பிரதமர் திரு நரேந்திர மோடி அவர்கள் இன்று பனஸ்கந்தா மாவட்டத்தின் வாவ்-தரத் என்ற இடத்தில் நடைபெற்ற பொதுக்கூட்டத்தில் உரையாற்றினார். அங்கு அவர், வட குஜராத்திற்கான சுமார் ₹20,000 கோடி மதிப்பிலான வளர்ச்சித் திட்டங்களைத் தொடங்கி வைத்து, அடிக்கல் நாட்டினார். புனித நவராத்திரி விழா சமீபத்தில் நிறைவடைந்ததையும், இன்று பகவான் மகாவீர் ஜெயந்தியும் அனுசரிக்கப்படுவதையும் குறிப்பிட்ட பிரதமர், மா அம்பாஜி மற்றும் பகவான் ஸ்ரீ தரணிதர்ஜி ஆகியோருக்குத் தமது மரியாதையைச் செலுத்தினார்.
ஒரு காலத்தில் வட குஜராத் அனுபவித்த வறட்சி, கடுமையான தண்ணீர் பற்றாக்குறை போன்ற பல தசாப்த கால இன்னல்களை நினைவு கூர்ந்த பிரதமர், பெண்கள் தண்ணீர் எடுக்க கிலோமீட்டர் கணக்கில் நடக்க வேண்டியிருந்த காலத்தையும், விவசாயிகளுக்குத் தங்கள் உழைப்புக்கு நியாயமான ஊதியம் கிடைக்காத காலத்தையும் பற்றிப் பேசினார். தங்கள் தலைவிதியை மாற்றிக்கொள்ளத் தீர்மானித்த குஜராத் மக்களின் மன உறுதியைப் பாராட்டிய அவர், சுஜலாம் சுஃபலாம் திட்டம் மற்றும் நர்மதா நீர் விரிவாக்கம் ஆகியவற்றை மாற்றத்தை ஏற்படுத்திய தலையீடுகளாக முன்னிலைப்படுத்தினார். “இன்று, இங்குள்ள விவசாயி ஒரே ஒரு பயிரை மட்டும் சார்ந்திருக்கவில்லை; பனஸ்கந்தா ஒரு முன்னணி உருளைக்கிழங்கு உற்பத்தியாளராக உருவெடுத்திருப்பதே இதற்கு ஒரு சிறந்த எடுத்துக்காட்டு,” என்று பிரதமர் மோடி திட்டவட்டமாகக் கூறினார்.
குஜராத்தின் தொடர்ச்சியான 25 ஆண்டுகால வளர்ச்சிப் பயணத்தைக் கொண்டாடும் வகையில், அம்மாநிலம் எவ்வாறு தொடர்ந்து தனது சொந்த சாதனைகளைப் படைத்து, அவற்றையும் தாண்டிச் சென்றுள்ளது என்பதைப் பிரதமர் குறிப்பிட்டார். 2005-ஆம் ஆண்டில் ₹650 கோடி பட்ஜெட்டுடன் தொடங்கப்பட்ட ‘நகர்ப்புற வளர்ச்சி ஆண்டு’ தற்போது ₹33,000 கோடிக்கும் அதிகமாக வளர்ந்துள்ளதை அவர் நினைவு கூர்ந்தார். 9 புதிய மாநகராட்சிகளுக்கான ₹2,300 கோடி மதிப்பிலான சுமார் 300 திட்டங்களுக்கு ஒப்புதல் அளிக்கப்பட்டதையும், 72 நகராட்சிகள் தரம் உயர்த்தப்பட்டதையும், ₹4 லட்சம் கோடியைத் தாண்டிய மாநில பட்ஜெட்டையும் சுட்டிக்காட்டி, வளர்ச்சி ஒவ்வொரு கிராமம், நகரம் மற்றும் மாநகரத்தையும் சென்றடையும் என்று அவர் உறுதியளித்தார். “பஞ்சாயத்து முதல் நாடாளுமன்றம் வரை உங்கள் நம்பிக்கை இருக்கும் வரை, வளர்ச்சி எனும் அதிவேக ரயில் இதே வேகத்தில் தொடர்ந்து ஓடிக்கொண்டிருக்கும்,” என்று திரு மோடி உறுதிப்படுத்தினார்.
உலகளாவிய நிலைமை குறித்துப் பேசிய பிரதமர், பல நாடுகள் போர், ஸ்திரத்தன்மையின்மை மற்றும் விண்ணை முட்டும் எரிபொருள் விலை உயர்வு ஆகியவற்றால் தவித்துவரும் வேளையிலும், வல்லரசு நாடுகளில்கூட டீசல் மற்றும் பெட்ரோல் விலைகள் 10 முதல் 25 சதவீதம் வரை உயர்ந்துள்ள நிலையிலும், இந்தியா தனது வெற்றிகரமான வெளியுறவுக் கொள்கை மற்றும் மக்களின் ஒற்றுமையின் மூலம் நிலைமையைக் கட்டுப்பாட்டில் வைத்திருக்கிறது என்று குறிப்பிட்டார்.
கோவிட் பெருந்தொற்றின் போது தேசம் காட்டிய ஒன்றுபட்ட செயல்பாட்டை நினைவு கூர்ந்த பிரதமர், தற்போதைய சவாலான காலங்களிலும் குடிமக்கள் ஒன்றுபட்டு நிற்க வேண்டும் என்று வலியுறுத்தினார். “உலகம் போராடிக் கொண்டிருக்கும் வேளையில், இந்தியா ஸ்திரத்தன்மையைப் பேணி வருவது மட்டுமல்லாமல், ஒவ்வொரு நாளும் வளர்ச்சிப் பாதையில் முன்னேறி வருகிறது. இன்றைய திட்டங்கள் இந்த உறுதிப்பாட்டிற்கு மற்றொரு எடுத்துக்காட்டாகும்,” என்று பிரதமர் மோடி கூறி முடித்தார்.
எஸ்.சதிஸ் சர்மா