மேற்கு இமயமலையின் மூலோபாய முக்கியத்துவம் வாய்ந்த பகுதிகளில் ஆறு தசாப்தங்களுக்கும் மேலான அர்ப்பணிப்புமிக்க சேவையைக் குறிக்கும் வகையில், எல்லைச் சாலைகள் அமைப்பின் (BRO) தீபக் திட்டம் , தனது 66 வது நிறுவன தினத்தை 2026 மே 04 அன்று இமாச்சலப் பிரதேசத்தின் சிம்லாவில் கொண்டாடுகிறது.
சிம்லா, கின்னௌர், குலு மற்றும் லாஹௌல்-ஸ்பிதி உள்ளிட்ட இமாச்சலப் பிரதேசத்தின் முக்கிய மாவட்டங்களை உள்ளடக்கிய பொறுப்புப் பகுதியைக் கொண்டுள்ள, மிகப் பழமையான திட்டங்களில் ஒன்றான தீபக் திட்டம், வரலாற்றுச் சிறப்புமிக்க இந்துஸ்தான்-திபெத் சாலையின் கட்டுமானம் மற்றும் மணாலி-லே அச்சின் முக்கியப் பகுதிகள் போன்ற முக்கிய உள்கட்டமைப்புகளை மேம்படுத்துவதிலும் முன்னணியில் இருந்து வருகிறது. இத்திட்டம், மூலோபாய சாலை வலையமைப்புகளைக் கட்டமைப்பதிலும், மேம்படுத்துவதிலும் மற்றும் பராமரிப்பதிலும் முக்கியப் பங்காற்றியுள்ளது. இதன் மூலம் தொலைதூர எல்லைப் பகுதிகளுக்கான இணைப்பை உறுதிசெய்து, தேசியப் பாதுகாப்பு மற்றும் பிராந்திய வளர்ச்சிக்கு கணிசமாகப் பங்களித்துள்ளது.
உள்கட்டமைப்பு மேம்பாட்டுடன் கூடுதலாக, இந்தத் திட்டம் பேரிடர் மேலாண்மை மற்றும் மனிதாபிமான உதவிகளிலும் சிறப்பான அர்ப்பணிப்பை வெளிப்படுத்தியுள்ளது. இத்திட்டத்தின் கீழ், இயற்கை பேரிடர்களின் போது எண்ணற்ற மீட்பு நடவடிக்கைகள் வெற்றிகரமாக மேற்கொள்ளப்பட்டுள்ளன. குறிப்பாக, மே 2023-ல், பரலாச்சலா கணவாயில் சிக்கிக்கொண்டிருந்த சுமார் 300 வாகன ஓட்டிகளை BRO குழுக்கள் மீட்டன. மேலும், ஜூலை 2023-ல், சவாலான உயரமான மலைப்பகுதி மீட்புப் பணியின் போது சந்திரதாலில் இருந்து 250-க்கும் மேற்பட்ட பொதுமக்கள் வெளியேற்றப்பட்டனர்.
1961-ல் உருவாக்கப்பட்ட இந்தத் திட்டம், நாட்டின் மிகவும் சவாலான நிலப்பரப்புகளில் சிலவற்றில் முக்கிய உள்கட்டமைப்புப் பணிகளைச் செயல்படுத்துவதில் முக்கியப் பங்காற்றியுள்ளது. முக்கியமான உயரமான மற்றும் எல்லைச் சாலைகள் உட்பட 1,100 கி.மீ-க்கும் அதிகமான சாலை வலையமைப்பைக் கையாளும் பொறுப்பு ஒப்படைக்கப்பட்ட இத்திட்டம், பாதுகாப்புப் படைகளுக்கு முக்கியத் தகவல் தொடர்பு வழிகளைப் பராமரிப்பதிலும், உயரமான பகுதிகளில் செயல்பாட்டுத் தயார்நிலையை உறுதி செய்வதிலும் தொடர்ந்து ஆதரவளிப்பதன் மூலம், பாதுகாப்புத் தயார்நிலையை வலுப்படுத்துவதில் ஒரு முக்கியப் பங்கை ஆற்றியுள்ளது.
திவாஹர்