கேமரூனின் யவுண்டே நகரில் நடைபெற்ற 14 வது உலக வர்த்தக அமைப்பின் அமைச்சர்கள் மாநாட்டின் ஒரு பகுதியாக , மத்திய வர்த்தகம் மற்றும் தொழில்துறை அமைச்சர் திரு பியூஷ் கோயல், இங்கிலாந்து வர்த்தகம் மற்றும் வர்த்தகத் துறை இணைச் செயலாளர் திரு பீட்டர் ஜே கைல் அவர்களுடன் இருதரப்பு சந்திப்பை நடத்தினார். இரு தரப்பினரும் MC-14 நிகழ்ச்சி நிரல் குறித்து கருத்துக்களைப் பரிமாறிக்கொண்டனர். மேலும், பிரதமர் திரு நரேந்திர மோடி மற்றும் பிரதமர் திரு கெய்ர் ஸ்டார்மர் ஆகியோரால் ஜூலை 2025-ல் கையெழுத்திடப்பட்ட இந்தியா-இங்கிலாந்து CETA ஒப்பந்தத்தின் செயலாக்கத்தில் ஏற்பட்டுள்ள முன்னேற்றத்தையும் ஆய்வு செய்தனர். இருதரப்பு வர்த்தகம் மற்றும் பொருளாதார ஒத்துழைப்பை மேலும் மேம்படுத்துவதற்கான வழிகளையும் இரு அமைச்சர்களும் ஆராய்ந்தனர்.
இந்தியா-இங்கிலாந்து CETA-வின் செயலாக்கம் குறித்துப் பேசிய திரு. கோயல், இந்தியா-இங்கிலாந்து தடையற்ற வர்த்தக ஒப்பந்தத்திற்கான (FTA) அனைத்து உள்நாட்டு ஒப்புதல்கள் மற்றும் அங்கீகார செயல்முறைகளை இந்தியா முடித்துவிட்டதாக எடுத்துரைத்தார். இங்கிலாந்தும் இந்தியா-இங்கிலாந்து CETA-விற்கு நாடாளுமன்ற ஒப்புதலைப் பெற்றுவிட்டதாக திரு. கைல் தெரிவித்தார். இரு தரப்பினரும் ஒப்புக்கொள்ளப்பட்ட காலக்கெடுவின்படி இந்தியா-இங்கிலாந்து CETA நடைமுறைக்கு வருவதை எதிர்பார்த்தனர். சம்பந்தப்பட்ட பங்குதாரர்களால் இந்தியா-இங்கிலாந்து CETA-வின் பயன்பாட்டை மேம்படுத்தும் ஒரு பகுதியாக, CETA-வின் பலன்கள் இந்தியா முழுவதும் உள்ள வணிகங்களைச் சென்றடைவதை உறுதிசெய்ய, மக்களைச் சென்றடையும் திட்டங்களின் முக்கியத்துவத்தை திரு. கோயல் வலியுறுத்தினார். இந்தச் சூழலில், ஸ்காட்லாந்து மற்றும் மான்செஸ்டரில் நடைபெறும் சந்திப்புகள் உட்பட, வணிகக் குழுக்கள் மற்றும் பிராந்திய அளவிலான மக்களைச் சென்றடையும் செயல்பாடுகளை ஏற்பாடு செய்வதற்கான திட்டங்களையும் திரு. கைல் எடுத்துரைத்தார்.
இருதரப்பு வர்த்தக உறவுகளை மேலும் மேம்படுத்துவதற்கான ஆய்வுகளின் ஒரு பகுதியாக, கிராமப்புற மாற்றம் தொடர்பான முன்னெடுப்புகள் உட்பட, இந்தியாவின் பல்வேறு துறைகள் மற்றும் பிராந்தியங்களில் உள்ள முதலீடு மற்றும் கூட்டாண்மை வாய்ப்புகளை ஆராயுமாறு இங்கிலாந்து வணிக நிறுவனங்களுக்கு திரு கோயல் அழைப்பு விடுத்தார்.
MC-14 நிகழ்ச்சி நிரல் தொடர்பாக, திரு கோயலும் திரு கைலும், உலக வர்த்தக அமைப்பின் சீர்திருத்தங்கள், மின்னணுப் பரிமாற்றங்கள் மீதான சுங்க வரிகளுக்கான தற்காலிகத் தடை மற்றும் டிரிப்ஸ் ஒப்பந்தத்தின் கீழ் மீறாமை மற்றும் சூழ்நிலைப் புகார்களுக்கான தற்காலிகத் தடை உள்ளிட்ட உலக வர்த்தக அமைப்புக்குள் உருவாகி வரும் வர்த்தகப் பேச்சுவார்த்தைகளில் அனைவரையும் உள்ளடக்கிய தன்மையைப் பேணுவதற்கு ஒப்புக்கொண்டனர்.
எஸ்.சதிஸ் சர்மா