நான்கு நாட்கள் நடைபெற்ற பன்னாட்டு கடல்சார் பாதுகாப்புப் பயிற்சியான ‘ஆபரேஷன் சதர்ன் ரெடினஸ் 26-2’, 2026 ஜூலை 23 அன்று கொச்சியில் உள்ள தெற்கு கடற்படைத் தளத்தில் நிறைவடைந்தது . தெற்கு கடற்படைத் தளம் மற்றும் இந்திய கடற்படை தலைமையிலான கூட்டுப் பணிப்படை 154 ஆகியவற்றின் ஆதரவின் கீழ், இந்திய கடற்படையால் ஒருங்கிணைந்த கடல்சார் படைகளுடன் (CMF) இணைந்து நடத்தப்பட்ட இந்த நிகழ்வில், 27 நாடுகளைச் சேர்ந்த 276 வீரர்கள் , 76 பயிற்றுநர்கள் மற்றும் துறைசார் நிபுணர்களின் ஆதரவுடன் ஒன்றிணைந்தனர் . மேலும், நான்கு சர்வதேச அமைப்புகளும் இதில் பங்கேற்றன.
20 ஜூலை 2026 அன்று, தெற்கு கடற்படைத் தலைமையகத்தின் தலைமைப் பணியாளர் அதிகாரி (பயிற்சி) திரு. ரியர் அட்மிரல் தீபக் சிங்ஹால் அவர்களால், ஒருங்கிணைந்த கடல்சார் படைகளின் துணைத் தளபதி திரு. கமாண்டர் டான் தாமஸ், மூத்த அதிகாரிகள் மற்றும் பங்கேற்கும் நாடுகளின் பிரதிநிதிகள் முன்னிலையில் இந்த ஈடுபாடு தொடங்கி வைக்கப்பட்டது. 23 ஜூலை 2026 அன்று நடைபெற்ற நிறைவு விழாவில், CTF 154-இன் தளபதி திரு. கமாண்டர் மிலிந்த் எம். மோகாஷி அவர்களின் நிறைவுரை, ஒருங்கிணைப்பாளர்களுக்குச் சான்றிதழ்கள் வழங்குதல் மற்றும் தலைமைப் பணியாளர் அதிகாரி (பயிற்சி) அவர்களின் பிரியாவிடை உரை ஆகியவை இடம்பெற்றன.
இந்த நிகழ்ச்சி, தொழில்முறை கலந்துரையாடல்கள், உருவகப்படுத்தி அடிப்படையிலான அறிவுறுத்தல்கள் மற்றும் செய்முறைப் பயிற்சிகள் மூலம் கடல்சார் பாதுகாப்பு, சட்ட மற்றும் செயல்பாட்டுக் கண்ணோட்டங்களை ஒன்றிணைத்தது. இந்த அமர்வுகளில் கடல்சார் கள விழிப்புணர்வு மற்றும் தகவல் பகிர்வு, கடல்சார் சட்டம், போதைப்பொருள் தடுப்பு, படைப் பாதுகாப்பு நடவடிக்கைகள், சமச்சீரற்ற அச்சுறுத்தல்கள், ஆளில்லா கடல்சார் அமைப்புகள் மற்றும் செயல்பாட்டு கடல் பயிற்சி ஆகியவை விவாதிக்கப்பட்டன. இந்தியக் கடற்படையின் தகவல் ஒருங்கிணைப்பு மையம் – இந்தியப் பெருங்கடல் பிராந்தியம் (IFC-IOR), கூட்டு கடல்சார் தகவல் மையம் (JMIC) போன்ற CMF பிரிவுகள், மற்றும் ஐக்கிய நாடுகளின் போதைப்பொருள் மற்றும் குற்றங்களுக்கான அலுவலகம் (UNODC) மற்றும் IMO சர்வதேச கடல்சார் சட்ட நிறுவனம் (IMO IMLI) உள்ளிட்ட நிபுணத்துவம் வாய்ந்த சர்வதேச அமைப்புகளின் பங்களிப்புகளின் மூலம் இந்தக் களம் சார்ந்த பயிற்சிகள் வழங்கப்பட்டன.
பங்கேற்பாளர்கள், இந்தியக் கடற்படைக் கப்பலில் கடல் பயிற்சி மட்டுமின்றி, சேதக் கட்டுப்பாடு மற்றும் தீயணைப்பு, கடல்சார் தகவல் தொடர்பு, கடலில் தப்பிப் பிழைத்தல் மற்றும் கப்பலில் ஏறும் நடைமுறைகள் ஆகியவற்றிலும் செய்முறைப் பயிற்சி மேற்கொண்டனர். இந்தச் செயல்பாடுகள், பங்கேற்பாளர்கள் தங்கள் அனுபவங்களையும் சிறந்த நடைமுறைகளையும் பரிமாறிக்கொள்ள வாய்ப்புகளை வழங்கியதோடு, கடல்சார் சேவைகள் மற்றும் அமைப்புகளிடையே பரந்த புரிதலை வளர்க்கவும் பங்களித்தன.
இந்த ஈடுபாடு, பங்கேற்ற நாடுகளிடையே ஒருங்கிணைந்த செயல்பாட்டுத் திறன், தொழில்முறை வலையமைப்புகள் மற்றும் செயல்பாட்டு நம்பிக்கையை வலுப்படுத்தியது. மேலும், இது கோட்பாட்டுப் புரிதலை நேரடிப் பயிற்சியுடன் இணைப்பதன் மூலம் பிராந்தியத் திறன் மேம்பாட்டிற்கும் கூட்டு கடல்சார் பாதுகாப்பிற்கும் பங்களித்தது. இந்த நான்கு நாள் ஈடுபாடு 3,800 பயிற்சி மனித மணிநேரங்களை உருவாக்கியது .
ஆபரேஷன் சதர்ன் ரெடினஸ் 26-2, இந்தியக் கடற்படையின் நவீன பயிற்சி உள்கட்டமைப்பு, அதிநவீன சிமுலேட்டர்கள், மேம்பட்ட பயிற்றுவிப்பு வழிமுறைகள் மற்றும் தொழில்முறை நிபுணத்துவத்தை வெளிப்படுத்தியது . இந்தப் பயிற்சியின் வெற்றிகரமான செயல்பாடு, இந்தியக் கடற்படை-சிஎம்எஃப் கூட்டாண்மையை வலுப்படுத்தியுள்ளதுடன், சிடிஎஃப் 154-இல் இந்தியக் கடற்படையின் தலைமைத்துவத்தை அடிக்கோடிட்டுக் காட்டியுள்ளது. மேலும், தொழில்முறை கடல்சார் பயிற்சிக்கான ஒரு முன்னணி பயிற்சி மையமாகவும், விரும்பப்படும் இடமாகவும் தெற்கு கடற்படைக் கட்டளையகத்தின் பங்கையும் இது எடுத்துக்காட்டியுள்ளது.
திவாஹர்