இந்திய அரசு, பெட்ரோல் மற்றும் டீசல் இரண்டின் மீதான கலால் வரியை லிட்டருக்கு ரூ.10 வீதம் உடனடியாகக் குறைத்துள்ளது. மேற்கு ஆசியாவில் தொடரும் மோதல் மற்றும் அது தொடர்பான உலகளாவிய எரிசக்தி விநியோகச் சங்கிலிகளில் ஏற்பட்ட இடையூறுகளால், சர்வதேச கச்சா எண்ணெய் விலைகள் கடந்த ஒரு மாதத்தில் ஒரு பீப்பாய்க்கு சுமார் 70 அமெரிக்க டாலரிலிருந்து ஏறத்தாழ 122 அமெரிக்க டாலராக, அதாவது நான்கு வாரங்களுக்கும் குறைவான காலத்தில் கிட்டத்தட்ட 75 சதவீதம் உயர்ந்துள்ளன. இந்த செங்குத்தான மற்றும் விரைவான உயர்வுக்குப் பதிலளிக்கும் விதமாக இந்த முடிவு எடுக்கப்பட்டுள்ளது.
பெட்ரோல் மற்றும் டீசலின் சில்லறை விற்பனை விலைகள் மாறாது. கலால் வரி குறைப்பு என்பது, பெட்ரோல் நிலையங்களில் விலைக் குறைப்பாக வழங்கப்படவில்லை. மாறாக, இது பொதுத்துறை எண்ணெய் சந்தைப்படுத்தல் நிறுவனங்களான (OMCs) இந்தியன் ஆயில் கார்ப்பரேஷன், பாரத் பெட்ரோலியம் கார்ப்பரேஷன் மற்றும் ஹிந்துஸ்தான் பெட்ரோலியம் கார்ப்பரேஷன் ஆகியவற்றால் ஈடுசெய்யப்படும் நஷ்டங்களை நேரடியாகக் குறைக்கிறது. இந்த நிறுவனங்கள், தங்களின் விநியோகச் செலவை விட மிகக் குறைந்த விலையில் இந்திய நுகர்வோருக்குத் தொடர்ந்து எரிபொருளை வழங்கி வருகின்றன. தற்போதைய சர்வதேச கச்சா எண்ணெய் விலையில், பெட்ரோலில் ஒரு லிட்டருக்கு சுமார் ரூ. 26 மற்றும் டீசலில் ஒரு லிட்டருக்கு ரூ. 81.90 நஷ்டம் ஏற்படுகிறது. எண்ணெய் சந்தைப்படுத்தல் நிறுவனங்களால் ஈடுசெய்யப்படும் மொத்த தினசரி நஷ்டம் சுமார் ரூ. 2,400 கோடியாகும். கலால் வரி குறைப்பு இந்த நஷ்டங்களில் ஒரு லிட்டருக்கு ரூ. 10-ஐ ஈடுசெய்கிறது. இதன் மூலம், சில்லறை விலைகளை மாற்றாமல், எண்ணெய் சந்தைப்படுத்தல் நிறுவனங்கள் தடையின்றி தொடர்ந்து எரிபொருளை வழங்க முடியும் என்பது உறுதி செய்யப்படுகிறது.
உலகளாவிய எரிபொருள் சந்தைகளுடனான ஒப்பீடு ஒரு படிப்பினையை அளிக்கிறது. தற்போதைய நெருக்கடி தொடங்கியதிலிருந்து, தெற்கு மற்றும் தென்கிழக்கு ஆசிய நாடுகளில் எரிபொருள் விலைகள் 30 முதல் 50 சதவிகிதம் வரையிலும், வட அமெரிக்காவில் 30 சதவிகிதம் வரையிலும், ஐரோப்பாவில் 20 சதவிகிதம் வரையிலும் உயர்ந்துள்ளன. இந்தியா தனது நிலையைத் தக்கவைத்துக் கொண்டுள்ளது. அந்த நிலைத்தன்மைக்கு ஒரு நிதிச் செலவு உண்டு, அதை ஏற்க அரசாங்கம் முடிவு செய்துள்ளது.
திவாஹர்