, காலனித்துவ மனப்பான்மையின் எச்சங்களை வேரறுத்து, இந்திய அறிவுப் பாரம்பரியத்தை மீண்டும் நிலைநிறுத்துவதாகும். எந்தவொரு மொழியையும் எதிர்க்காமல், இந்திய மொழிகளில் பெருமிதம் கொள்ளுமாறு அவர் மாணவர்களுக்கு அறிவுறுத்தினார்.
தேசத்தந்தை மகாத்மா காந்தியின் பெயரில் இந்தப் பல்கலைக்கழகத்திற்குப் பெயரிடுவது முற்றிலும் பொருத்தமானது என்று குடியரசுத் தலைவர் கூறினார். இந்தப் பல்கலைக்கழகத்துடன் தொடர்புடைய அனைவரும், இந்தி மற்றும் பிற இந்திய மொழிகளின் மேம்பாட்டிற்கும் வளர்ச்சிக்கும் அசைக்க முடியாத உறுதியுடன் உழைப்பார்கள் என்று எதிர்பார்க்கப்படுகிறது. பாபுவின் கொள்கைகளைக் கடைப்பிடிப்பதன் மூலம், மகாத்மா காந்தி அந்தர்ராஷ்ட்ரிய இந்தி விஸ்வவித்யாலயத்தின் அனைத்துப் பங்குதாரர்களும் பல்கலைக்கழகத்தின் பெருமையை தொடர்ந்து உயர்த்துவார்கள் என்று அவர் நம்பிக்கை தெரிவித்தார்.
கல்வியை சுயசார்பின் அடித்தளமாகக் காந்திஜி கருதினார் என்று குடியரசுத் தலைவர் கூறினார். பெரும்பான்மையான குடிமக்களின் வாழ்க்கைத் தேவைகளுடன் இணைந்த கல்வி மட்டுமே அர்த்தமுள்ள கல்வியாக அமையும் என்று அவர் வலியுறுத்தினார். தேசிய நலனுக்குப் பயன்படாத எந்தவொரு கல்வியையும் ‘தேசியமற்ற கல்வி’ என்று அவர் குறிப்பிட்டு, அதைக் கடுமையாக விமர்சித்தார். மக்களின் உணர்வுகளைப் புரிந்துகொள்ளும் திறன், சாமானிய மக்களின் வாழ்வில் அக்கறை கொள்ளும் திறன், மற்றும் அவர்களுக்காகப் பரிந்துரைக்கும் திறன் ஆகியவற்றை அர்த்தமுள்ள கல்வியின் ஒருங்கிணைந்த பகுதியாக அவர் கருதினார். ஏறக்குறைய நூறு ஆண்டுகளுக்கு முன்பு இருந்ததைப் போலவே, கல்வி குறித்த காந்திஜியின் கருத்துக்கள் இன்றும் பயனுள்ளதாக இருக்கின்றன என்று குடியரசுத் தலைவர் சுட்டிக்காட்டினார்.
படைப்பிற்கும், தேடலுக்கும், அசல் சிந்தனை மற்றும் புத்தாக்கத்திற்கும் நமது சொந்த மொழி மட்டுமே மொழியாக விளங்க முடியும் என்று குடியரசுத் தலைவர் கூறினார். நாம் அசல் படைப்புகளை உருவாக்க வேண்டும், வெறும் நகல்களை அல்ல. வலிமையான, தன்னிறைவு பெற்ற மற்றும் வளர்ச்சிமிக்க இந்தியாவை உருவாக்க நாம் விரும்புகிறோம். அத்தகைய இந்தியாவை நனவாக்குவது இந்திய மொழிகள் எனும் அடித்தளத்தின் மீது மட்டுமே சாத்தியமாகும். ‘தேசிய கல்விக் கொள்கை’ உள்ளிட்ட பல்வேறு முயற்சிகளால், நமது தேசம் சரியான திசையில் முன்னேறி வருகிறது. மகாத்மா காந்தி அந்தர்ராஷ்ட்ரிய ஹிந்தி விஸ்வவித்யாலயத்தின் இளம் மாணவர்கள் தனிப்பட்ட வளர்ச்சியை அடைவதோடு மட்டுமல்லாமல், தேசத்தைக் கட்டியெழுப்புவதற்கும் கணிசமான பங்களிப்புகளைச் செய்து, அதன் மூலம் உலக அரங்கில் இந்தியாவின் கௌரவத்தை உயர்த்துவார்கள் என்று அவர் நம்பிக்கை தெரிவித்தார்.
எஸ்.சதிஸ் சர்மா