பிரதமர் திரு நரேந்திர மோடி, இன்று உத்தரப் பிரதேசத்தின் ஜெவார் பகுதியில் நொய்டா சர்வதேச விமான நிலையத்தைத் திறந்து வைத்தார். இந்த நிகழ்வில் தனது பெருமிதத்தையும் மகிழ்ச்சியையும் வெளிப்படுத்திய பிரதமர், ‘விக்ஷித் உ.பி., விக்ஷித் பாரத் அபியான்’ திட்டத்தில் இன்று ஒரு புதிய அத்தியாயம் தொடங்குகிறது என்று கூறினார். இந்தியாவின் மிகப்பெரிய மாநிலமான உத்தரப் பிரதேசம், தற்போது அதிக எண்ணிக்கையிலான சர்வதேச விமான நிலையங்களைக் கொண்ட மாநிலங்களில் ஒன்றாக மாறியுள்ளது என்றும் அவர் குறிப்பிட்டார். பிரதமர் மோடி, முதலாவதாக, இந்த விமான நிலையத்திற்கு அடிக்கல் நாட்டியதாலும், இப்போது அதைத் திறந்து வைப்பதாலும், இரண்டாவதாக, இந்த பிரம்மாண்டமான விமான நிலையத்தின் பெயர் உத்தரப் பிரதேசத்துடன் இணைக்கப்பட்டிருப்பதாலும், தாம் இரட்டிப்புப் பெருமை கொள்வதாகப் பகிர்ந்துகொண்டார். “இந்த மாநிலம்தான் என்னை அதன் பிரதிநிதியாகத் தேர்ந்தெடுத்து, நாடாளுமன்ற உறுப்பினராகவும் ஆக்கியது. அதன் அடையாளம் இப்போது இந்த அற்புதமான விமான நிலையத்துடன் இணைந்துள்ளது,” என்று திரு மோடி குறிப்பிட்டார்.
புதிய விமான நிலையத்தின் தொலைநோக்குப் பார்வையை எடுத்துரைத்த பிரதமர், நொய்டா விமான நிலையம் ஆக்ரா, மதுரா, அலிகர், காஜியாபாத், மீரட், எட்டாவா, புலந்தஷர் மற்றும் ஃபரிதாபாத் ஆகிய பகுதிகளை உள்ளடக்கிய ஒரு பரந்த பிராந்தியத்திற்குப் பயனளிக்கும் என்று கூறினார். இந்த விமான நிலையம், மேற்கு உத்தரப் பிரதேசத்தின் விவசாயிகள், சிறு மற்றும் நடுத்தர நிறுவனங்கள் மற்றும் இளைஞர்களுக்கு ஏராளமான புதிய வாய்ப்புகளை வழங்கும் என்று அவர் வலியுறுத்தினார். “விமானங்கள் இங்கிருந்து உலகிற்குப் பறக்கும், மேலும் இந்த விமான நிலையம், வளர்ச்சி பெற்ற உத்தரப் பிரதேசம் சிறகடித்துப் பறப்பதற்கான ஓர் அடையாளமாகவும் திகழும்,” என்று கூறிய திரு மோடி, மாநில மக்களுக்கும், குறிப்பாக மேற்கு உத்தரப் பிரதேச மக்களுக்கும் தனது மனமார்ந்த வாழ்த்துக்களைத் தெரிவித்தார்.
தற்போதைய உலகளாவிய நிலைமை குறித்துப் பேசிய பிரதமர், மேற்கு ஆசியாவில் ஒரு மாதத்திற்கும் மேலாகப் போர் நடந்து வருவதால், பல நாடுகளில் உணவு, பெட்ரோல், டீசல், எரிவாயு மற்றும் உரங்கள் உள்ளிட்ட அத்தியாவசியப் பொருட்களுக்கு நெருக்கடி ஏற்பட்டுள்ளதாகவும், இன்று உலகம் முழுவதும் ஆழ்ந்த கவலையில் இருப்பதாகவும் குறிப்பிட்டார். மோதலால் பாதிக்கப்பட்ட பகுதியிலிருந்து இந்தியா மிக அதிக அளவில் கச்சா எண்ணெய் மற்றும் எரிவாயுவை இறக்குமதி செய்வதாகவும் அவர் குறிப்பிட்டார். “இந்த நெருக்கடியின் சுமை சாதாரண குடும்பங்கள் மற்றும் விவசாயிகள் மீது விழாமல் இருப்பதை உறுதிசெய்ய அரசாங்கம் சாத்தியமான அனைத்து நடவடிக்கைகளையும் எடுத்து வருகிறது,” என்று திரு மோடி உறுதிப்படுத்தினார்.
உலகளாவிய நெருக்கடி காலங்களிலும் இந்தியாவின் தொடர்ச்சியான விரைவான வளர்ச்சி வேகத்தை வலியுறுத்தும் வகையில், மேற்கு உத்தரப் பிரதேசத்தில் மட்டும், சமீபத்திய வாரங்களில் திறந்து வைக்கப்பட்ட அல்லது அடிக்கல் நாட்டப்பட்ட நான்காவது பெரிய திட்டம் இது என்று பிரதமர் குறிப்பிட்டார். “இந்தக் காலகட்டத்தில், நொய்டாவில் ஒரு பெரிய குறைக்கடத்தி தொழிற்சாலைக்கு அடிக்கல் நாட்டப்பட்டது, நாட்டின் முதல் டெல்லி-மீரட் நமோ பாரத் ரயில் வேகம் பெற்றது, மீரட் மெட்ரோ விரிவாக்கப்பட்டது, மேலும் இன்று நொய்டா சர்வதேச விமான நிலையம் திறந்து வைக்கப்படுகிறது,” என்று பிரதமர் மோடி எடுத்துரைத்தார்.
உத்தரப் பிரதேசத்தின் வளர்ச்சியில் ஏற்பட்டுள்ள இந்த குறிப்பிடத்தக்க சாதனைகளுக்கு தற்போதைய அரசே காரணம் என பிரதமர் பாராட்டினார். குறைக்கடத்தித் தொழிற்சாலை இந்தியாவைத் தொழில்நுட்பத்தில் தன்னிறைவு அடையச் செய்கிறது என்றும், மீரட் மெட்ரோ மற்றும் நமோ பாரத் ரயில் ஆகியவை வேகமான மற்றும் ஸ்மார்ட் இணைப்பை வழங்குகின்றன என்றும், ஜெவார் விமான நிலையம் வட இந்தியா முழுவதையும் உலகத்துடன் இணைக்கிறது என்றும் அவர் குறிப்பிட்டார். “இன்று தற்போதைய அரசின் கீழ், அதே நொய்டா உத்தரப் பிரதேசத்தின் வளர்ச்சிக்கு ஒரு சக்திவாய்ந்த இயந்திரமாக மாறி வருகிறது,” என்று திரு மோடி திட்டவட்டமாகக் கூறினார்.
விமான நிலையத் திட்டத்தின் வரலாற்றை விவரித்த பிரதமர், “ஜெவார் விமான நிலையத்திற்கு 2003-ஆம் ஆண்டிலேயே அடல்ஜி ஒப்புதல் அளித்தார். மேலும், இங்கு தற்போதைய அரசு அமைந்தவுடனேயே, அடிக்கல் நாட்டப்பட்டு, கட்டுமானப் பணிகள் நடைபெற்று, தற்போது அது செயல்பாட்டுக்கு வந்துள்ளது,” என்று கூறினார்.
சரக்குப் போக்குவரத்து மையமாக இப்பகுதியின் வளர்ந்து வரும் பங்கிற்கு கவனத்தை ஈர்த்த பிரதமர், சரக்கு ரயில்களுக்காக அமைக்கப்பட்ட சிறப்பு ரயில் பாதைகளான இரண்டு முக்கிய சரக்கு வழித்தடங்களின் மையமாக இப்பகுதி மாறி வருவதாகவும், இவை வட இந்தியாவின் இணைப்பை வங்காளம் மற்றும் குஜராத்தின் கடற்பகுதிகளுடன் வலுப்படுத்தியுள்ளதாகவும் சுட்டிக்காட்டினார். இந்த இரண்டு வழித்தடங்களும் சங்கமிக்கும் முக்கிய இடமாக தாத்ரி விளங்குகிறது என்றும், இதன் பொருள், இங்கு விவசாயிகள் பயிரிடும் மற்றும் தொழிற்சாலைகள் உற்பத்தி செய்யும் அனைத்தும் இப்போது தரை மற்றும் வான் வழியாக உலகின் ஒவ்வொரு மூலைக்கும் விரைவாகச் சென்றடைய முடியும் என்பதாகும் என்றும் அவர் குறிப்பிட்டார். “இந்த வகையான பல்முனை இணைப்பு, உத்தரப் பிரதேசத்தை உலகெங்கிலும் உள்ள முதலீட்டாளர்களுக்கு ஒரு முக்கிய ஈர்ப்பாக மாற்றுகிறது,” என்று பிரதமர் மோடி விளக்கினார்.
இப்பகுதியின் பிம்பத்தில் ஏற்பட்டுள்ள மாற்றம் குறித்துப் பேசிய பிரதமர், “இன்று, நொய்டா முழு உலகையும் வரவேற்கத் தயாராக உள்ளது. இந்தப் பகுதி முழுவதும் தற்சார்பு இந்தியாவின் உறுதியை வலுப்படுத்துகிறது” என்றார்.
இத்திட்டத்தை நனவாக்குவதற்காகத் தங்கள் நிலங்களைத் தியாகம் செய்த விவசாயிகளுக்குப் பிரதமர் தனது நன்றியைத் தெரிவித்தார். மேலும், இப்பகுதியின் பொருளாதாரத்தில் விவசாயமும் வேளாண்மையும் பெரும் முக்கியத்துவம் வாய்ந்தவை என்றும் அவர் குறிப்பிட்டார். நவீன இணைப்பு வசதிகளின் விரிவாக்கம், மேற்கு உத்தரப் பிரதேசத்தில் உணவு பதப்படுத்தும் வாய்ப்புகளை மேலும் அதிகரிக்கும் என்று குறிப்பிட்ட திரு மோடி, “இங்கிருந்து வரும் விவசாய விளைபொருட்கள் இனி உலகச் சந்தைகளை மிகவும் திறமையாகச் சென்றடையும்” என்றும் கூறினார்.
திவாஹர்