இந்தியத் துணை குடியரசுத் தலைவர் சி.பி. ராதாகிருஷ்ணன், இன்று விசாகப்பட்டினத்தில் நடைபெற்ற ஆந்திரப் பல்கலைக்கழக நூற்றாண்டு விழாவில் கலந்துகொண்டு சிறப்பித்தார்.
கூட்டத்தில் உரையாற்றிய துணை ஜனாதிபதி, வரலாற்றைக் கண்டது மட்டுமல்லாமல் அதை வடிவமைக்கவும் உதவிய ஆந்திரப் பல்கலைக்கழகத்தின் நூற்றாண்டு காலச் சிறப்பைக் குறிக்கும் இந்த வரலாற்றுச் சிறப்புமிக்க தருணத்தில் ஒரு அங்கமாக இருப்பது ஒரு பாக்கியம் என்று கூறினார். கடந்த நூறு ஆண்டுகளாக, இந்தப் பல்கலைக்கழகம் சிந்தனைகளின் சங்கமமாகச் செயல்பட்டு, தேசத்தைக் கட்டமைப்பதில் குறிப்பிடத்தக்க பங்களிப்பைச் செய்த பல தலைமுறை மாணவர்களை வளர்த்தெடுத்துள்ளது என்று அவர் குறிப்பிட்டார். பல்கலைக்கழகத்தின்
முன்னாள் துணைவேந்தரும், இந்தியாவின் தலைசிறந்த தத்துவஞானிகளில் ஒருவரும், அரசியல்வாதியுமான டாக்டர் சர்வேபள்ளி ராதாகிருஷ்ணனின் பாரம்பரியத்தை ஆழ்ந்த மரியாதையுடன் நினைவு கூர்ந்த துணை ஜனாதிபதி, அறிவையும் குணத்தையும் வளர்ப்பதற்கான ஒரு வழியாகக் கல்வியைக் கருதிய அவரது தொலைநோக்குப் பார்வையை எடுத்துரைத்தார். இந்தத் தொலைநோக்குப் பார்வை இன்றும் வலுவாக எதிரொலிக்கிறது என்று அவர் கூறினார்.
மேலும், விசாகப்பட்டினத்தில் தனது ஆரம்பக் கல்வியைப் பயின்ற நோபல் பரிசு பெற்ற சி.வி.ராமன் மற்றும் பல்கலைக்கழகத்தின் புகழ்பெற்ற முன்னாள் மாணவரான முன்னாள் துணை ஜனாதிபதி திரு எம்.வெங்கையா நாயுடு உள்ளிட்ட பல முக்கிய ஆளுமைகளின் தொடர்பையும் துணை ஜனாதிபதி எடுத்துரைத்தார். சாந்தி ஸ்வரூப் பட்நாகர் விருது, பத்ம விபூஷன், பத்மஸ்ரீ மற்றும் சாகித்ய அகாடமி விருதுகள் பெற்றவர்கள் உட்பட பல புகழ்பெற்ற ஆளுமைகளை ஆந்திரப் பல்கலைக்கழகம் உருவாக்கியுள்ளது என்று அவர் குறிப்பிட்டார்.
30வது CII கூட்டாண்மை உச்சி மாநாட்டிற்காக விசாகப்பட்டினத்திற்கு அவர் முன்னதாக மேற்கொண்ட பயணத்தைக் குறிப்பிட்ட துணை ஜனாதிபதி, முதலமைச்சர் திரு என். சந்திரபாபு நாயுடுவின் தலைமையில் ஆந்திரப் பிரதேசம் அடைந்துள்ள விரைவான முன்னேற்றத்தில் திருப்தி தெரிவித்தார். குறிப்பிடத்தக்க முதலீடுகளை ஈர்த்து, புத்தாக்கம் மற்றும் வளர்ச்சியின் மையமாகத் தனது நிலையை வலுப்படுத்தி, மாநிலம் தனது வளர்ச்சிப் பயணத்தை வேகப்படுத்தியுள்ளது என்று அவர் குறிப்பிட்டார். மாநிலத்தின் தொழில்நுட்பச் சூழலை மேம்படுத்துவதில் தகவல் தொழில்நுட்பத் துறை அமைச்சர் திரு நாரா லோகேஷின் பங்கையும் அவர் பாராட்டினார்.
ஆந்திரப் பிரதேசத்தின் மீது அதிகரித்து வரும் உலகளாவிய நம்பிக்கையை எடுத்துரைத்த துணை ஜனாதிபதி, கூகுள் போன்ற முன்னணி தொழில்நுட்ப நிறுவனங்களின் ஆர்வம் மற்றும் முதலீடுகளைக் குறிப்பிட்டார். ஹைப்பர்ஸ்கேல் தரவு மையங்கள் மற்றும் தகவல் தொழில்நுட்ப முதலீடுகள் உள்ளிட்ட முக்கிய திட்டங்களுடன், குறிப்பாக தரவு மையங்கள், தகவல் தொழில்நுட்பம், சுற்றுலா, மின்னணுவியல் மற்றும் டிஜிட்டல் உள்கட்டமைப்பு போன்ற துறைகளில் விசாகப்பட்டினம் ஒரு முக்கிய வளர்ச்சி மையமாக உருவாகி வருகிறது என்று அவர் குறிப்பிட்டார்.
நாடாளுமன்றத்தில் தொடர்புடைய மசோதா நிறைவேற்றப்பட்டதைத் தொடர்ந்து, அமராவதி மாநிலத்தின் நிரந்தரத் தலைநகராக அறிவிக்கப்பட்டதற்கு ஆந்திரப் பிரதேச மக்களுக்குத் துணை ஜனாதிபதி வாழ்த்து தெரிவித்தார். மசோதா நிறைவேற்றப்பட்டபோது மாநிலங்களவைக்குத் தலைமை தாங்கும் பாக்கியம் தனக்குக் கிடைத்ததாகவும், மக்களின் மகிழ்ச்சியையும் பெருமிதத்தையும் நேரில் கண்டதாகவும் அவர் குறிப்பிட்டார். இந்த முடிவு, மக்களின் கூட்டு விருப்பங்களின் பிரதிபலிப்பு என்றும், மாநிலத்தின் நிர்வாக எதிர்காலத்திற்குத் தெளிவு, நிலைத்தன்மை மற்றும் வழிகாட்டுதலை வழங்கும் ஒன்று என்றும் அவர் விவரித்தார்.
வளர்ந்த இந்தியா குறித்த தொலைநோக்குப் பார்வையைக் குறிப்பிடுகையில், “செயல்பாட்டு மாநிலங்கள் மூலமாக மட்டுமே செயல்பாட்டு இந்தியாவை அடைய முடியும்” என்ற பிரதமர் திரு நரேந்திர மோடியின் வார்த்தைகளைத் துணை ஜனாதிபதி நினைவு கூர்ந்தார். தொலைநோக்குப் பார்வை கொண்ட தலைமை, வலுவான நிர்வாகம் மற்றும் திறமையான செயலாக்கம் ஆகியவற்றால் ஆந்திரப் பிரதேசம் மிக வேகமாக வளர்ந்து வரும் மாநிலங்களில் ஒன்றாக உருவெடுத்துள்ளது என்று அவர் கூறினார்.
2025-26 ஆம் ஆண்டில் நாட்டின் முன்மொழியப்பட்ட முதலீடுகளில் 25 சதவீதத்திற்கும் அதிகமான பங்களிப்பைக் கொண்டு, ஆந்திரப் பிரதேசம் முதலீடுகளுக்கான ஒரு முன்னணி இடமாக மாறியுள்ளது என்று அவர் குறிப்பிட்டார். காலவரையறைக்குட்பட்ட அனுமதிகள், வெளிப்படையான நிர்வாகம், மற்றும் நிலம், மின்சாரம், இணைப்பு மற்றும் திறமையான பணியாளர்கள் ஆகியவற்றுக்குத் தடையற்ற அணுகலை வழங்கும் வலுவான ஒற்றைச் சாளர அமைப்பு உள்ளிட்ட மாநிலத்தின் முதலீட்டாளர்களுக்கு உகந்த கொள்கைகளை அவர் எடுத்துரைத்தார்.
வெற்றிக்குக் காலம் எடுக்கும் என்பதைக் குறிப்பிட்ட துணை ஜனாதிபதி, “கிரிக்கெட்டின் கடவுள்” என்று அன்புடன் அழைக்கப்படும் சச்சின் டெண்டுல்கர் கூட தனது நூறாவது சதத்தை அடையக் காத்திருக்க வேண்டியிருந்தது என்றார். வெற்றியை அடையப் பொறுமை அவசியம் என்று அவர் வலியுறுத்தினார்.
ஒருவர் உள் அழுத்தத்தைச் சமாளிக்கக் கற்றுக்கொள்ள வேண்டும் என்றும் அவர் மேலும் கூறினார். தோல்விகள் மதிப்புமிக்க பாடங்களைக் கற்றுத் தருகின்றன என்றும், அவை தனிநபர்களின் மன உறுதியைக் குலைக்க அனுமதிக்கப்படக்கூடாது என்றும் கூறிய அவர், அனைவரும் நம்பிக்கையுடன் வாழ்க்கையை எதிர்கொள்ளுமாறு வலியுறுத்தினார்.
இந்நிகழ்ச்சியின் போது, இந்தியாவின் முன்னாள் துணைக் குடியரசுத் தலைவர் எம். வெங்கையா நாயுடு; ஒடிசா ஆளுநர் கே. ஹரி பாபு; ஜிஎம்ஆர் குழுமத்தின் நிறுவனர் மற்றும் தலைவர் கிராந்தி மல்லிகார்ஜுன ராவ்; இந்திய அரசின் முன்னாள் மத்திய உள்துறைச் செயலாளர் கே. பத்மநாபையா; சையன்ட் நிறுவனத்தின் நிறுவனர் மற்றும் நிர்வாகத் தலைவர் பி.வி.ஆர். மோகன் ரெட்டி; லாரஸ் லேப்ஸ் நிறுவனத்தின் நிறுவனர் மற்றும் தலைமைச் செயல் அதிகாரி சத்யநாராயண சாவா; டெல்லி இந்திய தொழில்நுட்பக் கழகத்தின் முன்னாள் இயக்குநர் வி.எஸ். ராஜு; கான்பூர் இந்திய தொழில்நுட்பக் கழகத்தின் முன்னாள் பேராசிரியர் எம்.ஆர். மாதவ்; பிரஸ் டிரஸ்ட் ஆஃப் இந்தியாவின் தலைமைச் செயல் அதிகாரி விஜய் ஜோஷி; மற்றும் திரைப்படத் தயாரிப்பாளர் திரிவிக்ரம் சீனிவாஸ் ஆகியோருக்கு துணைக் குடியரசுத் தலைவர் சிறந்த முன்னாள் மாணவர் விருதுகளை வழங்கினார்.
மேலும், இந்நிகழ்ச்சியில் துணைக் குடியரசுத் தலைவர் ஒரு நினைவு நாணயம், ஒரு நினைவு அஞ்சல் முத்திரை மற்றும் ஒரு காபி டேபிள் புத்தகம் ஆகியவற்றையும் வெளியிட்டார். துணை ஜனாதிபதியின் முன்னிலையில், ஆந்திரப் பல்கலைக்கழகத்திற்கும், அமெரிக்காவின் புளோரிடா பல்கலைக்கழகம், ஆக்ஸ்மிக் லேப்ஸ் இன்க்., மற்றும் இந்திய வெப்பமண்டல வானிலை ஆய்வு நிறுவனம் (ஐஐடிஎம்) ஆகியவற்றுக்கும் இடையே மூன்று புரிந்துணர்வு ஒப்பந்தங்கள் பரிமாறப்பட்டன. பின்னர் அவர், ஆந்திரப் பல்கலைக்கழகத்தின் வரலாறு மற்றும் அதன் பரிணாம வளர்ச்சியைக் காட்சிப்படுத்தும் புகைப்படக் கண்காட்சியைப் பார்வையிட்டார்.
ஆந்திரப் பிரதேச ஆளுநரும், ஆந்திரப் பல்கலைக்கழக வேந்தருமான திரு அப்துல் நசீர்; முன்னாள் துணை குடியரசுத் தலைவர் திரு எம். வெங்கையா நாயுடு; முதலமைச்சர் திரு என். சந்திரபாபு நாயுடு; மத்திய விமானப் போக்குவரத்துத் துறை அமைச்சர் திரு கிஞ்சரபு ராம்மோகன் நாயுடு; புகழ்பெற்ற கிரிக்கெட் வீரர் திரு சச்சின் டெண்டுல்கர்; ஒடிசா ஆளுநர்
டாக்டர் ஹரி பாபு கம்பம்பதி; மத்திய இணை அமைச்சர் திரு பூபதி ராஜு சீனிவாச வர்மா; தகவல் தொழில்நுட்பம் மற்றும் மனிதவள மேம்பாட்டுத் துறை அமைச்சர் திரு நாரா லோகேஷ்; சமூக நலத்துறை அமைச்சர் திரு டோலா ஸ்ரீ பால வீரஞ்சநேய சுவாமி; துணைவேந்தர் பேராசிரியர் ஜி.பி. ராஜா சேகர்; இவர்களுடன் மாணவர்கள், பேராசிரியர்கள், ஊழியர்கள் மற்றும் முன்னாள் மாணவர்களும் இந்நிகழ்ச்சியில் கலந்துகொண்டனர்.
இன்று அதிகாலை ஸ்ரீகாகுளம் மாவட்டத்தில் உள்ள ஸ்ரீ கூர்மநாத சுவாமி கோயில் மற்றும் அரசவல்லி ஸ்ரீ சூர்யநாராயண சுவாமி கோயிலில் துணைத் தலைவர் சிபி ராதாகிருஷ்ணன் வழிபாடு செய்தார்.
எஸ்.சதிஸ் சர்மா