இந்தியக் குடியரசுத் தலைவர் திருமதி திரௌபதி முர்மு அவர்கள், இன்று (ஏப்ரல் 13, 2026) குஜராத்தின் ராஜ்கோட்டில் நடைபெற்ற எய்ம்ஸ் ராஜ்கோட்டின் முதல் பட்டமளிப்பு விழாவில் கலந்துகொண்டு சிறப்பித்துரைத்து உரையாற்றினார்.
இந்நிகழ்ச்சியில் பேசிய குடியரசுத் தலைவர், உலகத் தரம் வாய்ந்த மூன்றாம் நிலை சுகாதார சேவைகளை மலிவு விலையில் வழங்குவதற்காக நாடு முழுவதும் பல எய்ம்ஸ் மருத்துவமனைகள் நிறுவப்பட்டுள்ளன என்றார். தரமான மருத்துவக் கல்வியை வழங்குவதிலும், ஆராய்ச்சி மற்றும் புத்தாக்கத்தை வளர்ப்பதிலும், பொது சுகாதார முன்னெடுப்புகளை மேற்கொள்வதிலும், தேசிய சுகாதாரக் கொள்கைகளை வகுப்பதிலும் அவை முக்கியப் பங்காற்றி வருகின்றன. புதுமையான ஆராய்ச்சி மற்றும் நோயாளிப் பராமரிப்பு மூலம் சுகாதாரத்துறையை மேம்படுத்துவதில் எய்ம்ஸ் மருத்துவமனைகளின் அர்ப்பணிப்பு பாராட்டுக்குரியது என்றும் அவர் கூறினார்.
எய்ம்ஸ் ராஜ்கோட் ஒரு புதிய நிறுவனம் என்று தலைவர் கூறினார். மருத்துவக் கல்வி, ஆராய்ச்சி மற்றும் சேவை ஆகிய துறைகளில் இதற்கு இன்னும் நீண்ட பயணம் உள்ளது. எய்ம்ஸின் முக்கிய இலக்குகளை மட்டுமல்லாமல், இப்பகுதியில் நிலவும் குறிப்பிட்ட சுகாதார சவால்களுக்கான தீர்வுகளையும் தங்கள் நோக்கங்களில் இணைத்துக்கொள்ளுமாறு எய்ம்ஸ் ராஜ்கோட்டின் கொள்கை வகுப்பாளர்களை அவர் வலியுறுத்தினார். எந்தவொரு அமைப்பின் ஆரோக்கியமான வளர்ச்சிக்கும் நல்லாட்சி ஒரு முக்கியப் பங்காற்றுகிறது என்பதை அவர் அடிக்கோடிட்டுக் காட்டினார். நல்லாட்சியையும் வெளிப்படைத்தன்மையையும் உறுதி செய்வதற்காக ஆரம்பத்திலேயே எடுக்கப்படும் நடவடிக்கைகள், இந்த நிறுவனத்தின் வளர்ச்சியில் நீண்டகால தாக்கத்தை ஏற்படுத்தும்.
மருத்துவத் தொழில் என்பது வெறும் ஒரு தொழில் மட்டுமல்ல; அது மனிதகுலத்திற்குச் சேவை செய்வதற்கான ஒரு அர்ப்பணிப்புமாகும் என்று குடியரசுத் தலைவர் கூறினார். இத்தொழிலுக்கு அறிவியல் அறிவு மட்டுமல்லாமல், உணர்திறன், பொறுமை மற்றும் பணிவும் தேவைப்படுகிறது. மருத்துவர்கள் அணியும் வெள்ளைக் கோட், நோய் மற்றும் நிச்சயமற்ற தருணங்களில் சமூகம் அவர்கள் மீது வைக்கும் நம்பிக்கையின் சின்னமாகும் என்று அவர் குறிப்பிட்டார். இந்த நம்பிக்கையைக் காக்கும் பொறுப்பு மருத்துவர்களின் தோள்களில் உள்ளது.
மருத்துவத் துறையில் தொழில்நுட்ப முன்னேற்றங்கள் முன்னெப்போதும் இல்லாத வேகத்தில் நிகழ்ந்து வருவதாக ஜனாதிபதி கூறினார். செயற்கை நுண்ணறிவு, ரோபோட்டிக்ஸ், துல்லிய மருத்துவம் மற்றும் டிஜிட்டல் சுகாதார சேவைகள் ஆகியவை மருத்துவ உலகின் நிலப்பரப்பையும் அதன் ஆற்றலையும் வேகமாக மாற்றி வருகின்றன. பட்டம் பெறும் மாணவர்கள் இந்த மாற்றங்களை ஏற்றுக்கொள்ளத் தயாராக இருக்க வேண்டும் என்று அவர் அறிவுறுத்தினார். சமீபத்திய தொழில்நுட்பங்களைப் பின்பற்றுவதன் மூலம், அவர்கள் தங்கள் அறிவையும் திறன்களையும் மேம்படுத்துவதோடு மட்டுமல்லாமல், நோய்களுக்கு மிகவும் திறம்பட சிகிச்சையளிக்கவும் முடியும் என்று அவர் கூறினார். இருப்பினும், மருத்துவத்தில் மனித அனுதாபத்தின் பங்கை ஒருபோதும் மாற்ற முடியாது. ஒரு மருத்துவரின் மென்மையான வார்த்தைகள், நம்பிக்கையூட்டும் புன்னகை மற்றும் உண்மையாகக் கேட்கும் பொறுமை ஆகியவை, மருந்தால் மட்டும் குணப்படுத்த முடியாத வழிகளில் பெரும்பாலும் குணப்படுத்தும்.
ஒரு நல்ல மருத்துவராக இருப்பது ஒரு குறிப்பிடத்தக்க சாதனை என்று ஜனாதிபதி கூறினார். இருப்பினும், நேர்மை, கருணை மற்றும் நற்பண்பு போன்ற மனித விழுமியங்களைக் கொண்ட ஒரு மருத்துவராக இருப்பது அதைவிடப் பெரிய சாதனையாகும். திறமையான மற்றும் சமூக அக்கறை கொண்ட மருத்துவர்களுக்கு, சமூகத்தில் ஆழமான மாற்றத்தைக் கொண்டுவரும் சக்தி உண்டு என்று அவர் குறிப்பிட்டார். தங்கள் பதவியை ஆக்கப்பூர்வமாகப் பயன்படுத்தி, தேசத்தைக் கட்டியெழுப்புவதில் முக்கியப் பங்காற்ற வேண்டும் என்று அவர் அவர்களுக்கு அறிவுறுத்தினார்.
2047-ஆம் ஆண்டிற்குள் விக்சித் பாரத் என்ற இலக்கை அடைவதில் குடிமக்களின் நல்ல ஆரோக்கியம் ஒரு முக்கிய காரணியாகும் என்று குடியரசுத் தலைவர் கூறினார். இந்திய அரசு தனது குடிமக்களுக்குத் தரமான சுகாதார சேவைகள் கிடைப்பதை உறுதி செய்வதற்காகப் பல நடவடிக்கைகளை எடுத்துள்ளது. இந்த முயற்சிகள் ஏற்கெனவே நேர்மறையான பலன்களைத் தந்து வருகின்றன. இருப்பினும், சம்பந்தப்பட்ட அனைத்துத் தரப்பினரும் ஒன்றுபட்டு முன்னேறும்போது இந்த முன்னெடுப்புகள் மேலும் பெரும் உத்வேகத்தைப் பெறும். இந்தச் சூழலில், எய்ம்ஸ் போன்ற தேசிய முக்கியத்துவம் வாய்ந்த நிறுவனங்களின் பங்கு இன்னும் முக்கியமானதாகிறது. மருத்துவ ஆராய்ச்சி மற்றும் புத்தாக்கத்தில் புதிய அளவுகோல்களை நிறுவுவதன் மூலம் நாட்டின் சுகாதாரத் துறைக்கு வழிகாட்டும் பொறுப்பு அவற்றுக்கு வழங்கப்பட்டுள்ளது. சமமான மற்றும் அனைவருக்கும் கிடைக்கக்கூடிய சுகாதாரப் பாதுகாப்பு என்ற தேசிய நோக்கத்தை நனவாக்குவதில் எய்ம்ஸ் ராஜ்கோட் தனது குறிப்பிடத்தக்க பங்களிப்பின் மூலம் புதிய அளவுகோல்களை அமைக்கும் என்று அவர் நம்பிக்கை தெரிவித்தார்.
எம்.பிரபாகரன்