மே மாத கடும் வெப்பம் குறித்து பீதியடையத் தேவையில்லை; எளிய முன்னெச்சரிக்கை நடவடிக்கைகள் மூலம் அதன் தாக்கத்தைத் திறம்படக் கட்டுப்படுத்தலாம்: டாக்டர் ஜிதேந்திர சிங்.

அறிவியல் மற்றும் தொழில்நுட்பம், புவி அறிவியல் ஆகிய துறைகளின் மத்திய இணை அமைச்சரும் (தனிப் பொறுப்பு), பிரதமர் அலுவலகம், பணியாளர், பொதுக் குறைகள், ஓய்வூதியங்கள், அணுசக்தி மற்றும் விண்வெளித் துறை இணை அமைச்சருமான டாக்டர் ஜிதேந்திர சிங், மே மாதத்தில் கணிக்கப்பட்டுள்ள அல்லது எதிர்பார்க்கப்படும் வெப்ப நிலவரம் குறித்து பீதியடையத் தேவையில்லை என்றும், வானிலை முன்னறிவிப்பைச் சரியாகப் புரிந்துகொள்வதன் மூலமும், எளிய அன்றாட முன்னெச்சரிக்கை நடவடிக்கைகளைப் பின்பற்றுவதன் மூலமும் தேவையற்ற எதிர்வினைகளைத் தவிர்க்கலாம் என்றும் இன்று பொதுமக்களுக்கு உறுதியளித்தார்.

தனது அலுவலகத்தில் ஊடகங்களுக்குப் பேட்டியளித்த டாக்டர் ஜிதேந்திர சிங், சில பிராந்தியங்களில் இயல்பை விட அதிகமான வெப்பநிலை மற்றும் வெப்ப அலை நிலவக்கூடும் என்றாலும், இவை நாடு முழுவதும் ஒரே சீராக இருப்பதில்லை என்றும், இந்திய வானிலை ஆய்வுத் துறையால் (IMD) அவ்வப்போது வெளியிடப்படும் அறிவுரைகளை உரிய நேரத்தில் பின்பற்றுவதன் மூலமும், அதற்கான ஆயத்த நடவடிக்கைகளை மேற்கொள்வதன் மூலமும் இவற்றைத் திறம்பட நிர்வகிக்க முடியும் என்றும் கூறினார்.

இந்திய வானிலை ஆய்வு மையம் (IMD) வெளியிட்டுள்ள சமீபத்திய மாதாந்திர கண்ணோட்டம் மற்றும் நீண்ட கால முன்னறிவிப்பைக் குறிப்பிட்டு, தென்னிந்திய தீபகற்ப இந்தியா, வடகிழக்கு மற்றும் வடமேற்கு இந்தியாவின் சில பகுதிகளில் இயல்பை விட அதிகமான அதிகபட்ச வெப்பநிலை நிலவக்கூடும் என்றும், அதே சமயம் நாட்டின் பெரும்பகுதியில் இந்த மாதத்தில் இயல்பான அல்லது இயல்பை விடக் குறைவான வெப்பநிலை நிலவும் என்றும் அமைச்சர் கூறினார். பல பிராந்தியங்களில் குறைந்தபட்ச வெப்பநிலையும் இயல்பை விட அதிகமாகவே இருக்கும் என எதிர்பார்க்கப்படுகிறது.

இமயமலை அடிவாரப் பகுதிகள், ஒடிசா, கடலோர ஆந்திரப் பிரதேசம் மற்றும் அதை ஒட்டிய தமிழ்நாடு உள்ளிட்ட கிழக்குக் கடற்கரைப் பகுதிகள், அத்துடன் குஜராத் மற்றும் மகாராஷ்டிரா ஆகிய பிராந்தியங்களில் இயல்பை விட சுமார் 2-4 நாட்கள் வெப்ப அலை நாட்கள் அதிகரித்து, வெப்ப அலை நிலவக்கூடும் என வானிலை முன்னறிவிப்பு சுட்டிக்காட்டுகிறது என்று அவர் மேலும் கூறினார்.

நீட்டிக்கப்பட்ட கால முன்னறிவிப்பின்படி, மே மாதத்தின் இரண்டாவது (மே 8–14) மற்றும் நான்காவது (மே 22–28) வாரங்களில் ஒப்பீட்டளவில் அதிக வெப்பநிலை எதிர்பார்க்கப்படுவதாகவும், இது வடமேற்கு, மத்திய மற்றும் மேற்கு இந்தியாவின் சில பகுதிகள் மற்றும் கிழக்குக் கடற்கரை முழுவதும் வெப்ப அலை நிலவ வழிவகுக்கக்கூடும் என்றும் டாக்டர் ஜிதேந்திர சிங் கூறினார். முதல் மற்றும் மூன்றாவது வாரங்களில் (மே 1–7 மற்றும் மே 15–21), மேற்கத்திய இடையூறுகள் மற்றும் இடியுடன் கூடிய மழையுடன் தொடர்புடைய மழை மற்றும் மேகமூட்டம் காரணமாக நாட்டின் பெரும்பாலான பகுதிகளில் இயல்பான அல்லது இயல்பை விடக் குறைவான வெப்பநிலை நிலவ வாய்ப்புள்ளது.

எம்‌.பிரபாகரன்