மத்திய மின் பொறியியல் சேவை (CPES) மற்றும் இந்தியப் பொருளாதார சேவை (IES) ஆகியவற்றின் அதிகாரிகள் இன்று (மார்ச் 27, 2026) ராஷ்டிரபதி பவனில் இந்தியக் குடியரசுத் தலைவர் திருமதி திரௌபதி முர்முவைச் சந்தித்தனர்.
அதிகாரிகளிடம் உரையாற்றிய குடியரசுத் தலைவர், அவர்கள் இந்தியாவின் வளர்ச்சியில் முன்னணியில் நிற்கிறார்கள் என்றும், அவர்களின் முடிவுகள் வலிமையான மற்றும் தற்சார்புடைய இந்தியாவைக் கட்டமைக்க உதவும் என்றும் கூறினார். அனைவரையும் உள்ளடக்கிய மற்றும் நிலையான வளர்ச்சியை ஊக்குவிக்கும் கொள்கைகளை வகுப்பதிலும், சீர்திருத்தங்களைச் செயல்படுத்துவதிலும் அவர்கள் முக்கியப் பங்கு வகிப்பார்கள். அர்ப்பணிப்பு மற்றும் பேரார்வத்துடன் பணியாற்றுமாறு அவர் அவர்களுக்கு அறிவுறுத்தினார். அவர்கள் தங்கள் பயணத்தில் பல சவால்களை எதிர்கொள்ள நேரிடலாம், ஆனால் இந்த சவால்கள் தேசத்தைக் கட்டமைப்பதில் அர்த்தமுள்ள பங்களிப்பைச் செய்வதற்கு மகத்தான வாய்ப்புகளை வழங்குகின்றன என்று அவர் கூறினார். அவர்கள் எப்போதும் ஆர்வ உணர்வு, புதுமைக்கான அர்ப்பணிப்பு மற்றும் தொடர்ந்து கற்றுக்கொள்ளும் விருப்பம் ஆகியவற்றுடன் தங்கள் பொறுப்புகளை நிறைவேற்ற வேண்டும்.
மத்திய மின் பொறியியல் சேவை அதிகாரிகளிடம் உரையாற்றிய ஜனாதிபதி, நாட்டின் தொழில் வளர்ச்சி, புத்தாக்கம், மேம்பட்ட வாழ்க்கைத்தரம் மற்றும் ஒட்டுமொத்த சமூக-பொருளாதார முன்னேற்றம் ஆகியவற்றிற்கு மின்சாரமே உந்துசக்தியாக விளங்குகிறது என்று கூறினார். மின் அமைப்புகளின் தரம், நம்பகத்தன்மை மற்றும் பாதுகாப்பை உறுதி செய்வதோடு, மின்சார உற்பத்தி, மின் கடத்தல் மற்றும் மின் விநியோகம் ஆகிய துறைகளில் திட்டமிடல் மற்றும் மேம்பாட்டிற்கு மத்திய மின் பொறியியல் சேவை பெரும் பங்களிப்பை வழங்கி வருவதாக அவர் குறிப்பிட்டார். சிறந்த பொறியியல் நடைமுறைகள் மற்றும் புதுமையான தீர்வுகள் மூலம் நாட்டின் மின் உள்கட்டமைப்பை வலுப்படுத்துவதில் மத்திய மின் பொறியியல் சேவை அதிகாரிகளின் பங்கு மிகவும் முக்கியமானதாக இருக்கும் என்றும் அவர் கூறினார்.
இந்தியப் பொருளாதார சேவை அதிகாரிகளிடம் உரையாற்றிய குடியரசுத் தலைவர், வேகமாக மாறிவரும் உலக மற்றும் உள்நாட்டுச் சூழலில், பொதுச் சேவையில் பொருளாதாரத் திட்டமிடல் மற்றும் செயல்படுத்தலின் பங்கு முன்னெப்போதையும் விட முக்கியத்துவம் வாய்ந்ததாக மாறியுள்ளது என்று கூறினார். நிலையான வளர்ச்சியை உறுதி செய்வதிலும், பணவீக்கத்தைக் கட்டுப்படுத்துவதிலும், வேலைவாய்ப்புகளை அதிகரிப்பதிலும், ஏற்றத்தாழ்வுகளைக் குறைப்பதிலும், சிக்கலான சூழலில் பொருளாதாரத்தை வழிநடத்துவதிலும் இந்தியப் பொருளாதார சேவை அதிகாரிகளின் பங்கு குறிப்பிடத்தக்கதாக இருக்கும் என்று அவர் குறிப்பிட்டார். ஒவ்வொரு புள்ளிவிவரத்தின் பின்னாலும் ஒரு மனிதக் கதை உள்ளது என்பதை நினைவில் கொள்ளுமாறு அவர் அவர்களுக்கு அறிவுறுத்தினார். பொருளாதாரக் கொள்கையின் உண்மையான அளவுகோல் வெறும் எண்களில் இல்லை, அதன் விளைவுகளில்தான் உள்ளது என்று அவர் கூறினார். அது மக்களின், குறிப்பாக மிகவும் நலிவடைந்தவர்களின் வாழ்க்கையை மேம்படுத்த வேண்டும்.
திவாஹர்