மேற்கு ஆசியாவில் சமீபத்தில் ஏற்பட்டுள்ள நிகழ்வுகளால் உருவாகியுள்ள சூழ்நிலை மற்றும் அது இந்தியாவில் ஏற்படுத்தக்கூடிய தாக்கம் ஆகியவற்றைக் கருத்தில் கொண்டு, அதற்கான தயார்நிலையை ஆய்வு செய்வதற்காக, பிரதமர் திரு நரேந்திர மோடி இன்று மாநில முதலமைச்சர்கள் மற்றும் துணைநிலை ஆளுநர்களுடன் காணொளிக் காட்சி மூலம் ஒரு கூட்டத்திற்குத் தலைமை தாங்கினார்.
அனைத்து முதலமைச்சர்களும் பகிர்ந்துகொண்ட மதிப்புமிக்க ஆலோசனைகளுக்குப் பிரதமர் தனது பாராட்டைத் தெரிவித்தார். மேலும், மாறிவரும் சூழ்நிலையைத் திறம்படக் கையாள்வதில் இந்த உள்ளீடுகள் முக்கியப் பங்கு வகிக்கும் என்றும் அவர் குறிப்பிட்டார். வரவிருக்கும் சவால்களை எதிர்கொள்ள, விழிப்புணர்வு, தயார்நிலை மற்றும் ஒருங்கிணைந்த நடவடிக்கை ஆகியவற்றின் அவசியத்தையும் அவர் வலியுறுத்தினார்.
மேற்கு ஆசியாவில் நிலவும் தற்போதைய சூழ்நிலையைக் குறிப்பிட்டுப் பேசிய பிரதமர், இதுபோன்ற உலகளாவிய இடையூறுகளைக் கையாள்வதில் இந்தியாவுக்கு முன் அனுபவம் உண்டு என்றார். கோவிட்-19 பெருந்தொற்றின் போது, விநியோகச் சங்கிலிகள், வர்த்தகம் மற்றும் அன்றாட வாழ்வில் ஏற்பட்ட பாதிப்புகளைக் குறைப்பதற்காக மத்திய மற்றும் மாநில அரசுகள் “டீம் இந்தியா”வாக இணைந்து செயல்பட்ட கூட்டு நடவடிக்கையை அவர் நினைவு கூர்ந்தார். தற்போதைய சூழ்நிலைகளைச் சமாளிப்பதில், அதே ஒத்துழைப்பு மற்றும் ஒருங்கிணைப்பு உணர்வே இந்தியாவின் மிகப்பெரிய பலமாகத் தொடர்கிறது என்று அவர் வலியுறுத்தினார்.
உடனடி நடவடிக்கை மற்றும் நீண்டகாலத் தயார்நிலை ஆகிய இரண்டிலும் ஒரே நேரத்தில் கவனம் செலுத்த வேண்டும் என பிரதமர் அழைப்பு விடுத்தார். உயிரி எரிபொருட்கள், சூரிய ஆற்றல், கோபர்தன் முன்முயற்சி, மின்சார வாகனப் போக்குவரத்து போன்ற மாற்று எரிசக்தி ஆதாரங்களை ஊக்குவிப்பதிலும், குழாய்வழி இயற்கை எரிவாயு இணைப்புகளை விரிவுபடுத்துவதிலும் மாநிலங்கள் தங்கள் முயற்சிகளைத் துரிதப்படுத்த வேண்டும் என அவர் வலியுறுத்தினார். மேலும், மாநிலங்களின் தீவிர ஒத்துழைப்புடன், உள்நாட்டு எண்ணெய் மற்றும் இயற்கை எரிவாயு ஆய்வுகளை மேம்படுத்துவதன் முக்கியத்துவத்தையும் அவர் எடுத்துரைத்தார்.
இந்த சவாலை எதிர்கொள்வது ஒரு கூட்டுப் பொறுப்பு என்று மீண்டும் வலியுறுத்திய பிரதமர், “இந்தியா அணி”யாக ஒன்றிணைந்து செயல்பட்டால், தேசம் இந்தச் சூழ்நிலையை வெற்றிகரமாகக் கடந்துவிடும் என்ற நம்பிக்கையையும் வெளிப்படுத்தினார்.
கூட்டத்தின் போது, பாதுகாப்பு அமைச்சர் திரு ராஜ்நாத் சிங், இந்த நெருக்கடியைச் சமாளிக்க பிரதமரின் தலைமையில் அரசு தீவிரமாகச் செயல்பட்டு வருவதாகவும், எல்பிஜி சரியான நேரத்தில் கிடைப்பதை உறுதி செய்தல் மற்றும் பெட்ரோல், டீசல் மீதான கலால் வரிகளைக் குறைத்தல் போன்ற ஆக்கப்பூர்வமான நடவடிக்கைகளை எடுத்து வருவதாகவும் எடுத்துரைத்தார். மேலும், தற்போதைய சூழ்நிலையைச் சமாளிக்க அனைத்து மாநிலங்கள், யூனியன் பிரதேசங்கள் மற்றும் மத்திய அரசு ஆகியவற்றின் கூட்டு நடவடிக்கை அவசியம் என்பதையும் அவர் வலியுறுத்தினார்.
அமைச்சரவைச் செயலாளர் திரு டி.வி. சோமநாதன் தற்போதைய நிலவரம் குறித்து விளக்கவுரை அளித்ததோடு, இந்நிலையை மாநிலங்கள் சமாளிப்பதற்கான நடவடிக்கைகளையும் பரிந்துரைகளையும் பட்டியலிட்டார்.
நிலைமையைச் சமாளிக்க பிரதமர் தலைமையிலான மத்திய அரசு எடுத்துள்ள நடவடிக்கைகளை முதலமைச்சர்கள் பாராட்டினர். மேலும், இந்த நெருக்கடியான சூழலில் வெளிநாடுகளில் உள்ள இந்தியக் குடிமக்களின் நலனை உறுதி செய்வதற்காக பிரதமர் பல்வேறு நாடுகளுடன் மேற்கொண்ட ராஜதந்திர ரீதியான அணுகுமுறையையும் அவர்கள் பாராட்டினர்.
பெட்ரோல், டீசல் மற்றும் எல்பிஜி ஆகியவை போதுமான அளவில் கையிருப்பில் உள்ளதாலும், அத்தியாவசியப் பொருட்களின் தடையற்ற விநியோகத்தை உறுதி செய்வதற்காக தொடர்ச்சியான கண்காணிப்பு வழிமுறைகள் நடைமுறையில் இருப்பதாலும், நிலைமை சீராக உள்ளது என மாநில முதலமைச்சர்கள் நம்பிக்கை தெரிவித்தனர். உலகளாவிய நிச்சயமற்ற தன்மைகளுக்கு மத்தியில் குடிமக்களுக்கு இது குறிப்பிடத்தக்க நிவாரணத்தை வழங்கும் என்று குறிப்பிட்டு, எரிபொருள் மீதான கலால் வரியைக் குறைக்கும் முடிவை அவர்கள் பரவலாக வரவேற்றனர். நெருக்கடிக்கு முந்தைய நிலையின் 50 சதவீதத்திலிருந்து, மாநிலங்கள் மற்றும் யூனியன் பிரதேசங்களுக்கான வர்த்தக எல்பிஜி ஒதுக்கீட்டை 70 சதவீதமாக உயர்த்தும் முடிவையும் முதலமைச்சர்கள் வரவேற்றனர். மாறிவரும் சூழ்நிலையைத் திறம்பட நிர்வகிக்கவும், குடிமக்களின் நலன்களைப் பாதுகாக்கவும் மத்திய அரசுடன் நெருங்கிய ஒருங்கிணைப்புடன் செயல்படுவதற்கான தங்கள் உறுதிப்பாட்டை அவர்கள் மீண்டும் வலியுறுத்தினர்.
திவாஹர்