ஒரு பெரிய நடவடிக்கையில், வருவாய் புலனாய்வு இயக்குநரகத்தின் (DRI) அதிகாரிகள், குஜராத்தின் அங்க்ளேஷ்வரில் உள்ள ஒரு குடியிருப்பு வளாகத்தில் இருந்து இயங்கி வந்த ரகசிய மெஃபெட்ரோன் உற்பத்தி ஆலையை வெற்றிகரமாக முடக்கியதுடன், இந்த சட்டவிரோத போதைப்பொருள் உற்பத்தி மற்றும் கடத்தல் வலையமைப்பில் ஈடுபட்ட மூன்று நபர்களையும் கைது செய்தனர்.
உளவுத்துறை தலைமையிலான ஒரு நடவடிக்கையில், DRI அதிகாரிகள், மெஃபெட்ரோனை இரகசியமாகத் தயாரிப்பதற்காகப் பயன்படுத்தப்படும் தொழில்துறை அடுப்பு உலர்த்தி, சூடேற்றும் தட்டு வெப்பமூட்டிகள், மின்தேக்கி அமைப்பு, மின்சாரக் கலக்கி மற்றும் பிற ஆய்வக உபகரணங்கள் உள்ளிட்ட அதிநவீன உற்பத்திச் சாதனங்களுடன் கூடிய, முழுமையாகச் செயல்படும் ஒரு சட்டவிரோத ஆய்வகத்தைக் கண்டுபிடித்தனர்.
இந்த சோதனையின் விளைவாக, 1.349 கிலோ திட வடிவிலான மெஃபெட்ரோன், கட்டுப்படுத்தப்பட்ட முன்னோடி இரசாயனமான 6.825 கிலோ 2-ப்ரோமோ-4-மெத்தில்ப்ரோபியோபீனோன், மெஃபெட்ரோன் தயாரிப்பில் பயன்படுத்தப்படும் மற்றொரு அத்தியாவசிய இரசாயனமான 120 லிட்டர் மோனோமெதிலமைன் (MMA), 60 கிலோ ஹைட்ரோப்ரோமிக் அமிலம் (HBr), 40 லிட்டர் டோலுயீன் மற்றும் கலப்பு அமிலங்கள் (HBr மற்றும் HCl) அடங்கிய இரண்டு கொள்கலன்கள் ஆகியவை மீட்கப்பட்டன. இவை அனைத்தும் 1985 ஆம் ஆண்டின் போதை மருந்துகள் மற்றும் மனோவியல் பொருட்கள் (NDPS) சட்டத்தின் விதிகளின் கீழ் பறிமுதல் செய்யப்பட்டன.
தெருக்களில் பொதுவாக “மியாவ் மியாவ்”, “எம்டி”, “எம்-கேட்” அல்லது “ட்ரோன்” என்று அறியப்படும் மெஃபெட்ரோன், அதிக போதைத்தன்மை கொண்ட ஒரு செயற்கை மனோவியல் பொருளாகும். இது இந்தியாவில் மிகவும் தவறாகப் பயன்படுத்தப்படும் ஊக்கமருந்துகளில் ஒன்றாக உருவெடுத்துள்ளது. இது 1985 ஆம் ஆண்டின் NDPS சட்டத்தின் கீழ் ஒரு மனோவியல் பொருளாக அறிவிக்கப்பட்டுள்ளது. இதனால், அங்கீகரிக்கப்பட்ட அறிவியல் அல்லது மருத்துவ நோக்கங்களைத் தவிர, இதன் உற்பத்தி, வைத்திருத்தல், விற்பனை, போக்குவரத்து மற்றும் கடத்தல் ஆகியவை சட்டவிரோதமானவை.
குற்றம் சாட்டப்பட்டவரின் குடியிருப்பு வளாகங்களில் ஒரே நேரத்தில் நடத்தப்பட்ட சோதனைகளில், சட்டவிரோத போதைப்பொருள் கடத்தல் மூலம் கிடைத்ததாகக் கருதப்படும் ரூ. 20 லட்சம் மீட்கப்பட்டது. இதைத் தொடர்ந்து நடத்தப்பட்ட ஒரு விரைவான நடவடிக்கையில், தயாரிக்கப்பட்ட போதைப்பொருளைப் பெறவிருந்த நபரை டிஆர்ஐ அதிகாரிகள் கைதுசெய்தனர். மேலும், மெஃபெட்ரோன் போதைப்பொருளைப் பெற்றுக்கொள்வதற்கான முன்பணமாகக் கொண்டுவரப்பட்டிருந்த ரூ. 1 லட்சத்தையும் அவர்கள் மீட்டெடுத்தனர். இந்த வழக்கு தொடர்பாக மொத்தம் மூன்று பேர் கைது செய்யப்பட்டுள்ளனர்.
ஆய்வகத்தை அமைப்பதும், அத்தியாவசிய இரசாயனங்களை கணிசமான அளவில் கொள்முதல் செய்வதும், உற்பத்தித் திறனை கணிசமாக விரிவுபடுத்துவதற்கான தயாரிப்புகளைச் சுட்டிக்காட்டுகின்றன. டி.ஆர்.ஐ அதிகாரிகளின் சரியான நேரத் தலையீடு, எந்தவொரு பெரிய அளவிலான உற்பத்தித் திட்டங்களையும் வெற்றிகரமாக முறியடித்தது .
எஸ்.சதிஸ் சர்மா