வரலாற்றுச் சிறப்புமிக்க சீர்திருத்தங்களைத் தொடர்ந்து இந்தியாவின் விண்வெளித் துறை முன்னெப்போதும் இல்லாத வேகத்தைப் பெற்றுள்ளது. தனியார் முதலீடு 618.5 மில்லியன் அமெரிக்க டாலர்களைத் தாண்டியுள்ளது, தனியார் நிறுவனங்களுக்கு 105 அங்கீகாரங்கள் வழங்கப்பட்டுள்ளன, மேலும் மூலோபாய மற்றும் தேசிய பாதுகாப்பு நலன்களைப் பாதுகாப்பதோடு, தனியார் பங்கேற்பை ஊக்குவிக்கும் வகையில் வலுவான ஒழுங்குமுறை கட்டமைப்பும் பலப்படுத்தப்பட்டுள்ளது என்று அறிவியல் மற்றும் தொழில்நுட்பம், புவி அறிவியல் துறைகளின் (தனிப் பொறுப்பு) மத்திய இணை அமைச்சரும், பிரதமர் அலுவலகத்தின் இணை அமைச்சருமான டாக்டர் ஜிதேந்திர சிங் இன்று மாநிலங்களவையில் தெரிவித்தார்.
மாநிலங்களவையில் நட்சத்திரக்குறியிடப்படாத கேள்விக்கு பதிலளித்த டாக்டர் ஜிதேந்திர சிங், 2026 ஆம் ஆண்டில் 187 மில்லியன் அமெரிக்க டாலர் தனியார் முதலீடு பதிவாகியுள்ளதாகவும், ஜூலை 14, 2026 நிலவரப்படி அரசு சாரா நிறுவனங்களுக்கு (NGEs) 105 அங்கீகாரங்கள் வழங்கப்பட்டுள்ளதாகவும் கூறினார். கடந்த சில ஆண்டுகளில் ஒட்டுமொத்த தனியார் நிதியுதவி கிட்டத்தட்ட ஆறு மடங்கு விரிவடைந்து, 2021-22ல் 100.5 மில்லியன் அமெரிக்க டாலரிலிருந்து 2023-24ல் 348.5 மில்லியன் அமெரிக்க டாலராக உயர்ந்து, மார்ச் 31, 2026க்குள் 618.5 மில்லியன் அமெரிக்க டாலரை எட்டியுள்ளது என்றும், இது இந்தியாவின் வேகமாக வளர்ந்து வரும் விண்வெளிச் சூழலமைப்பில் உள்நாட்டு மற்றும் உலகளாவிய முதலீட்டாளர்களின் வளர்ந்து வரும் நம்பிக்கையைப் பிரதிபலிக்கிறது என்றும் அவர் கூறினார்.
விரைவான வணிக வளர்ச்சிக்கு இணையாக வலுவான தேசியப் பாதுகாப்பு ஏற்பாடுகளும் இருப்பதை உறுதி செய்வதில் அரசாங்கத்தின் அசைக்க முடியாத அர்ப்பணிப்பை எடுத்துரைத்த டாக்டர் ஜிதேந்திர சிங், தனியார் விண்வெளி நடவடிக்கைகளுக்கான ஒவ்வொரு விண்ணப்பமும், அங்கீகாரம் வழங்கப்படுவதற்கு முன்பு, உத்திசார், பாதுகாப்பு மற்றும் தேசிய நலன்களை உரிய முறையில் கருத்தில் கொண்டு, IN-SPACe-இன் விதிமுறைகள், வழிகாட்டுதல்கள் மற்றும் நடைமுறைகளின் (NGP) கீழ் மதிப்பீடு செய்யப்படுகிறது என்று சபையில் தெரிவித்தார். மேலும் அவர், தனியார் பங்கேற்பு தொடர்ந்து விரிவடைந்து வருவதால், நாட்டின் ஒழுங்குமுறை கட்டமைப்பை மேலும் வலுப்படுத்தும் நோக்கில், சம்பந்தப்பட்ட தரப்பினருடன் கலந்தாலோசித்து, இந்தியாவில் விண்வெளி நடவடிக்கைகளுக்கான பிரத்யேக பாதுகாப்பு வழிகாட்டுதல்களை IN-SPACe தயாரித்து வருவதாகவும் கூறினார்.
இந்தியாவின் தனியார் விண்வெளித் துறையின் வளர்ச்சியை விரைவுபடுத்துவதற்காக, அரசாங்கம் ஒரே நேரத்தில் ஒரு விரிவான கொள்கை, ஒழுங்குமுறை மற்றும் நிதிச் சூழலமைப்பை உருவாக்கியுள்ளது என்று அமைச்சர் கூறினார். முக்கியத் தலையீடுகளில், இந்திய விண்வெளிக் கொள்கை 2023-ஐ செயல்படுத்துதல், தாராளமயமாக்கப்பட்ட அந்நிய நேரடி முதலீட்டுக் (FDI) கொள்கை, IN-SPACe மூலம் நெறிப்படுத்தப்பட்ட அங்கீகார நடைமுறைகள், இஸ்ரோ வசதிகளுக்கான சலுகை அணுகல், ₹1,000 கோடி துணிகர மூலதன நிதி, ₹500 கோடி தொழில்நுட்பத் தத்தெடுப்பு நிதி, IN-SPACe தொடக்க நிதித் திட்டம், தொழில்முனைவோர் மற்றும் அடைகாப்பு ஆதரவு, இஸ்ரோவிலிருந்து தொழில்நுட்பப் பரிமாற்றம், மலிவு விலை சோதனை உள்கட்டமைப்பு, திறன் மேம்பாட்டு முயற்சிகள் மற்றும் புத்தாக்கம் மற்றும் வணிகமயமாக்கலை ஊக்குவிப்பதற்கான தொடர்ச்சியான தொழில் துறை தொடர்புத் திட்டங்கள் ஆகியவை அடங்கும்.
இந்தியாவின் விண்வெளி லட்சியங்களுக்குப் பெருகிய முறையில் பங்களித்து வரும் ஒரு துடிப்பான ஸ்டார்ட்அப் சூழலமைப்பு உருவாகி வருவதைப் பிரதிபலிக்கும் வகையில், இதுவரை 17 விண்வெளி ஸ்டார்ட்அப் நிறுவனங்கள் விண்வெளி நடவடிக்கைகளை மேற்கொள்வதற்காக IN-SPACe அமைப்பால் அங்கீகரிக்கப்பட்டுள்ளதாக டாக்டர் ஜிதேந்திர சிங் மாநிலங்களவையில் தெரிவித்தார்.
2020-ஆம் ஆண்டின் விண்வெளித் துறை சீர்திருத்தங்கள் குறித்த IN-SPACe-இன் தாக்க மதிப்பீட்டின் முடிவுகளைப் பகிர்ந்துகொண்ட அமைச்சர், இந்த சீர்திருத்தங்கள் ஆறு ஆண்டுகளில் இந்தியாவின் தனியார் விண்வெளித் துறையை மாற்றியமைத்துள்ளன என்றார். 2014-ல் வெறும் ஒன்றாக இருந்த செயல்படும் விண்வெளி ஸ்டார்ட்அப் நிறுவனங்களின் எண்ணிக்கை இன்று 400-க்கும் மேலாக அதிகரித்துள்ளது, அதே நேரத்தில் தனியார் முதலீடு 600 மில்லியன் அமெரிக்க டாலர்களைத் தாண்டியுள்ளது. இந்திய தனியார் நிறுவனங்கள், ஏவுதல் மற்றும் சுற்றுப்பாதை திறன்களை வெற்றிகரமாக நிரூபித்துள்ளன, 30-க்கும் மேற்பட்ட செயற்கைக்கோள்களை சுற்றுப்பாதையில் நிலைநிறுத்தியுள்ளன, மேலும் PSLV சுற்றுப்பாதை சோதனைத் தொகுதி (POEM) போன்ற தளங்கள் மூலம் கிட்டத்தட்ட 45 பேலோடுகளை விண்ணில் செலுத்தியுள்ளன. இது நாட்டின் தனியார் விண்வெளித் துறையின் வளர்ந்து வரும் தொழில்நுட்ப ஆழத்தையும் வணிக முதிர்ச்சியையும் குறிக்கிறது.
இந்தத் தாக்க மதிப்பீடு, விண்வெளிப் பொருளாதாரத்தில் இந்தியாவின் வளர்ந்து வரும் உலகளாவிய பங்களிப்பை மேலும் எடுத்துக்காட்டுகிறது. இந்திய விண்வெளி நிறுவனங்கள் சர்வதேச முதலீடுகளை ஈர்த்து, வெளிநாட்டுச் செயல்பாடுகளை விரிவுபடுத்தி, முன்னணி உலகளாவிய கூட்டாளர்களுடன் இணைந்து செயல்படுகின்றன. அதே நேரத்தில், IN-SPACe 45-க்கும் மேற்பட்ட நாடுகளுடன் பணி உறவுகளை ஏற்படுத்தி, வெளிநாட்டு விண்வெளி நிறுவனங்களுடன் ஒத்துழைப்பு ஒப்பந்தங்களில் கையெழுத்திட்டுள்ளது. உள்நாட்டில், புவி கண்காணிப்பு பொது-தனியார் கூட்டாண்மை (EO-PPP), சுமார் ₹1,200 கோடி தனியார் முதலீட்டு உறுதிப்பாட்டுடன், நாட்டின் முதல் தனியார் புவி கண்காணிப்பு செயற்கைக்கோள் தொகுப்பை உருவாக்க முன்னணி இந்திய நிறுவனங்களை ஒன்றிணைத்துள்ளது. இது இந்தியாவின் விண்வெளி சீர்திருத்தங்கள் மீது தொழில்துறையின் வளர்ந்து வரும் நம்பிக்கையை வெளிப்படுத்துகிறது.
திவாஹர்