அறிவியல் மற்றும் தொழில்நுட்பம், புவி அறிவியல் துறைக்கான மத்திய இணை அமைச்சரும் (தனிப் பொறுப்பு), பிரதமர் அலுவலகம், பணியாளர், பொதுக் குறைகள், ஓய்வூதியங்கள், அணுசக்தி மற்றும் விண்வெளித் துறை இணை அமைச்சருமான டாக்டர் ஜிதேந்திர சிங், ஒரு புகழ்பெற்ற மருத்துவர் மற்றும் நீரிழிவு நோய் நிபுணரும் ஆவார். அவர் இன்று, நோயறிதல், சிகிச்சை மற்றும் மருத்துவம் ஆகியவற்றை உள்ளடக்கிய மருத்துவத்தின் ஒவ்வொரு துறையிலும் ரோபோட்டிக்ஸ் ஒரு வேகமான கருவியாக உருவெடுக்க உள்ளது என்று கூறினார்.
ரோபோட்டிக்ஸ், செயற்கை நுண்ணறிவு (AI) மற்றும் நானோ அறிவியல் ஆகியவை இணைந்து, துல்லியமான சுகாதார வழங்கல் மற்றும் துல்லியமான மருத்துவத்திற்கான ஒரு பெரிய சூழலமைப்பை உருவாக்கும் என்றும், வளர்ந்து வரும் தொழில்நுட்பங்கள் ஒரு தனிநபரின் மரபணு அமைப்பு, சுற்றுச்சூழல் நிலைமைகள், வாழ்க்கை முறை மற்றும் உணவுப் பழக்கவழக்கங்களின் அடிப்படையில் மேலும் மேலும் தனிப்பயனாக்கப்பட்ட சுகாதார சேவையைச் சாத்தியமாக்கும் என்றும் அவர் கூறினார்.
டாக்டர் ஜிதேந்திர சிங், இங்கு நடைபெற்ற “ரோபோடிக் அறுவை சிகிச்சை சங்கத்தின்” சர்வதேச மாநாட்டில் தொடக்கவுரை ஆற்றினார். ரோபோடிக்ஸ் என்பது அறுவை சிகிச்சைக்கு மட்டுமேயான ஒரு தொழில்நுட்பமாகப் பார்க்கப்படக்கூடாது என்றும், மாறாக அது மருத்துவத்தின் பல்வேறு பிரிவுகளில் படிப்படியாக ஒரு அங்கமாக மாறும் ஒரு கருவியாகக் கருதப்பட வேண்டும் என்றும் அவர் கூறினார். “இது ஒரு கருவி. இது எல்லா இடங்களிலும் நிகழும்,” என்று கூறிய அவர், தற்போதைய மாநாடு ரோபோடிக் அறுவை சிகிச்சையில் கவனம் செலுத்தினாலும், செயற்கை நுண்ணறிவு (AI) பல்வேறு மருத்துவத் துறைகளில் பயன்பாடுகளைக் கண்டறிவதைப் போலவே, எதிர்காலத்தில் ரோபோடிக் மருத்துவம், ரோபோடிக் நாளமில்லாச் சுரப்பியல் மற்றும் ரோபோடிக் இதயவியல் ஆகியவற்றின் தோற்றத்தைக் காண முடியும் என்றும் குறிப்பிட்டார்.
செயற்கை நுண்ணறிவு, உயிரித் தொழில்நுட்பம், அணு மருத்துவம் மற்றும் பிற தொழில்நுட்பத்தால் இயக்கப்படும் தீர்வுகள் 21 ஆம் நூற்றாண்டில் தோன்றி வருவதால், மருத்துவம் முன்னணி நடைமுறைகளின் ஒரு அற்புதமான கட்டத்திற்குள் நுழைகிறது என்று அமைச்சர் கூறினார். அடுத்த கட்டத்தில், குவாண்டம் தொழில்நுட்பங்கள், நானோ மருத்துவம் மற்றும் ரோபாட்டிக்ஸ் ஆகியவற்றில் ஏற்படும் முன்னேற்றங்களுடன், மரபணு சார்ந்த நோயறிதல் தீர்வுகளின் பயன்பாடும் அதிகரிக்கும் என்று அவர் குறிப்பிட்டார்.
ஒரே நோயால் பாதிக்கப்பட்டிருந்தாலும், ஒவ்வொரு நோயாளிக்கும் ஏற்றவாறு சிகிச்சை அணுகுமுறைகளை வடிவமைக்க வேண்டிய தேவை துல்லிய மருத்துவத்திற்கு அதிகரித்து வரும் என்று டாக்டர் ஜிதேந்திர சிங் கூறினார். மரபணு அமைப்பு, சுற்றுச்சூழல் நிலைமைகள், வாழ்க்கை முறை மற்றும் உணவுப் பழக்கவழக்கங்கள் ஆகியவை மருத்துவ முடிவெடுக்கும் செயல்முறையை மேலும் மேலும் வடிவமைக்கும் என்றும், இதனால் தொழில்நுட்பத்தால் இயக்கப்பட்ட மற்றும் தனிப்பயனாக்கப்பட்ட சுகாதாரப் பராமரிப்பு, மருத்துவத்தின் எதிர்காலத்தின் ஒரு முக்கிய அங்கமாக மாறும் என்றும் அவர் குறிப்பிட்டார்.
ஜீனோம் இந்தியா திட்டத்தைக் குறிப்பிட்டுப் பேசிய டாக்டர் ஜிதேந்திர சிங், ஏற்கனவே 10,000 நபர்களின் மரபணு வரிசைப்படுத்தப்பட்டுள்ளதாகவும், இந்தியா இறுதியில் பிறக்கும் ஒவ்வொரு குழந்தைக்கும் மரபணு வரிசைப்படுத்தும் நிலையை அடைய முடியும் என்றும் நம்பிக்கை தெரிவித்தார். 140 கோடி மக்கள்தொகைக்கு இத்தகைய விரிவான மரபணு வரிசைப்படுத்தலை மேற்கொள்வதற்கு, செயற்கை நுண்ணறிவு மற்றும் ரோபோட்டிக்ஸ் ஆகியவற்றின் உகந்த பயன்பாடு தேவைப்படும் என்றும் அவர் கூறினார்.
நீண்டகால சுகாதார சவால்களை எதிர்கொள்வதில் நானோ மருத்துவத்தின் ஆற்றல் குறித்தும் அமைச்சர் பேசினார். வாய்வழி இன்சுலினை உருவாக்கும் முயற்சிகளைக் குறிப்பிட்ட அவர், நானோ மட்டத்தில் ஏற்படும் முன்னேற்றங்கள், வழக்கமான மருந்து விநியோகத்தில் உள்ள வரம்புகளைக் கடக்க உதவுவதோடு, சிகிச்சை முறைகளுக்கான புதிய சாத்தியக்கூறுகளையும் உருவாக்கும் என்று கூறினார்.
இந்தியாவின் பரப்பளவு, பன்முகத்தன்மை மற்றும் புவியியல் பரவல் ஆகியவை, செயற்கை நுண்ணறிவு, ரோபோடிக்ஸ் மற்றும் டெலி-ரோபோடிக்ஸ் போன்ற தொழில்நுட்பங்களை சுகாதார சேவைகளை வழங்குவதற்கு மிகவும் பொருத்தமானதாக ஆக்குகின்றன என்று டாக்டர் ஜிதேந்திர சிங் கூறினார். ரோபோடிக் அல்ட்ராசோனோகிராபி குறித்த தனது அனுபவத்தைப் பகிர்ந்துகொண்ட அவர், தொலைவிலிருந்து செயல்படுத்தப்படும் மருத்துவத் தொழில்நுட்பங்களின் சாத்தியக்கூறுகளை நிரூபிக்கும் வகையில், அண்டார்டிகாவில் 10,000 கிலோமீட்டர் தொலைவில் உள்ள ஒரு நபருக்கு அல்ட்ராசவுண்ட் பரிசோதனை செய்ததாகக் கூறினார்.
சிறப்பு மருத்துவ சேவையின் பாரம்பரிய மாதிரியில் ஏற்படக்கூடிய மாற்றத்தை விவரித்த டாக்டர் ஜிதேந்திர சிங், “நோயாளி மருத்துவரிடம் அனுப்பப்படுவதற்குப் பதிலாக, மருத்துவர் நோயாளியிடம் அனுப்பப்படுவார்” என்றார். புவியியல் எல்லைகளைக் கடந்து நோயாளிகளைச் சிறப்பு நிபுணத்துவம் சென்றடைய தொலைநிலை ரோபோடிக்ஸ் உதவும் என்றும், இதன்மூலம் நோயாளி சிறப்பு மருத்துவரிடம் பயணம் செய்ய வேண்டிய அவசியமின்றி மேம்பட்ட மருத்துவத் திறன்களை வழங்க முடியும் என்றும் அவர் கூறினார்.
இந்தியாவில் மாறிவரும் நோய்ப் பரவல் குறித்தும் அமைச்சர் பேசினார். இங்கு தொற்று நோய்கள், வளர்சிதை மாற்றம் மற்றும் வாழ்க்கை முறை தொடர்பான கோளாறுகளுடன் தொடர்ந்து இணைந்து காணப்படுகின்றன. பாரம்பரியமாக வாழ்வின் பிற்காலங்களில் ஏற்படும் நோய்கள், தற்போது இளம் வயதினரிடையே அதிகரித்து வருவதாகவும், இது மேம்பட்ட தொழில்நுட்பக் கருவிகள் மற்றும் மேலும் ஒருங்கிணைந்த, முழுமையான அணுகுமுறை ஆகிய இரண்டையும் தேவைப்படுத்தும் ஒரு சிக்கலான சுகாதாரச் சூழலை உருவாக்குவதாகவும் அவர் கூறினார்.
இந்தியாவின் சுகாதாரத் தேவைகளின் அளவும் பன்முகத்தன்மையும் புதிய தொழில்நுட்பங்களை ஏற்றுக்கொள்வதை மிகவும் முக்கியமானதாக ஆக்குகின்றன என்று டாக்டர் ஜிதேந்திர சிங் கூறினார். செயற்கை நுண்ணறிவு மற்றும் ரோபோட்டிக்ஸ் ஆகியவை நாடு முழுவதும் சுகாதார சேவைகளை வழங்குவதற்கு சக்திவாய்ந்த துணைக்கருவிகளாகச் செயல்பட முடியும், அதே நேரத்தில் துல்லியமான மற்றும் தனிப்பயனாக்கப்பட்ட மருத்துவத்தை நோக்கிய மாற்றத்திற்கும் ஆதரவளிக்க முடியும்.
ரோபோடிக் அறுவை சிகிச்சையை நிறுவனக் கற்றல், கல்வித்துறை மற்றும் தொழில்முறை மாநாட்டுத் தளங்களின் களத்திற்குள் கொண்டு வந்ததற்காக, எஸ்.ஆர்.எஸ் இந்தியா 2026 அமைப்பாளர்களுக்கு டாக்டர் ஜிதேந்திர சிங் வாழ்த்து தெரிவித்தார். மருத்துவ அறிவியலின் வேகமாக மாறிவரும் சூழலுக்கு ஈடுகொடுக்க, ரோபோடிக்ஸ் போன்ற வளர்ந்து வரும் தொழில்நுட்பங்களை ஏற்றுக்கொள்வது அவசியமாக இருக்கும் என்றும் அவர் கூறினார்
எம்.பிரபாகரன்