மத்திய வர்த்தகம் மற்றும் தொழில்துறை அமைச்சர் திரு பியூஷ் கோயல் அவர்கள், 2030-31-ஆம் ஆண்டுக்குள் இந்தியாவின் 2 டிரில்லியன் அமெரிக்க டாலர் ஏற்றுமதி இலக்கை அடைவதற்கான செயல் திட்டம் குறித்து விவாதிப்பதற்கும், ஏற்றுமதி மேம்பாட்டு இயக்கத்தின் (EPM) செயலாக்கத்தை ஆய்வு செய்வதற்கும் ஒரு உயர்மட்ட ஆய்வுக் கூட்டத்திற்குத் தலைமை தாங்கினார்.
2030-31-ஆம் ஆண்டுக்குள் இந்தியா தனது மொத்த ஏற்றுமதியை 2 டிரில்லியன் அமெரிக்க டாலராக இலக்கு நிர்ணயித்துள்ளது. இதில் 1 டிரில்லியன் அமெரிக்க டாலர் வணிகப் பொருட்கள் ஏற்றுமதியும், 1 டிரில்லியன் அமெரிக்க டாலர் சேவைகள் ஏற்றுமதியும் அடங்கும். வர்த்தகத் துறை, பொறியியல் பொருட்கள், ஜவுளி, மின்னணுவியல், மருந்துகள், இரசாயனங்கள் மற்றும் சேவைகள் ஆகிய துறைகளில் தேசிய இலக்கை துறைவாரியான நடவடிக்கைகளாகப் பிரிக்கும் ஒரு கட்டமைக்கப்பட்ட ஏற்றுமதி கண்காணிப்பு கட்டமைப்பை உருவாக்கியுள்ளது.
கட்டமைப்பை ஆய்வு செய்த திரு. கோயல், இலக்கை அடைவது மூன்று முக்கியத் தூண்களை அடிப்படையாகக் கொண்டது என்று கூறினார். அவற்றுள், தெளிவாக வரையறுக்கப்பட்ட மற்றும் செயல்படுத்தக்கூடிய காலக்கெடுவுடன் கூடிய அம்சங்கள் அடங்கும். ஒவ்வொரு துறைசார் நடவடிக்கையும் ஒரு நோடல் இணைச் செயலாளருக்கு ஒதுக்கப்பட்டு, வழங்கல் தரப்பு அல்லது தேவை தரப்பு என வகைப்படுத்தப்பட்டு, முக்கிய செயல்திறன் குறிகாட்டிகளுடன் இணைக்கப்பட்டு, குறுகிய, நடுத்தர மற்றும் நீண்ட கால காலக்கெடுவுடன் சீரமைக்கப்படும். ஏற்றுமதியாளர் தொடர்பான சிக்கல்களுக்குத் திறம்படத் தீர்வு காண்பதை உறுதி செய்வதற்காக, ஒவ்வொரு பணிக்கும் துணைபுரியும் அமைச்சகங்கள் மற்றும் துறைகள் அடையாளம் காணப்பட்டு, துறைகளுக்கிடையேயான ஒருங்கிணைப்பின் முக்கியத்துவத்தையும் அவர் வலியுறுத்தினார். மேலும், முன்னேற்றத்தை சீராகக் கண்காணிப்பதற்கு வசதியாக, செயலாளர் மற்றும் அமைச்சர் மட்டங்களில் மறுஆய்வு செய்வதற்கான ஒரு தானியங்கி மேல்நிலைப்படுத்தும் பொறிமுறையுடன், தகவல் தொழில்நுட்பம் சார்ந்த ஒரு கண்காணிப்புத் தளத்தின் தேவையையும் திரு. கோயல் எடுத்துரைத்தார்.
ஏற்றுமதியை அதிகரிப்பதற்கான முயற்சிகளுடன், தெளிவாக வரையறுக்கப்பட்ட இறக்குமதி மாற்று உத்தியையும் பின்பற்றக்கூடிய முன்னுரிமைத் துறைகளை, சம்பந்தப்பட்ட அமைச்சகங்களுடன் கலந்தாலோசித்து அடையாளம் காணுமாறு அமைச்சர் மேலும் அறிவுறுத்தினார்.
ஏற்றுமதியாளர்கள் எதிர்கொள்ளும் முக்கியத் தடைகளைக் களைவதையும், பரந்த அடிப்படையிலான, அனைவரையும் உள்ளடக்கிய மற்றும் நிலையான ஏற்றுமதி வளர்ச்சியைச் சாத்தியமாக்குவதையும் நோக்கமாகக் கொண்ட, குறு, சிறு மற்றும் நடுத்தர நிறுவனங்களை (MSME) மையமாகக் கொண்ட ஒரு முதன்மை முன்னெடுப்பான ஏற்றுமதி மேம்பாட்டு இயக்கத்தின் (EPM) செயலாக்கத்தை திரு. கோயல் ஆய்வு செய்தார். இந்த ஏற்றுமதி மேம்பாட்டு இயக்கம், வர்த்தக நிதியுதவிக்கான அணுகலை மையமாகக் கொண்ட ‘நிர்யத் புரோத்சாஹன்’ மற்றும் சந்தை அணுகலை மையமாகக் கொண்ட ‘நிர்யத் திஷா’ ஆகிய இரண்டு ஒருங்கிணைந்த துணைத் திட்டங்கள் மூலம் செயல்படுத்தப்படுகிறது.
ஏற்றுமதி மேலாண்மைத் திட்டத்தின் (EPM) கீழ் பத்து கூறுகள் செயல்பாட்டுக்குக் கொண்டுவரப்பட்டுள்ளதாக அவர் குறிப்பிட்டார். அவற்றுள் வட்டி மானியம், மாற்று வர்த்தக நிதி (ஏற்றுமதி காரணிப்படுத்தல்), மின்-வர்த்தக ஏற்றுமதியாளர்களுக்கான கடன் உதவி, ஏற்றுமதிக் கடனுக்கான பிணைய ஆதரவு, வளர்ந்து வரும் ஏற்றுமதி வாய்ப்புகளுக்கான இடர் பகிர்வு, சோதனை, பரிசோதனை மற்றும் சான்றளிப்பிற்கான ஆதரவு, சந்தை அணுகல் ஆதரவு, ஏற்றுமதி கிடங்கு மற்றும் தளவாடங்களுக்கான ஆதரவு, உள்நாட்டுப் போக்குவரத்து மற்றும் கையாளுதலுக்கான ஆதரவு, மற்றும் வர்த்தக வசதி மற்றும் புலனாய்வுக்கான ஆதரவு ஆகியவை அடங்கும். தற்போதைய மேற்கு ஆசிய நெருக்கடியால் பாதிக்கப்பட்ட ஏற்றுமதியாளர்களுக்கு ஆதரவளிப்பதற்காக, ஏற்றுமதி மேலாண்மைத் திட்டத்தின் கீழ் தொடங்கப்பட்ட நிவாரணத் திட்டத்தையும் திரு. கோயல் கவனத்தில் கொண்டார்.
திறம்படச் செயல்படுத்துவதை வலியுறுத்திய அமைச்சர், அனைத்துத் திட்டங்களின் பலன்களும் கள அளவில் உள்ள ஏற்றுமதியாளர்களை, குறிப்பாக உண்மையான மற்றும் முதல் முறை ஏற்றுமதியாளர்கள் மற்றும் குறு, சிறு மற்றும் நடுத்தர நிறுவனங்களைச் சென்றடைய வேண்டும் என்று கூறினார். ஏற்றுமதியாளர்கள், கிடைக்கக்கூடிய திட்டங்கள் மற்றும் அவற்றின் வழிமுறைகள் குறித்து முழுமையாகத் தெரிந்துகொள்வதை உறுதிசெய்யும் வகையில், ஏற்றுமதி மேம்பாட்டுக் குழுக்கள், பண்ட வாரியங்கள் மற்றும் DGFT மண்டல அதிகார அமைப்புகள் மூலம் விழிப்புணர்வு மற்றும் சென்றடைதல் முயற்சிகளை வலுப்படுத்த வேண்டும் என்றும் அவர் அறிவுறுத்தினார். குறு, சிறு மற்றும் நடுத்தர நிறுவனங்களின் உலகளாவிய போட்டித்திறனை மேம்படுத்துவதற்கு இன்றியமையாத வெளிநாட்டுக் கிடங்கு மற்றும் தளவாடங்கள், அத்துடன் சோதனை, ஆய்வு மற்றும் சான்றளிப்பு ஆகிய கூறுகளில் கவனம் செலுத்த வேண்டியதன் அவசியத்தையும் திரு. கோயல் எடுத்துரைத்தார்.
ஏற்றுமதி மேம்பாட்டுக் குழுவின் (EPM) அனைத்துக் கூறுகளிலும் வேளாண் ஏற்றுமதி மற்றும் குறு, சிறு நிறுவனங்கள் முக்கியக் கவனமாகத் தொடர வேண்டும் என்று திரு கோயல் வலியுறுத்தினார். மேலும், சந்தை அணுகல் ஆதரவானது ஏற்றுமதி மேம்பாட்டுக் குழுக்களைத் தாண்டி, ஏற்றுமதியை ஊக்குவிப்பதில் ஈடுபட்டுள்ள பிற கள அளவிலான அமைப்புகளையும் உள்ளடக்கும் வகையில் விரிவுபடுத்தப்பட வேண்டும் என்றும் அவர் அறிவுறுத்தினார். கூடுதலாக, ஏற்றுமதியாளர்கள் மற்றும் ஏற்றுமதி மேம்பாட்டுக் குழுக்களுக்கு அதிக முன்கணிப்புத்தன்மையை வழங்குவதற்காக, வர்த்தகக் கண்காட்சிகள், வாங்குவோர்-விற்போர் சந்திப்புகள், எதிர் வாங்குவோர்-விற்போர் சந்திப்புகள் மற்றும் வர்த்தகக் குழுக்கள் அடங்கிய, சுழற்சி முறையில் இயங்கும் மூன்றாண்டு கால அட்டவணையை உருவாக்க வேண்டியதன் அவசியத்தையும் அவர் வலியுறுத்தினார்.
பல்வேறு துறைகள் மற்றும் சந்தைகளில் இந்தியாவின் ஏற்றுமதி மேம்பாட்டு முயற்சிகளுக்கு ஒரு மேலான குடையாக ‘பிராண்ட் இந்தியா’வை வலுப்படுத்துவதன் முக்கியத்துவத்தையும் அமைச்சர் வலியுறுத்தினார்.
தனது நிறைவுரையில், நிதி, சந்தை அணுகல், இணக்கம், தளவாடங்கள் மற்றும் பிராண்ட் தெரிவுநிலை போன்ற துறைகளில் ஏற்றுமதியாளர்களுக்கு அனைத்து முயற்சிகளும் உறுதியான ஆதரவாக மாற வேண்டும் என்று திரு கோயல் வலியுறுத்தினார். ஒழுக்கமான செயலாக்கம், நிகழ்நேரக் கண்காணிப்பு மற்றும் திறமையான துறைசார் ஒருங்கிணைப்பு ஆகியவற்றின் மூலம் 2 டிரில்லியன் அமெரிக்க டாலர் ஏற்றுமதி இலக்கை அடைய முடியும் என்றும் அவர் குறிப்பிட்டார்.
இக்கூட்டத்தில் வெளிநாட்டு வர்த்தக தலைமை இயக்குநர், வர்த்தகத் துறையின் கூடுதல் செயலாளர்கள், பண்டப் பிரிவுகளின் இணைச் செயலாளர்கள் மற்றும் வர்த்தகத் துறையின் பிற மூத்த அதிகாரிகள் கலந்துகொண்டனர்.
எம்.பிரபாகரன்