இந்தியாவிலிருந்து மாம்பழங்கள் இறக்குமதி செய்வதற்கு நேபாளம் தடை அல்லது இடைநிறுத்தம் விதித்துள்ளதாகச் சில ஊடகச் செய்திகள் தெரிவித்துள்ளன என்பது வேளாண்மை மற்றும் விவசாயிகள் நல அமைச்சகத்தின் கவனத்திற்கு வந்துள்ளது. இந்தச் செய்திகள் உண்மையில் தவறானவை மற்றும் மக்களைத் தவறாக வழிநடத்துபவை ஆகும்.
நேபாள அரசாங்கம், தனது தாவரத் தனிமைப்படுத்தல் மற்றும் பூச்சிக்கொல்லி மேலாண்மை மையம் (நேபாளத்தின் தேசிய தாவரப் பாதுகாப்பு அமைப்பு) மூலம், இந்திய மாம்பழங்களின் இறக்குமதிக்கு எந்தத் தடையும் விதிக்கப்படவில்லை என்று 2026 ஜூன் 10 அன்று தெளிவுபடுத்தியுள்ளது. பரிந்துரைக்கப்பட்ட தாவர சுகாதாரத் தேவைகளுக்கு உட்பட்டு இறக்குமதி தொடர்ந்து அனுமதிக்கப்படுகிறது. இந்தத் தேவைகளைப் பூர்த்தி செய்த பின்னரும், இந்திய அரசாங்கத்தால் வழங்கப்பட்ட செல்லுபடியாகும் தாவர சுகாதாரச் சான்றிதழ்களைச் சமர்ப்பித்த பின்னரும் இறக்குமதி அனுமதிகளும் விடுவிப்பு ஆணைகளும் வழங்கப்படுகின்றன.
நேபாளத்திற்கான இந்திய மாம்பழ ஏற்றுமதி தடையின்றி தொடர்கிறது. ஜனவரி 2026 முதல், மொத்தம் 2005 மெட்ரிக் டன் மாம்பழங்கள் அடங்கிய 149 சரக்குகள் நேபாளத்திற்கு ஏற்றுமதி செய்யப்பட்டுள்ளன. ஜூன் 2026 மாதத்தில் மட்டும், இதுவரை மொத்தம் 266 மெட்ரிக் டன் எடையுள்ள 18 சரக்குகள் ஏற்றுமதி செய்யப்பட்டுள்ளன.
நேபாளம் சமீபத்தில் வெந்நீர் சுத்திகரிப்பு (HWT) தேவை உள்ளிட்ட சில இறக்குமதி நிபந்தனைகளைத் திருத்தியமைத்துள்ள போதிலும், இந்தியா பரிந்துரைக்கப்பட்ட தேவைகளுக்கு இணங்க ஏற்றுமதியைத் தொடர்ந்து எளிதாக்கி வருகிறது. அதே நேரத்தில், முன் ஆலோசனை இன்றி புதிய தாவர சுகாதார நடவடிக்கைகள் அறிமுகப்படுத்தப்படுவது குறித்த தனது கவலைகளை இந்தியா தெரிவித்துள்ளதுடன், உலக வர்த்தக அமைப்பின் (WTO) தாவர சுகாதார பாதுகாப்பு ஒப்பந்தம் (SPS) மற்றும் சர்வதேச தாவர பாதுகாப்பு மாநாட்டு (IPPC) கட்டமைப்புக்கு இணங்க, பொருத்தமான இருதரப்பு வழிமுறைகள் மூலம் இந்த விஷயத்தை முன்னெடுத்து வருகிறது.
இறக்குமதி மற்றும் ஏற்றுமதி விதிமுறைகள் தொடர்பான தகவல்களுக்கு அதிகாரப்பூர்வ அறிவிப்புகளையே நம்புமாறும், நேபாளத்திற்கான இந்திய மாம்பழ ஏற்றுமதி மீது ஏதேனும் வர்த்தகக் கட்டுப்பாடுகள் விதிக்கப்பட்டுள்ளதாகக் கூறப்படும் சரிபார்க்கப்படாத அறிக்கைகளைப் புறக்கணிக்குமாறும் சம்பந்தப்பட்டவர்கள், வர்த்தகர்கள் மற்றும் பொதுமக்களுக்கு அறிவுறுத்தப்படுகிறது.
திவாஹர்