பீகார் சட்டமன்றத்திற்கான வரவிருக்கும் பொதுத் தேர்தல் மற்றும் சில மாநிலங்களில் நடைபெறவிருக்கும் இடைத்தேர்தல்களுக்கு மத்திய பார்வையாளர்களாகப் பணியாற்றும் பொது, காவல்துறை மற்றும் செலவு பார்வையாளர்களுக்கான விளக்கக் கூட்டத்தை இந்தியத் தேர்தல் ஆணையம் இன்று ஏற்பாடு செய்தது.
இந்தக் கூட்டத்தில் 287 ஐஏஎஸ் அதிகாரிகள், 58 ஐபிஎஸ் அதிகாரிகள், ஐஆர்எஸ்/ஐஆர்ஏஎஸ்/ஐசிஏஎஸ் மற்றும் பிற சேவைகளைச் சேர்ந்த 80 அதிகாரிகள் உட்பட 425 அதிகாரிகள் கலந்து கொண்டனர். இந்த விளக்கக் கூட்டம் புது தில்லியின் IIIDEM-இல் நடைபெற்றது.
தலைமைத் தேர்தல் ஆணையர் (CEC) திரு. ஞானேஷ் குமார், தேர்தல் ஆணையர்கள் டாக்டர். சுக்பீர் சிங் சந்து மற்றும் டாக்டர். விவேக் ஜோஷி ஆகியோர் மத்திய பார்வையாளர்களுக்கு விளக்கினர். பார்வையாளர்களிடையே உரையாற்றிய தலைமைத் தேர்தல் ஆணையர் ஞானேஷ் குமார், அவர்களை ஜனநாயகத்தின் கலங்கரை விளக்கங்கள் என்று வர்ணித்தார்.
தேர்தல் ஆணையத்தின் கண்கள் மற்றும் காதுகளாக, மத்திய பார்வையாளர்கள் அனைத்து தேர்தல் சட்டங்கள், விதிகள் மற்றும் வழிகாட்டுதல்களுடன் தங்களை நன்கு அறிந்திருக்க வேண்டும், நேரடி கள உள்ளீடுகளை வழங்க வேண்டும் மற்றும் அவர்களின் கண்டிப்பான மற்றும் பாரபட்சமற்ற இணக்கத்தை உறுதி செய்ய வேண்டும் என்று கேட்டுக் கொள்ளப்பட்டனர்.
அரசியல் கட்சிகள், வேட்பாளர்கள் மற்றும் வாக்காளர்கள் தங்கள் குறைகளைத் தீர்த்துக் கொள்வதற்காக அவர்களை முழுமையாக அணுகக்கூடியவர்களாக இருக்குமாறு பார்வையாளர்களுக்கு அறிவுறுத்தப்பட்டது.
பார்வையாளர்கள் வாக்குச் சாவடிகளைப் பார்வையிடவும், வாக்காளர்களின் வசதிக்காக ஆணையம் சமீபத்தில் எடுத்த முயற்சிகளை செயல்படுத்துவதை உறுதி செய்யவும் அறிவுறுத்தப்பட்டது.
அரசியலமைப்பின் பிரிவு 324 மற்றும் மக்கள் பிரதிநிதித்துவச் சட்டம், 1951 இன் பிரிவு 20B ஆகியவற்றால் வழங்கப்பட்ட முழுமையான அதிகாரங்களின் கீழ், ஆணையம் மத்திய பார்வையாளர்களை நியமிக்கிறது, இதன் மூலம் ஆணையத்திற்கு சுதந்திரமான மற்றும் நியாயமான தேர்தல்களை நடத்துவதில் உதவ முடியும். கள அளவில் தேர்தல் செயல்முறையின் திறமையான மற்றும் பயனுள்ள நிர்வாகத்தையும் அவர்கள் மேற்பார்வையிடுகிறார்கள்.
எஸ்.சதிஸ் சர்மா