இந்தியக் குடியரசுத் தலைவர் திருமதி திரௌபதி முர்மு அவர்கள், மகாராஷ்டிராவின் நாக்பூரில் இன்று (ஏப்ரல் 15, 2026) நடைபெற்ற எய்ம்ஸ் நாக்பூர் பட்டமளிப்பு விழாவில் கலந்துகொண்டு சிறப்பித்துரைத்து உரையாற்றினார்.
இந்நிகழ்ச்சியில் பேசிய குடியரசுத் தலைவர், மருத்துவம் என்பது வெறும் ஒரு தொழில் மட்டுமல்ல; அது மனிதகுலத்திற்கு உணர்வுப்பூர்வமாக சேவை செய்வதற்கான ஒரு பாதை என்று கூறினார். ஒரு மருத்துவர் நோய்களுக்குச் சிகிச்சை அளிப்பது மட்டுமல்லாமல், நோயால் பாதிக்கப்பட்டவர்களின் மனதில் நம்பிக்கையையும் விதைக்கிறார். மருத்துவர்கள் வழங்கும் பரிவான ஆலோசனையானது, நோயாளிக்கு மட்டுமல்லாமல் அவர்களின் குடும்ப உறுப்பினர்களுக்கும் வலிமையை அளிக்கிறது. மருத்துவர்கள் பெரும்பாலும் சவாலான சூழ்நிலைகளை எதிர்கொள்கின்றனர்; ஆயினும், அத்தகைய சூழ்நிலைகளிலும்கூட, அவர்கள் நோயாளி மற்றும் அவர்களின் குடும்பத்தினரிடம் உணர்வுப்பூர்வமாக நடந்துகொள்ள வேண்டும். நோயாளிகளும் அவர்களது குடும்பத்தினரும்கூட, மருத்துவ நிபுணர்களை எப்போதும் மரியாதையுடன் நடத்த வேண்டும். ஒரு மருத்துவருக்கும் நோயாளிக்கும் இடையிலான நம்பிக்கைப் பிணைப்பைப் பேணுவதற்கு இது அவசியமாகும்.
குடிமக்களின் தனிப்பட்ட நலனுக்கு அவர்களின் நல்ல ஆரோக்கியம் எவ்வளவு முக்கியமோ, அதே அளவு நாட்டின் முன்னேற்றத்திற்கும் அது முக்கியம் என்று குடியரசுத் தலைவர் கூறினார். குடிமக்கள் ஆரோக்கியமாக இருப்பதையும், தேசத்தைக் கட்டியெழுப்புவதில் தங்களின் முழுத் திறனுடன் பங்களிப்பதையும் உறுதி செய்வதற்காக, இந்திய அரசு கடந்த பத்தாண்டுகளில் பல குறிப்பிடத்தக்க நடவடிக்கைகளை எடுத்துள்ளது.
நாடு முழுவதும் புதிய எய்ம்ஸ் மருத்துவமனைகள் நிறுவப்பட்டிருப்பது, மேம்பட்ட மருத்துவ சிகிச்சையைப் பெறுவதற்கான அணுகலை அதிகரித்தது மட்டுமல்லாமல், மருத்துவக் கல்விக்கான வாய்ப்புகளையும் விரிவுபடுத்தியுள்ளது என்று குடியரசுத் தலைவர் கூறினார். நிறுவப்பட்ட சில ஆண்டுகளிலேயே, நாக்பூர் எய்ம்ஸ் மருத்துவக் கல்வி, ஆராய்ச்சி மற்றும் சிறந்த சுகாதார சேவைகளுக்கான ஒரு முன்னணி மையமாகத் தன்னை நிலைநிறுத்திக் கொண்டிருப்பதைக் கண்டு அவர் மகிழ்ச்சி தெரிவித்தார்.
சுகாதாரத் துறையில் விரைவான மாற்றங்கள் நிகழும் காலம் இது என்று குடியரசுத் தலைவர் கூறினார். செயற்கை நுண்ணறிவு, டிஜிட்டல் சுகாதார சேவைகள் மற்றும் மேம்பட்ட ஆராய்ச்சி போன்ற புதிய தொழில்நுட்பங்கள் மூலம், உலகம் முழுவதும் மருத்துவத் துறையில் முன்னெப்போதும் இல்லாத முன்னேற்றம் ஏற்பட்டு வருகிறது. இந்த மாற்றங்களை ஏற்றுக்கொண்டு நாம் முன்னோக்கிச் செல்ல வேண்டும். கிராமப்புற மற்றும் நகர்ப்புறங்களுக்கு இடையேயான சுகாதார வசதிகளில் உள்ள ஏற்றத்தாழ்வுகளைக் குறைப்பதற்கும், தரமான சுகாதாரம் அனைவரையும் சென்றடைவதை உறுதி செய்வதற்கும் தொழில்நுட்ப வளர்ச்சிகளைப் பயன்படுத்திக் கொள்ள வேண்டும். எய்ம்ஸ் நாக்பூர் இந்தத் திசையில் தொடர்ந்து செயல்பட்டு வருவதைக் கண்டு அவர் மகிழ்ச்சி தெரிவித்தார்.
திவாஹர்