ரயில் பாலங்களின் உள்கட்டமைப்பை வலுப்படுத்தவும், மெட்ரோ ரயில் மின் அமைப்புகளை மேம்படுத்தவும், இந்திய ரயில்வே ₹895.30 கோடி மதிப்பிலான முக்கிய உள்கட்டமைப்பு மற்றும் திறன் மேம்பாட்டுத் திட்டங்களுக்கு ஒப்புதல் அளித்துள்ளது.
கொல்கத்தா மெட்ரோ மின் அமைப்பு விரிவாக்கம்
மெட்ரோ ரயில் திறனை மேம்படுத்துவதற்கான ஒரு முக்கிய நடவடிக்கையாக, கொல்கத்தா மெட்ரோ ரயில்வேயின் வடக்கு-தெற்கு வழித்தடத்தை வலுப்படுத்துவதற்காக ₹671.72 கோடி மதிப்பிலான பணிகள் அனுமதிக்கப்பட்டுள்ளன. இதில் பின்வருவன அடங்கும்:
₹291.06 கோடி செலவில் 07 புதிய இழுவை துணை மின் நிலையங்கள் அமைக்கப்பட்டுள்ளன.
கொல்கத்தா மெட்ரோ ரயில்வேயின் வடக்கு-தெற்கு வழித்தடத்திற்காக, KESP (எஸ்பிளனேட் மெட்ரோ) முதல் KMUK (காவி சுபாஷ் – நியூ காரியா) வரையிலான துணை துணை மின் நிலையம் (ASS) மற்றும் இழுவை துணை மின் நிலையம் (TSS) அமைப்புகளை மேம்படுத்துதல் மற்றும் தரம் உயர்த்துதல், அத்துடன் KNTJ (நேதாஜி மெட்ரோ நிலையம்) முதல் KKVS (காவி சுபாஷ் மெட்ரோ நிலையம்) வரையிலான உயர்த்தப்பட்ட பிரிவுகளில் தற்போதுள்ள 11 KV அமைப்பிலிருந்து 33 KV அமைப்பாக மேம்படுத்துதல் உட்பட மின் விநியோகத்தை அதிகரித்தல் ஆகிய பணிகள் ₹380.66 கோடி செலவில் மேற்கொள்ளப்படுகின்றன.
1980-களில் கட்டப்பட்ட கொல்கத்தா மெட்ரோ அமைப்பு, தொடக்கத்தில் சுமார் 5 நிமிட இடைவெளியில் ரயில்களை இயக்கும் வகையில் வடிவமைக்கப்பட்டது. பயணிகளின் தேவை அதிகரித்து வருவதால், அதிக இடைவெளியில் ரயில்களை இயக்க வேண்டிய தேவை அதிகரித்துள்ளது. இந்தத் திட்டத்திற்கு ஒப்புதல் அளிக்கப்பட்டதன் மூலம், கொல்கத்தா மெட்ரோ 2.5 நிமிட இடைவெளியில் இயங்க இயலும். இது வழித்தடத்தின் கொள்ளளவையும் சேவை இடைவெளியையும் கணிசமாக மேம்படுத்தும்.
தற்போதுள்ள துணை மின் நிலையங்களும் உபகரணங்களும் அவற்றின் கொள்ளளவு வரம்பை எட்டியுள்ளன, மேலும் உதிரி பாகங்கள் கிடைக்காததால் பராமரிப்புச் சவால்களை எதிர்கொள்கின்றன. அங்கீகரிக்கப்பட்ட இந்த மேம்படுத்தல், நம்பகமான மின் விநியோகத்தை உறுதிசெய்து, தொடர்வண்டி இயக்கங்களின் எண்ணிக்கையை அதிகரித்து, ஒட்டுமொத்த பயணிகள் சேவையையும் மேம்படுத்தும்.
அத்ரா பிரிவில் பால உள்கட்டமைப்பை வலுப்படுத்துதல்
தென்கிழக்கு ரயில்வேயின் கீழ், MDKD–DMA (மதுகுண்டா–தாமோதர்) பிரிவுக்கு இடையே 520 UP மற்றும் 520 DN பாலங்களின் (அடித்தளம்) கட்டுமானப் பணிகளுக்கும், அதனுடன் தொடர்புடைய யார்டு மறுசீரமைப்பு மற்றும் பாலத்தின் அணுகுசாலைப் பகுதிகளில் தண்டவாளப் பணிகள் மேற்கொள்வதற்கும் ₹223.58 கோடி மதிப்பிலான ஒரு திட்டத்திற்கு ஒப்புதல் அளிக்கப்பட்டுள்ளது.
1965-ல் (UP வழித்தடம்) மற்றும் 1903-ல் (DN வழித்தடம்) கட்டப்பட்ட, தற்போதுள்ள தாமோதர் பாலம் (பாலம் எண் 520), காலப்போக்கில் மிகவும் பழைமையாகி, கட்டமைப்புச் சிதைவுகளின் அறிகுறிகளைக் காட்டுகிறது. இதனால், அதன் அஸ்திவாரம் மற்றும் உட்கட்டமைப்பை மீண்டும் கட்ட வேண்டிய அவசியம் ஏற்பட்டுள்ளது.
இந்தப் பிரிவு, அசன்சோல் மற்றும் டாட்டாநகருக்கு இடையேயான ஒரு முக்கிய இரயில்வே இணைப்பாகும். இது ஒரு முக்கியமான DFC துணை வழித்தடம் மற்றும் நிலக்கரி வழித்தடத்தின் (சினி–புருலியா–அசன்சோல்) ஒரு பகுதியாக அமைகிறது. மேலும், இது 67 ஜிஎம்டி என்ற அதிக போக்குவரத்து அடர்த்தியைக் கொண்டுள்ளது. இந்தத் திட்டம் பாதுகாப்பு, நம்பகத்தன்மை மற்றும் செயல்பாட்டுத் திறனை மேம்படுத்தும்.
இந்த மறுசீரமைப்பு, ரயில் இணைப்பை மேம்படுத்துவதன் மூலம், துர்காபூர்-அசன்சோல் பகுதியில் உள்ள ஐஐஎஸ்சிஓ ஆலை, ஏசிசி ஆலை மற்றும் அனல் மின் நிலையங்கள் உள்ளிட்ட முக்கியத் தொழில்களுக்கு ஊக்கமளிக்கும் என்றும் எதிர்பார்க்கப்படுகிறது.
நவீன, பாதுகாப்பான மற்றும் அதிக கொள்ளளவு கொண்ட இரயில் அமைப்புகளை நோக்கி
இந்தத் திட்டங்கள் இந்திய ரயில்வே முழுவதும் நவீனமயமாக்கல், பாதுகாப்பு மேம்பாடு மற்றும் திறன் விரிவாக்கம் ஆகியவற்றை நோக்கிய ஒரு குறிப்பிடத்தக்க படியைக் குறிக்கின்றன. இந்தப் பாலத் திட்டம் முக்கியமான சரக்கு மற்றும் தொழிற்சாலை இணைப்பை வலுப்படுத்தும் அதே வேளையில், மெட்ரோ மின்சார மேம்பாடுகள் கொல்கத்தாவில் அதிக அதிர்வெண், மேம்பட்ட நம்பகத்தன்மை மற்றும் சிறந்த பயண அனுபவத்தை வழங்கும்.
இந்திய ரயில்வே, அதிகரித்து வரும் போக்குவரத்துத் தேவைகளைப் பூர்த்தி செய்வதோடு, பாதுகாப்பான, திறமையான மற்றும் எதிர்காலத்திற்கு ஏற்ற ரயில் செயல்பாடுகளை உறுதி செய்வதற்காகவும், வலுவான உள்கட்டமைப்பில் தொடர்ந்து முதலீடு செய்து வருகிறது.
எஸ்.சதிஸ் சர்மா