இந்தியக் குடியரசுத் தலைவர் திருமதி திரௌபதி முர்மு அவர்கள், டாக்டர் பி.ஆர். அம்பேத்கர் அவர்களின் பிறந்தநாளை முன்னிட்டு, இன்று (ஏப்ரல் 14, 2026) குஜராத் மாநிலம் காந்திநகரில் உள்ள லோக் பவனில் நடைபெற்ற ‘சமூகப் பாதுகாப்பு மகோத்சவ’ விழாவில் கலந்துகொண்டு சிறப்பித்தார்.
இந்நிகழ்ச்சியில் பேசிய குடியரசுத் தலைவர், நன்றியுணர்வுள்ள தேசத்தின் சார்பாக பாரத ரத்னா பாபாசாகேப் டாக்டர் பி.ஆர். அம்பேத்கர் அவர்களுக்குத் தனது பணிவான புகழஞ்சலியைச் செலுத்தினார். நாட்டின் முன்னேற்றத்திற்கும், நமது அரசியலமைப்புச் சட்டத்தை உருவாக்கியது உட்பட சமூக நீதித் துறையிலும் பாபாசாகேப் பன்முகப் பங்களிப்புகளைச் செய்துள்ளார் என்று அவர் கூறினார். ஒரு சட்ட வல்லுநர், பொருளாதார நிபுணர் மற்றும் சமூக சீர்திருத்தவாதியாக பாபாசாகேப்பின் பங்களிப்புகள் விரிவாக விவாதிக்கப்பட்டுள்ளன என்று அவர் அடிக்கோடிட்டுக் காட்டினார். இருப்பினும், வங்கி அமைப்பு, நீர்ப்பாசன உள்கட்டமைப்பு, மின்சாரக் கட்டமைப்பு, தொழிலாளர் மேலாண்மை கட்டமைப்பு மற்றும் மத்திய, மாநில அரசுகளுக்கு இடையேயான வருவாய் பகிர்வு முறை ஆகிய துறைகளில் அவரது பணிகள் குறித்த விரிவான தகவல்களைப் பரப்புவதன் மூலம், ஒரு தேசத்தைக் கட்டியெழுப்பியவராக அவரது குறிப்பிடத்தக்க பங்களிப்புகளைப் பற்றி குடிமக்கள் ஒரு முழுமையான புரிதலைப் பெற முடியும்.
பாபாசாகேப் எப்போதும் கல்வியின் முக்கியத்துவத்தை வலியுறுத்தி வந்தார் என்று ஜனாதிபதி கூறினார். நமது அரசியலமைப்பில், கல்விக்கு அடிப்படை உரிமை அந்தஸ்து வழங்கப்பட்டுள்ளதுடன், விளிம்புநிலை சமூகங்களைச் சேர்ந்த மாணவர்களின் நலன்களைப் பாதுகாப்பதற்காக உயர்கல்வி நிறுவனங்களில் ஏற்பாடுகளும் செய்யப்பட்டுள்ளன. இந்த விளிம்புநிலை சமூகங்களைச் சேர்ந்த மக்களைக் கல்வி கற்க ஊக்குவிப்பது அனைவரின் கூட்டுப் பொறுப்பாகும். முழுமையான கல்வி, குறிப்பாக அறக்கல்வியின் மூலம் சமூக நல்லிணக்க உணர்வு வலுப்படுத்தப்படுகிறது.
அனைத்து உயிரினங்கள் மீதான கருணையும் சமூக நல்லிணக்கமும் இயல்பிலேயே ஒன்றையொன்று பூர்த்தி செய்பவை என்று குடியரசுத் தலைவர் கூறினார். அனைவரின் நலனும் சமூகத்தின் ஒற்றுமையும் உள்ளார்ந்து ஒன்றோடொன்று பிணைந்துள்ளன. தனிநபர்கள் சாதி, வர்க்கம், மொழி, பிராந்தியம் ஆகிய பிரிவுகளைக் கடந்து, பாகுபாடின்றி சமத்துவக் கொள்கையை நிலைநிறுத்தும்போது உண்மையான நல்லிணக்கம் பிரதிபலிக்கிறது. அன்னை இந்தியாவின் அனைத்துப் பிள்ளைகளும் ஒன்றே—ஆன்மாவில் ஒன்றுபட்டவர்கள் மற்றும் நல்லிணக்கம் எனும் பொதுவான உணர்வால் பிணைக்கப்பட்டவர்கள்.
நமது நாட்டின் முழுமையான, அனைவரையும் உள்ளடக்கிய மற்றும் சமத்துவமான வளர்ச்சிக்கு நல்லிணக்க உணர்வு இன்றியமையாதது என்று குடியரசுத் தலைவர் கூறினார். குஜராத்தில் மரம் நடுதல், சுகாதாரம், கால்நடை வளர்ப்பு, வேளாண் மேம்பாடு மற்றும் பொது நலத் திட்டங்கள் போன்ற முன்னெடுப்புகள் மூலம் சமூக நல்லிணக்கம் வலுப்படுத்தப்பட்டு வருவதை அவர் மகிழ்ச்சியுடன் குறிப்பிட்டார்.
சமூக நல்லிணக்கத்தைப் பொறுத்தவரையில், அரசியல் நிர்ணய சபையில் பாபாசாகேப் அம்பேத்கர் ஆற்றிய நிறைவுரையில் உள்ள ஒரு முக்கியச் செய்தி என்றென்றும் பொருத்தமானதாக நிலைத்திருக்கும் என்று குடியரசுத் தலைவர் கூறினார். அவரைப் பொறுத்தவரை, சமூக ஜனநாயகம் என்பது சுதந்திரம், சமத்துவம் மற்றும் சகோதரத்துவம் ஆகியவற்றைத் தனது அடிப்படைக் கொள்கைகளாகக் கொண்ட ஒரு வாழ்க்கை முறையாகும்.
திவாஹர்