இந்தியாவில் புலிகள் பாதுகாப்பில் ஒரு முக்கிய மைல்கல்லாக, மத்திய சுற்றுச்சூழல், வனம் மற்றும் காலநிலை மாற்றத் துறை அமைச்சர் திரு. பூபேந்தர் யாதவ் மற்றும் மேற்கு வங்க முதலமைச்சர் திரு. சுவேந்து அதிகாரி ஆகியோர் முன்னிலையில், மேற்கு வங்கத்தில் உள்ள பக்ஸா புலிகள் காப்பகத்தில் இன்று ஒரு பெண் புலி விடுவிக்கப்பட்டது. வரலாற்று முக்கியத்துவம் வாய்ந்த இந்தப் புலிகள் வாழும் பகுதியில், நிலைத்திருக்கக்கூடிய மற்றும் தன்னிறைவு பெற்ற புலி இனத்தை மீட்டெடுப்பதை நோக்கமாகக் கொண்ட, கட்டம் கட்டமான புலி மீள் அறிமுகத் திட்டத்தின் தொடக்கத்துடன், இது இந்தியாவின் 2026 வனவிலங்கு வாரத்திற்கு ஒரு பொருத்தமான தொடக்கமாக அமைகிறது.
வெளியீட்டிற்குப் பிறகு சமூக ஊடகப் பதிவு ஒன்றில், பிரதமர் திரு நரேந்திர மோடியின் நிலப்பரப்புப் பாதுகாப்பு மற்றும் உயிரினப் பாதுகாப்புக்கான உந்துதலால், பக்ஸாவில் புலியை மீண்டும் அறிமுகப்படுத்தும் முக்கிய வாக்குறுதி இன்று நிறைவேற்றப்பட்டுள்ளது என்று திரு பூபேந்தர் யாதவ் குறிப்பிட்டார். இந்த வெற்றிகரமான மீள்அறிமுகத்திற்கு ஆதரவளித்த பீகார் முதலமைச்சர் திரு சம்ராட் சௌத்ரி மற்றும் மேற்கு வங்க முதலமைச்சர் திரு சுவேந்து அதிகாரி ஆகியோருக்கு அவர் நன்றி தெரிவித்தார்.
வரலாற்று ரீதியாக, பக்ஸா வட வங்காளத்தின் ஒரு முக்கியமான புலி வாழிடமாக இருந்து வந்துள்ளது. 1983-ல் புலிகள் காப்பகமாக அறிவிக்கப்பட்ட இது, பூட்டான் மற்றும் அசாமின் காடுகள் மற்றும் பாதுகாக்கப்பட்ட பகுதிகளுடன் இணைப்பைக் கொண்ட ஒரு பெரிய சூழலியல் நிலப்பரப்பின் ஒரு பகுதியாக அமைகிறது. இருப்பினும், பல தசாப்தங்களாக, வாழிடச் சீரழிவு மற்றும் துண்டாடல், நிலப் பயன்பாட்டில் ஏற்பட்ட மாற்றங்கள் மற்றும் இரையின் கிடைக்கும் தன்மை குறைதல் ஆகியவை, அங்கு நிரந்தரமாக வசிக்கும் புலி இனத்தொகையைத் தக்கவைக்கத் தேவையான சூழலியல் நிலைமைகளைப் பாதித்தன. அதன் விளைவாக, இந்தக் காப்பகத்தில் ஒரு நிலையான நிரந்தரப் புலி இனத்தொகை நீண்ட காலமாக இல்லாமல் போனது.
பக்ஸாவின் மீட்பு என்பது ஒரு நீடித்த, அறிவியல் அடிப்படையிலான முயற்சியாகும். மேற்கு வங்க அரசால், தேசிய புலிகள் பாதுகாப்பு ஆணையம் (NTCA) மற்றும் இந்திய வனவிலங்கு நிறுவனம் (WII) ஆகியவற்றின் ஆதரவுடன் தொடங்கப்பட்ட புலி பெருக்கம் மற்றும் மீட்புத் திட்டம், 2018 முதல் கூட்டாகச் செயல்படுத்தப்பட்டு வருகிறது. வாழ்விட மேம்பாடு, இரையின் இருப்பைப் பெருக்குதல், பாதுகாப்பு மற்றும் கண்காணிப்பை வலுப்படுத்துதல், அறிவியல் மதிப்பீடு மற்றும் திறன் மேம்பாடு ஆகியவற்றின் மூலம் புலி மீட்புக்குத் தேவையான சூழலியல் அடித்தளங்களை மீண்டும் உருவாக்குவதில் கவனம் செலுத்தப்படுகிறது. இரையின் இருப்பை அதிகரிக்க 800-க்கும் மேற்பட்ட புள்ளிமான்கள் விடுவிக்கப்பட்டுள்ளன, அதே நேரத்தில் கடந்த எட்டு ஆண்டுகளில் சுமார் 380 ஹெக்டேர் புல்வெளிகள் மீட்டெடுக்கப்பட்டுள்ளன அல்லது மாற்றியமைக்கப்பட்டுள்ளன. அறிவியல் கண்காணிப்பு, இரையின் எண்ணிக்கையில் ஒரு சாதகமான போக்கைக் காட்டியுள்ளது.
நீண்ட காலக் கண்காணிப்பு, நிலப்பரப்பின் வழியே புலிகளின் நடமாட்டம் குறித்த ஊக்கமளிக்கும் சான்றுகளையும் வழங்கியுள்ளது. கேமரா பொறிகள் 2021, 2023 மற்றும் 2026 ஆம் ஆண்டுகளில் புலிகளைப் பதிவு செய்தன. குறிப்பாக, 2023-ல் புகைப்படம் எடுக்கப்பட்ட ஒரு புலி, அசாமில் உள்ள மானஸ் புலிகள் காப்பகத்தைச் சேர்ந்த ஒரு புலியுடன் ஒப்பிடப்பட்டது. இது, அருகருகே உள்ள புலிகளின் நிலப்பரப்புகளுக்கு இடையே இயற்கையான நடமாட்டம் இருப்பதற்கான சான்றை வழங்குகிறது. தற்போதைய இந்த மேம்பாட்டுத் திட்டம், கவனமாகத் திட்டமிடப்பட்ட மற்றும் அறிவியல் பூர்வமாக வழிநடத்தப்பட்ட தலையீடுகள் மூலம், இயற்கையான மீட்சிக்குத் துணைபுரிய முயல்கிறது.
திட்டமிடப்பட்ட, படிப்படியான மற்றும் சூழலுக்கு ஏற்ப மாறும் மீட்புத் திட்டத்தின் முதல் கட்டமாக, இன்று பெண் புலி விடுவிக்கப்பட்டுள்ளது. தொடர்புடைய சூழலியல், கால்நடை மற்றும் மேலாண்மை அளவுருக்களை மதிப்பீடு செய்த பின்னரும், நிறுவப்பட்ட நெறிமுறைகளுக்கு இணங்கவும், இந்தப் புலி பீகாரில் உள்ள வால்மீகி புலிகள் காப்பகத்திலிருந்து இடமாற்றம் செய்யப்பட்டது. விடுவிக்கப்பட்ட பிறகு, தொலை அளவியல், கேமராப் பொறி மற்றும் கள அடிப்படையிலான கண்காணிப்பு ஆகியவற்றின் கலவையைப் பயன்படுத்தி, அந்த விலங்கு தீவிரமாகக் கண்காணிக்கப்படும். இது அதன் இயக்கம், சூழலுக்கு ஏற்ப தகவமைத்துக் கொள்ளுதல், ஆரோக்கியம் மற்றும் நடத்தை ஆகியவற்றை மதிப்பிட உதவும்.
இந்தத் திட்டம் பக்ஸாவிற்குப் புலிகளை மீண்டும் கொண்டு வருவது மட்டுமல்ல. ஒரு புலி இனத்தொகை நிலைபெற்று, இனப்பெருக்கம் செய்து, இறுதியில் நிலைத்து நின்று தன்னிறைவு பெறுவதற்கான சூழல்களை உருவாக்குவதே இதன் நோக்கமாகும். அறிவியல் ரீதியாக நியாயப்படுத்தப்படும் இடங்களில், வாழ்விடம் மற்றும் இரையின் இருப்பு, பாதுகாப்புத் தயார்நிலை, இனத்தொகையின் நிலைத்தன்மை, கண்காணிப்பு முடிவுகள் மற்றும் நிபுணர் ஆலோசனை ஆகியவற்றின் அடிப்படையில், மேலதிக இனத்தொகை விரிவாக்கம் கட்டம் கட்டமாக மேற்கொள்ளப்படும்.
இந்த மீட்பு முயற்சியில் சமூகப் பங்கேற்பு மையமாகத் தொடர்கிறது. இந்தத் திட்டம், சமூக உரையாடல், வாழ்வாதார வாய்ப்புகள், மனித-வனவிலங்கு மோதல் தணிப்பு மற்றும் பாதுகாப்பு சார்ந்த நன்மைகள் ஆகியவற்றிற்கு முக்கியத்துவம் அளித்து, 64 சூழல் மேம்பாட்டுக் குழுக்கள்/கூட்டு வன மேலாண்மைக் குழுக்களை ஈடுபடுத்தியுள்ளது. புலி மீட்புப் பணிகள் முன்னேறிச் செல்லும்போது, தொடர்ச்சியான சமூக ஈடுபாடும், சகவாழ்விற்கான பயனுள்ள வழிமுறைகளும் இத்திட்டத்தின் ஒருங்கிணைந்த பகுதியாகத் தொடரும்.
பக்ஸாவில் புலிகளின் மீட்சி, நிலப்பரப்பு அளவிலும் முக்கியத்துவம் வாய்ந்தது. வட வங்காளம், அசாம் மற்றும் பூட்டானுடனான அதன் சூழலியல் இணைப்புகள், ஒரு பெரிய, ஒன்றிணைந்த நிலப்பரப்பில் வனவிலங்குகளின் இயக்கம் மற்றும் பரவலுக்கான வாய்ப்புகளை வழங்குகின்றன. எனவே, பக்ஸாவை வலுப்படுத்துவது புலிப் பாதுகாப்பிற்கு மட்டுமல்லாமல், காடுகள், புல்வெளிகள், இரையாகும் உயிரினங்கள் மற்றும் பரந்த பல்லுயிர்ப் பாதுகாப்பிற்கும் தாக்கங்களை ஏற்படுத்துகிறது.
இன்றைய இந்த விடுதலை, பக்ஸாவின் பாதுகாப்புப் பயணத்தில் ஒரு புதிய அத்தியாயத்தின் தொடக்கத்தைக் குறிக்கிறது. வெற்றியின் அளவுகோல், விடுவிக்கப்பட்ட புலிகளின் எண்ணிக்கையாக இருக்காது; மாறாக, பாதுகாப்பான வாழ்விடம், போதுமான இரை, திறமையான பாதுகாப்பு, சூழலியல் இணைப்பு, அறிவியல் கண்காணிப்பு மற்றும் உள்ளூர் சமூகங்களின் அர்த்தமுள்ள பங்கேற்பு ஆகியவற்றின் ஆதரவுடன், காலப்போக்கில் ஆரோக்கியமான, சுதந்திரமாக உலவும் மற்றும் தன்னிறைவு பெற்ற ஒரு புலி இனத்தொகையை நிறுவுவதே ஆகும்
திவாஹர்