நீலகிரி வகையின் (திட்டம் 17A) ஆறாவது கப்பலும், மசாகான் டாக் ஷிப் பில்டர்ஸ் லிமிடெட் (MDSL) நிறுவனத்தில் கட்டப்பட்ட இவ்வகையின் நான்காவது கப்பலுமான மகேந்திரகிரி (யார்டு 12654), 2026 ஏப்ரல் 30 அன்று மும்பையில் உள்ள MDSL-ல் இந்திய கடற்படைக்கு ஒப்படைக்கப்பட்டது . போர்க்கப்பல் வடிவமைப்பு மற்றும் கட்டுமானத்தில் தன்னிறைவு அடைவதில் இந்த ஒப்படைப்பு ஒரு குறிப்பிடத்தக்க மைல்கல்லைக் குறிக்கிறது.
புராஜெக்ட் 17A போர்க்கப்பல்கள், கடல்சார் களத்தில் தற்போதைய மற்றும் வளர்ந்து வரும் சவால்களை எதிர்கொள்ளும் வகையில் வடிவமைக்கப்பட்ட, பல்துறை மற்றும் பன்முகப் பணிகளைச் செய்யும் தளங்களாகும். இந்த அதிநவீன போர்க்கப்பல், கடற்படை வடிவமைப்பு, மறைந்திருந்து தாக்கும் திறன், தாக்குதல் ஆற்றல், தானியக்கம் மற்றும் தப்பிப்பிழைக்கும் திறன் ஆகியவற்றில் ஒரு பெரும் பாய்ச்சலைப் பிரதிபலிப்பதோடு, போர்க்கப்பல் கட்டுமானத்தில் தற்சார்பின் போற்றத்தக்க சின்னமாகவும் திகழ்கிறது.
போர்க்கப்பல் வடிவமைப்புப் பணியகத்தால் (WDB) வடிவமைக்கப்பட்டு , போர்க்கப்பல் மேற்பார்வைக் குழுவின் (மும்பை) மேற்பார்வையில் உருவாக்கப்பட்ட P17A ரகப் போர்க்கப்பல்கள், உள்நாட்டு கப்பல் வடிவமைப்பு, மறைந்திருந்து தாக்கும் திறன், தாக்குப்பிடிக்கும் ஆற்றல் மற்றும் போர்த் திறன் ஆகியவற்றில் ஒரு தலைமுறைப் பாய்ச்சலைப் பிரதிபலிக்கின்றன. ஒருங்கிணைந்த கட்டுமானம் என்ற தத்துவத்தின் உந்துதலால், இக்கப்பல் திட்டமிடப்பட்ட காலக்கெடுவிற்குள் கட்டப்பட்டு ஒப்படைக்கப்பட்டது.
பி17 (ஷிவாலிக்-வகுப்பு) கப்பல்களுடன் ஒப்பிடுகையில், பி17ஏ கப்பல்களில் மேம்பட்ட ஆயுதம் மற்றும் உணர்வித் தொகுப்பு பொருத்தப்பட்டுள்ளது. இந்தக் கப்பல்கள் , ஒவ்வொரு தண்டு மீதும் ஒரு கட்டுப்படுத்தக்கூடிய சுழல்வேக சுழலியை (CPP) இயக்கும் ஒரு டீசல் இயந்திரம் மற்றும் ஒரு வாயு விசையாழியைக் கொண்ட ஒருங்கிணைந்த டீசல் அல்லது வாயு (CODOG) உந்துவிசை அமைப்புகளுடனும், ஒரு அதிநவீன ஒருங்கிணைந்த தள மேலாண்மை அமைப்புடனும் (IPMS) கட்டமைக்கப்பட்டுள்ளன. இந்த சக்திவாய்ந்த ஆயுதம் மற்றும் உணர்வித் தொகுப்பில் தரைக்கப்பல் எதிர்ப்பு, வான் எதிர்ப்பு மற்றும் நீர்மூழ்கிக்கப்பல் எதிர்ப்புப் போர் அமைப்புகள் அடங்கியுள்ளன.
2024 டிசம்பர் 20 அன்று மெஸ்ஸர்ஸ் எம்.டி.எஸ்.எல் நிறுவனத்தால் முதல் பி17ஏ (நீலகிரி) கப்பல் ஒப்படைக்கப்பட்டதைத் தொடர்ந்து, 17 மாதங்களுக்கும் குறைவான காலக்கட்டத்தில் இந்தியக் கடற்படைக்கு ஒப்படைக்கப்பட்ட ஆறாவது பி17ஏ கப்பல் மகேந்திரகிரி ஆகும். மகேந்திரகிரியின் ஒப்படைப்பானது , நாட்டின் வடிவமைப்பு, கப்பல் கட்டும் மற்றும் பொறியியல் திறனை வெளிக்காட்டுவதோடு, கப்பல் வடிவமைப்பு மற்றும் கப்பல் கட்டும் பணி ஆகிய இரண்டிலும் தற்சார்பு மீது கடற்படை கொண்டுள்ள தளராத கவனத்தையும் பிரதிபலிக்கிறது. 75% உள்நாட்டு உள்ளடக்கத்தைக் கொண்ட இந்தத் திட்டத்தில், எம்.டி.எஸ்.எல் நிறுவனத்தின் 200-க்கும் மேற்பட்ட குறு, சிறு மற்றும் நடுத்தர நிறுவனங்கள் ஈடுபட்டுள்ளன. மேலும், இது நேரடியாக சுமார் 4,000 பணியாளர்களுக்கும், மறைமுகமாக 10,000-க்கும் மேற்பட்ட பணியாளர்களுக்கும் வேலைவாய்ப்பை உருவாக்க வழிவகுத்துள்ளது.
திவாஹர்