மத்திய உள்துறை அமைச்சரும் கூட்டுறவு அமைச்சருமான திரு. அமித் ஷா, மோடி அரசு பஞ்சாப் மக்களுடன் தோளோடு தோள் நின்று, வெள்ளத்தால் பாதிக்கப்பட்ட மாநில மக்களுக்கு சாத்தியமான அனைத்து உதவிகளையும் வழங்க உறுதிபூண்டுள்ளது என்று கூறியுள்ளார்.
பஞ்சாப் முதலமைச்சர் திரு. பகவந்த் மான், இன்று மாலை புதுதில்லியில் மத்திய உள்துறை அமைச்சர் மற்றும் கூட்டுறவு அமைச்சர் திரு. அமித் ஷாவை சந்தித்து, மழைக்கால வெள்ளத்திற்குப் பிறகு மாநிலத்தில் ஏற்பட்ட சேதங்களின் அளவைப் பற்றி விளக்கினார். மேலும், பேரிடர் நிவாரணம் மற்றும் மறுசீரமைப்பிற்காக மாநிலத்திற்கு கூடுதல் நிதியை அனுமதிக்க வேண்டும் என்றும் அவர் கோரிக்கை விடுத்தார்.
இந்தக் கூட்டத்தின் போது, மாநில பேரிடர் மீட்பு நிதியில் (SDRF) ரூ.12,589.59 கோடி அளவுக்கு போதுமான நிதி இருப்பதாகவும் , இந்திய அரசின் விதிமுறைகளின்படி பாதிக்கப்பட்ட மக்களுக்கு நிவாரணம் மற்றும் உடனடி மறுசீரமைப்புக்கு இதைப் பயன்படுத்தலாம் என்றும் முதலமைச்சரிடம் தெரிவிக்கப்பட்டது.
மாநிலத்தில் சமீபத்தில் ஏற்பட்ட வெள்ளத்தின் போது, தேடுதல், மீட்பு மற்றும் உடனடி மறுசீரமைப்பு பணிகளில், மத்திய நிறுவனங்களிடமிருந்து மாநில நிர்வாகத்திற்கு அனைத்து சாத்தியமான உதவிகளையும் மத்திய அரசு வழங்கியுள்ளது.
பிரதமர் திரு. நரேந்திர மோடி அவர்கள் செப்டம்பர் 9, 2025 அன்று பஞ்சாப் மாநிலத்திற்கு விஜயம் செய்து வெள்ள நிலைமை மற்றும் மாநிலத்தில் ஏற்பட்ட சேதங்களை ஆய்வு செய்தார். பிரதமர் அறிவித்த ₹1,600 கோடி நிதியுதவியில், ரூ.805 கோடி (NHAI அனுமதித்த 170 கோடி உட்பட) ஏற்கனவே பல்வேறு திட்டங்களின் கீழ் மாநில அரசு/பயனாளிகளுக்கு விடுவிக்கப்பட்டுள்ளது. மீதமுள்ள தொகை மாநிலத்திலிருந்து தொடர்புடைய தகவல்கள் கிடைத்தவுடன் விடுவிக்கப்படும்.
மேலும், பஞ்சாப் மாநிலத்திடமிருந்து குறிப்பாணை வரும் வரை காத்திருக்காமல், செப்டம்பர் 1, 2025 அன்று அமைச்சகங்களுக்கு இடையேயான மத்திய குழு (IMCT) அமைக்கப்பட்டது. மத்திய குழு, செப்டம்பர் 3, 2025 முதல் செப்டம்பர் 6, 2025 வரை மாநிலத்தில் ஏற்பட்ட சேதங்களை நேரில் மதிப்பீடு செய்வதற்காக பாதிக்கப்பட்ட பகுதிகளுக்குச் சென்றது. இருப்பினும் , மாநில அரசு இன்னும் விரிவான குறிப்பாணையை சமர்ப்பிக்கவில்லை. குறிப்பாணை கிடைத்த பிறகு, இந்திய அரசு அங்கீகரித்த விதிமுறைகளின்படி மத்திய அரசு அதை பரிசீலிக்கும்.
இது தவிர, வாழ்வாதாரம் மற்றும் சேதமடைந்த உள்கட்டமைப்பை மீட்டெடுப்பதற்கான மீட்பு மற்றும் மறுசீரமைப்பு திட்டத்தை மாநிலம் தயாரிக்க முடியும். உள்துறை அமைச்சகம் (MHA) ஏற்கனவே SDRF மற்றும் தேசிய பேரிடர் மீட்பு நிதி (NDRF) இன் கீழ் மீட்பு மற்றும் மறுசீரமைப்பு (R&R) நிதி சாளரத்திற்கான வழிகாட்டுதல்களை 14.08.2024 அன்று வெளியிட்டுள்ளது. வழிகாட்டுதல்களில் விவரிக்கப்பட்டுள்ளபடி, கடுமையான பேரிடருக்குப் பிறகு, மீட்பு மற்றும் மறுசீரமைப்பு தேவைகளை மதிப்பிடுவதற்கு SDMA/NDMA (தேவைப்பட்டால்) உடன் கலந்தாலோசித்து மாநில அரசு பேரிடருக்குப் பிந்தைய தேவைகள் மதிப்பீட்டை (PDNA) நடத்த வேண்டும்.
திவாஹர்