பாதுகாப்பு ஆராய்ச்சி மற்றும் மேம்பாட்டு நிறுவனம் (DRDO), ‘குஷா’ நீண்ட தூர தரை-வான் ஏவுகணையின் முதல் பறத்தல் சோதனையை, ஒடிசா கடற்கரைக்கு அப்பால் உள்ள ஏபிஜே அப்துல் கலாம் தீவிலிருந்து ஜூலை 23, 2026 அன்று வெற்றிகரமாக நடத்தியது. அதிவேக மற்றும் அதிக உயர வான்வழி அச்சுறுத்தலை உருவகப்படுத்தும் ஒரு மின்னணு இலக்கைக் குறிவைத்து நடத்தப்பட்ட இந்த முதல் சோதனை, ஏவுகணை அமைப்பால் வெற்றிகரமாக இடைமறிக்கப்பட்டது.
‘குஷா’ ஏவுகணை அமைப்பானது, போர் விமானங்கள், ஏவுகணைகள், ஆளில்லா வானூர்திகள் மற்றும் பெரிய எதிரி விமானங்கள் உள்ளிட்ட பல்வேறு வான்வழி அச்சுறுத்தல்களை, ஒரு பரந்த வரம்பு மற்றும் உயர எல்லைக்குள் செயலிழக்கச் செய்யும் திறன் கொண்டது. ஏவுகணைகள், ரேடார்கள், கட்டளை மற்றும் கட்டுப்பாட்டு மையம் உள்ளிட்ட அனைத்து ஆயுத அமைப்புக் கூறுகளும், பல்வேறு டி.ஆர்.டி.ஓ ஆய்வகங்கள் மற்றும் தொழில் கூட்டாளர்களால் உருவாக்கப்பட்டுள்ளன.
‘குஷா’வின் வெற்றிகரமான சோதனைப் பறப்பு, இந்தியப் பாதுகாப்பு ஆராய்ச்சி மற்றும் மேம்பாட்டில் ஒரு முக்கிய மைல்கல்லைக் குறிக்கிறது என்றும், ஒரு சில நாடுகளிடம் மட்டுமே உள்ள நீண்ட தூரம் சென்று தாக்கும் தரை-வான் ஏவுகணை அமைப்பை உருவாக்கும் திறனை இது எடுத்துக்காட்டுகிறது என்றும் பாதுகாப்பு அமைச்சர் திரு ராஜ்நாத் சிங் தெரிவித்தார். மேலும், இது போன்ற அமைப்புகளுக்கான இறக்குமதி சார்புநிலையை இது நீக்கும் என்றும், நாட்டின் வான் பாதுகாப்புத் திறனில் ஒரு மாபெரும் பாய்ச்சலைக் குறிக்கிறது என்றும் அவர் கூறினார்.
பாதுகாப்புச் செயலாளரும், பாதுகாப்பு ஆராய்ச்சி மற்றும் மேம்பாட்டுத் துறையின் செயலாளரும், டி.ஆர்.டி.ஓ-வின் தலைவருமான திரு ராஜேஷ் குமார் சிங், ஏவுதலின் போது அனைத்து நடவடிக்கைகளையும் கண்காணித்ததோடு, வெற்றிகரமான இந்த விமானப் பரிசோதனையில் ஈடுபட்டிருந்த அனைத்துக் குழு உறுப்பினர்களுக்கும் வாழ்த்து தெரிவித்தார்.
திவாஹர்