இந்திய தேசிய நெடுஞ்சாலை ஆணையம் ( NHAI ), தேசிய நெடுஞ்சாலைகளில் பயணிக்கும் மக்களுக்கு வேகமான மற்றும் சிறந்த உதவியை வழங்குவதற்காக, தற்போதுள்ள தனது 1033 தேசிய நெடுஞ்சாலை உதவி எண்ணை மேம்பட்ட தொழில்நுட்பத்துடன் தரம் உயர்த்த திட்டமிட்டுள்ளது. மேம்படுத்தப்பட்ட 1033 உதவி எண், செயற்கை நுண்ணறிவு (AI), நிகழ்நேர இருப்பிடக் கண்காணிப்பு மற்றும் திறன்மிகு அவசரகால பதில் அமைப்புகள் போன்ற தொழில்நுட்பங்களைப் பயன்படுத்தும். இந்த மேம்பாடுகள், அழைப்பவர்களின் இருப்பிடத்தைக் கண்டறியவும், பல்வேறு இந்திய மொழிகளில் வரும் அழைப்புகளைப் புரிந்துகொள்ளவும், சரியான உதவியை அந்த இடத்திற்கு விரைவாக அனுப்பவும் 1033 தேசிய நெடுஞ்சாலை உதவி எண்ணுக்கு உதவும். குறிப்பாக, மனிதர்களின் கணிப்பும் முடிவெடுக்கும் திறனும் அவசியமான அவசரகாலச் சூழ்நிலைகளில், மனித இயக்குநர்கள் தொடர்ந்து ஒரு முக்கியப் பங்கை வகிப்பார்கள்.
1033 உதவி எண் 24 மணி நேரமும் உதவி வழங்குகிறது.
1033 உதவி எண் 2018-ல் அறிமுகப்படுத்தப்பட்டது. இது வாரத்தின் ஏழு நாட்களும், 24 மணி நேரமும் செயல்படும். இது தேசிய நெடுஞ்சாலைப் பயனர்களுக்குப் பின்வருவனவற்றில் உதவுகிறது:
- மருத்துவ அவசரநிலைகள்.
- வாகனப் பழுதுகள்.
- ஆம்புலன்ஸ்கள், கிரேன்கள் மற்றும் ரோந்து வாகனங்களின் உதவி.
- சுங்கச்சாவடி மற்றும் ஃபாஸ்டேக் தொடர்பான சிக்கல்கள்.
- தேசிய நெடுஞ்சாலைகளில் பயணிக்கும்போது எதிர்கொள்ளப்படும் பிற பிரச்சனைகள்.
இந்த உதவி எண் தற்போது 1.46 லட்சத்திற்கும் மேற்பட்ட கிலோமீட்டர் தேசிய நெடுஞ்சாலைகளை உள்ளடக்கியுள்ளதுடன், தினமும் சுமார் 15,000 அழைப்புகளைப் பெறுகிறது. மேலும், இது பல மொழிகளிலும் உதவியை வழங்குகிறது.
புதிய அமைப்பால் என்னென்ன மேம்படும்?
அடுத்த தலைமுறை 1033 தளம் பின்வரும் நன்மைகளை வழங்குவதை நோக்கமாகக் கொண்டுள்ளது:
- விரைவான உதவி: அழைப்புகளைப் பெறுவதற்கும், தேவைப்படும் இடத்திற்கு உதவியை அனுப்புவதற்குமான மேம்பட்ட அமைப்புகள்.
- இருப்பிடத்தைக் கண்டறிதல்: அவசரக் குழுக்கள் சம்பவ இடத்திற்குச் சென்றடைய உதவும் வகையில், அழைப்பவரின் இருப்பிடத்தை நிகழ்நேரத்தில் பதிவு செய்தல்.
- பன்மொழி ஆதரவு: பல்வேறு இந்திய மொழிகளில் அழைப்புகளை செயற்கை நுண்ணறிவு உதவியுடன் கையாளுதல்.
- திறன்மிகு அனுப்பீடு: மிகவும் பொருத்தமான ஆம்புலன்ஸ், கிரேன் அல்லது ரோந்து வாகனத்தைக் கண்டறிந்து அனுப்ப உதவும் அறிவார்ந்த அமைப்புகள்.
- முன்கூட்டிய எச்சரிக்கைகள்: சம்பவங்கள் மற்றும் பிற முக்கிய நிகழ்வுகள் குறித்து நெடுஞ்சாலைப் பயனாளர்களுக்கு சரியான நேரத்தில் வழங்கப்படும் அறிவுரைகள்.
- மேம்பட்ட ஒருங்கிணைப்பு: உதவி எண், அவசரகால சேவைகள் மற்றும் தேசிய நெடுஞ்சாலை செயல்பாட்டுக் குழுக்களுக்கு இடையேயான ஒருங்கிணைப்பு மேம்படுத்தப்பட்டுள்ளது.
தேசிய நெடுஞ்சாலை ஆணையத்தால் (NHAI) ஊக்குவிக்கப்படும் நிறுவனமான இந்திய நெடுஞ்சாலை மேலாண்மை நிறுவனம் லிமிடெட் (IHMCL), அடுத்த தலைமுறை 1033 உதவி எண் மற்றும் அழைப்பு மையத்தின் உருவாக்கம், வடிவமைப்பு, நிறுவுதல், இயக்கம் மற்றும் பராமரிப்புப் பணிகளுக்காக, நிறுவனங்கள் மற்றும் கூட்டமைப்புகளிடமிருந்து விருப்பம் தெரிவிக்கும் அழைப்பை (EOI) விடுத்துள்ளது. இந்த முயற்சிக்கு மென்பொருள் உருவாக்கம், டிஜிட்டல் தளங்கள், 24×7 அழைப்பு மையச் செயல்பாடுகள் மற்றும் அவசரகாலப் பதிலளிப்புச் சேவைகளில் நிபுணத்துவம் தேவைப்படுகிறது. போக்குவரத்து மற்றும் சவாரி முன்பதிவு, தளவாடங்கள், விரைவு வணிகம், பொதுப் பாதுகாப்பு, கணினி வழி அனுப்பீடு, குரல்வழிச் செயற்கை நுண்ணறிவு மற்றும் இந்திய மொழிப் பேச்சு அறிதல் தொழில்நுட்பங்கள் ஆகிய துறைகளில் செயல்படும் நிறுவனங்கள் பங்கேற்க ஊக்குவிக்கப்படுகின்றன.
புதிய தளத்தை உருவாக்க உதவும் தொழில்துறை கருத்துகள்
நம்பகமான, விரிவாக்கக்கூடிய மற்றும் எதிர்காலத்திற்கு ஏற்ற ஒரு அமைப்பை உருவாக்குவதற்காக, ஐ.எச்.எம்.சி.எல் நிறுவனம் தொழில் வல்லுநர்களிடமிருந்து ஆலோசனைகளையும் தொழில்நுட்ப உள்ளீடுகளையும் கோரும். தேவைகளை இறுதி செய்யும் போது, தொடர்புடைய தொழில்துறையின் சிறந்த நடைமுறைகளும் கருத்தில் கொள்ளப்படும்.
மேம்படுத்தப்பட்ட 1033 உதவி எண், தேசிய நெடுஞ்சாலைகளில் குடிமக்களுக்கு உதவியை வேகமாகவும், மேலும் ஒருங்கிணைக்கப்பட்டதாகவும், வசதியாகவும் மாற்றும் என எதிர்பார்க்கப்படுகிறது. தொழில்நுட்பத்தை மனித ஆதரவுடன் இணைப்பதன் மூலம், நாடு முழுவதும் உள்ள நெடுஞ்சாலைப் பயனர்களின் பாதுகாப்பையும் பயண அனுபவத்தையும் மேலும் மேம்படுத்துவதை NHAI நோக்கமாகக் கொண்டுள்ளது
திவாஹர்