தற்கால உலக ஒழுங்கின் நிச்சயமற்ற தன்மைகளுக்கு மத்தியில் ஒரு வலுவான தயார்நிலையைப் பேணுவதற்கு, தொழில்நுட்ப சுறுசுறுப்பு, மூலோபாய தொலைநோக்குப் பார்வை மற்றும் நிறுவனப் புத்தாக்கம் ஆகியவற்றின் அவசியத்தை பாதுகாப்பு அமைச்சர் திரு ராஜ்நாத் சிங் வலியுறுத்தியுள்ளார். ஜூன் 20, 2026 அன்று மேகாலயாவின் ஷில்லாங்கில் உள்ள கிழக்கு விமானப்படைத் தலைமையகத்தில் வீரர்களுடன் கலந்துரையாடிய பாதுகாப்பு அமைச்சர், போரின் தொடர்ச்சியாக மாறிவரும் தன்மையில் கலப்பு அச்சுறுத்தல்கள், இணையவழி சவால்கள், தகவல் போர், தளவாடங்களின் மீள்திறன், விநியோகச் சங்கிலிப் பாதுகாப்பு மற்றும் ட்ரோன்கள் ஆகியவை முக்கிய கூறுகளாக உருவாகி வருவதாகவும், இத்தகைய சூழ்நிலையில், பாதுகாப்புப் படைகளுக்கு பாரம்பரிய தயார்நிலை மட்டும் போதுமானதாக இருக்காது என்றும் உறுதிப்படுத்தினார்.
தனது சொந்த நிபந்தனைகளின்படி தேசிய பாதுகாப்பை உறுதி செய்ய, இந்தியா தற்சார்பை அடைய வேண்டியதன் அவசியத்தை திரு ராஜ்நாத் சிங் மீண்டும் வலியுறுத்தினார். பிரதமர் திரு நரேந்திர மோடி தலைமையிலான நாட்டின் தற்சார்பு முயற்சிகளால், ‘ஆபரேஷன் சிந்தூர்’ ஒரு வரலாற்று வெற்றியாக அமைந்தது என்று அவர் கூறினார். “ஆபரேஷன் சிந்தூர் மூலம், இந்தியா தனது பாதுகாப்பு மற்றும் இறையாண்மையில் சமரசம் செய்துகொள்ளாது என்பதை பயங்கரவாதிகளுக்கும் அவர்களின் இயக்கத்தினருக்கும் நாங்கள் நிரூபித்துள்ளோம். நமது பாதுகாப்புப் படைகளின் திறன், விழிப்புணர்வு மற்றும் உறுதியான தீர்மானம் ஆகியவை இந்தியாவின் வளர்ந்து வரும் வலிமையை உலகிற்கு மீண்டும் ஒருமுறை வெளிப்படுத்தியுள்ளன. கிழக்கு விமானப்படை போன்ற அமைப்புகள் இந்த பரந்த தேசிய தொலைநோக்குப் பார்வையில் செயல்திறன் மிக்க பங்காளிகளாக உருவெடுத்துள்ளன,” என்று அவர் மேலும் கூறினார்.
இந்தியாவின் கிழக்கு எல்லைப் பகுதியின் பாதுகாப்பிற்கு இன்றியமையாத தூண் என கிழக்கு விமானப்படையைக் குறிப்பிட்ட பாதுகாப்பு அமைச்சர், தேசிய பாதுகாப்பை வலுப்படுத்துவதில் அது ஆற்றிவரும் முக்கியப் பங்கைப் பாராட்டினார். “போர்க்களத்திலோ, அமைதிக்காலப் பணிகளிலோ, பேரிடர் மீட்புப் பணிகளிலோ, உயரமான மலைப்பகுதி நடவடிக்கைகளிலோ, அல்லது எல்லை மேலாண்மையிலோ, கிழக்கு விமானப்படை ஒவ்வொரு சூழ்நிலையிலும் தனது தொழில்முறைத் திறனையும், துணிவையும், அர்ப்பணிப்பையும் தொடர்ச்சியாக வெளிப்படுத்தியுள்ளது,” என்று அவர் கூறினார்.
கடுமையான மற்றும் சவாலான சூழ்நிலைகளுக்கு மத்தியிலும் தங்கள் கடமைகளைத் திறம்பட ஆற்றிய வீரர்களை திரு ராஜ்நாத் சிங் பாராட்டினார். “உங்கள் தியாகங்கள், அர்ப்பணிப்பு மற்றும் கடமையுணர்வின் காரணமாகவே குடிமக்கள் பாதுகாப்பான வாழ்க்கையை வாழ முடிகிறது. மேலும், நாடு எப்போதெல்லாம் இயற்கை பேரழிவையோ அல்லது நெருக்கடியையோ சந்திக்கிறதோ, அப்போதெல்லாம் உதவி வழங்க முன்வருபவர்கள் நீங்கள்தான். மனிதகுலத்திற்கும் நாட்டிற்கும் சேவை செய்வதில் உள்ள இந்த அர்ப்பணிப்பே உங்கள் உண்மையான அடையாளத்தை வரையறுக்கிறது. உங்கள் சேவைக்கு தேசம் என்றென்றும் கடன்பட்டிருக்கும்,” என்று அவர் கூறினார்.
கிழக்கு விமானப்படை கட்டளையகத்தின் செயல்பாட்டுப் பகுதியின் முக்கியத்துவத்தை வலியுறுத்திக் கூறிய பாதுகாப்பு அமைச்சர், வடகிழக்கு என்பது வெறும் புவியியல் எல்லைகளின் ஒரு பகுதி மட்டுமல்ல; அது இந்தியாவின் பாதுகாப்பு, செழிப்பு மற்றும் மூலோபாய வலிமையின் ஒரு முக்கியத் தூண் ஆகும் என்றார். மேலும், இப்பகுதி இந்தியாவின் ‘கிழக்கு நோக்கிய கொள்கை’யின் ஒரு முக்கிய அங்கமாகும் என்றும் அவர் குறிப்பிட்டார். “இன்று, உலக அரங்கில் இந்தியா தனது பங்கை வலுப்படுத்தி வருவதால், வடகிழக்கின் முக்கியத்துவம் மேலும் அதிகரித்துள்ளது,” என்று அவர் கூறினார்.
பாதுகாப்புப் படைகளைத் தேசிய ஒற்றுமையின் சின்னம் என வர்ணித்து, திரு ராஜ்நாத் சிங் தனது உரையை நிறைவு செய்தார். பல்வேறுபட்ட கருத்துக்கள் தழைத்தோங்கும், போற்றப்படும் விழுமியங்கள் நிலைத்திருக்கும், பரஸ்பர மரியாதை இயல்பாக வேரூன்றும் ஒரு கலாச்சாரத்தை வீரர்கள் பிரதிபலிக்கிறார்கள் என்று அவர் குறிப்பிட்டார். “பாதுகாப்புப் படைகளில் பெண்களின் அதிகரித்து வரும் பங்களிப்பு என்பது வெறும் நிறுவன ரீதியான முன்னேற்றத்தை விட மேலானது. இந்தியா உலகெங்கிலும் அறியப்படும் கலாச்சார விழுமியங்களுக்கு இது ஒரு சான்றாகும். நாம் நவீனத்துவத்தைத் தழுவினாலும், நமது கலாச்சாரம் அதன் அடிப்படைக் கொள்கைகளில் உறுதியாக நிலைத்திருக்கிறது என்பதை இது காட்டுகிறது,” என்று அவர் மேலும் கூறினார்.
விமானப் படைத் தலைமைத் தளபதி ஏர் சீஃப் மார்ஷல் ஏ.பி. சிங், கிழக்கு விமானப் படைத் தளத்தின் தலைமைத் தளபதி ஏர் மார்ஷல் இந்தர்பால் சிங் வாலியா மற்றும் இந்திய விமானப் படையின் பிற மூத்த அதிகாரிகள் இந்நிகழ்ச்சியில் கலந்துகொண்டனர்.
பாதுகாப்பு அமைச்சர், 2026 ஜூன் 21 அன்று கிழக்கு விமானப்படைத் தலைமையகத்தில் படையினருடன் சர்வதேச யோகா தினத்தைக் கொண்டாடுவார்.
எம்.பிரபாகரன்