விதர்பா ஒரு விவசாயி தற்கொலை மண்டலம் என்ற களங்கத்தை அகற்றவும், விதர்பாவை உருவாக்கவும், அப்பகுதி கிராமங்களில் நீர் வளத்தை உறுதி செய்யவும், நீர் பாதுகாப்பு ஒரு மக்கள் இயக்கமாக மாற வேண்டும் என்று மத்திய சாலைப் போக்குவரத்து மற்றும் நெடுஞ்சாலைத் துறை அமைச்சர் திரு. நிதின் கட்கரி கூறினார். விதர்பாவில் நீர் பாதுகாப்புத் துறையில் பணியாற்றும் பூர்த்தி சிஞ்சன் சம்ருத்தி கல்யாண்காரி சன்ஸ்தாவின் வெள்ளி விழாவை முன்னிட்டு, மே 17 மற்றும் 18 ஆகிய தேதிகளில் நாக்பூரில் “ஜல்சம்வாத்” (நீர் உரையாடல்) மற்றும் “ஜல்கிராந்தி” (நீர் புரட்சி) மாநாடுகள் ஏற்பாடு செய்யப்பட்டுள்ளன. இந்த நிகழ்வுகள் குறித்த தகவல்களை வழங்குவதற்காக இன்று நடைபெற்ற செய்தியாளர் சந்திப்பில் கட்கரி உரையாற்றினார். சட்டமன்ற உறுப்பினர்களான சரண்சிங் தாக்கூர் மற்றும் உமேஷ் யாவல்கர் ஆகியோரும் இந்த செய்தியாளர் சந்திப்பில் கலந்துகொண்டனர்.
நாட்டில் தண்ணீர் பற்றாக்குறை இல்லை; ஆனால், நீர் வளங்களை முறையாகத் திட்டமிடுவதிலும் நிர்வகிப்பதிலும் நாம் பின்தங்கியுள்ளோம் என்று திரு கட்கரி மேலும் கூறினார். இயற்கை விவசாயம், சொட்டு நீர்ப்பாசனம் மற்றும் விவசாயத்தில் செயற்கை நுண்ணறிவைப் பயன்படுத்துவதன் மூலம் நீர் மேலாண்மையை அடைய முடியும் என்றும் அவர் தெளிவுபடுத்தினார்.
மேற்கு விதர்பா மாவட்டங்களான அகோலா, வாஷிம் மற்றும் புல்டானாவில், தேசிய நெடுஞ்சாலைகள் அமைப்பதில் பண்ணைக் குளங்களிலிருந்து தோண்டியெடுக்கப்பட்ட மண்ணைப் பயன்படுத்துவது நிலத்தடி நீர் மட்டத்தை அதிகரிக்க உதவியுள்ளது என்று அவர் சுட்டிக்காட்டினார். மேலும், அப்பகுதி விவசாயிகள் அதற்கேற்ப தங்கள் பயிர் சாகுபடி முறைகளை மாற்றியுள்ளனர் என்றும் அவர் திட்டவட்டமாகக் குறிப்பிட்டார். நீர் பாதுகாப்பில் அரசு சாரா அமைப்புகளின் பங்கேற்பு முக்கியமானது, ஆனால் மக்களின் தீவிரப் பங்கேற்பும் சமமான மதிப்பு வாய்ந்தது; எனவே, நீர் பாதுகாப்பு ஒரு மக்கள் இயக்கமாக மாற வேண்டும் என்று திரு. கட்கரி வலியுறுத்தினார். மேலும், வரூட்-மோர்ஷி மற்றும் கடோல்-நர்கெட் ஆகிய நிலத்தடி நீர் பற்றாக்குறையுள்ள “இருண்ட மண்டல” பகுதிகளில், ஆறுகள் மற்றும் ஓடைகளை ஆழப்படுத்தும் பாதுகாப்புப் பணிகள் பொதுமக்களின் பங்கேற்புடன் மேற்கொள்ளப்பட்டு வருவதாகவும், இந்த முயற்சிகள் மூலம் அப்பகுதியில் நீர் பாதுகாப்புத் திட்டங்கள் செயல்படுத்தப்பட்டு வருவதாகவும் அவர் கூறினார். இந்த முயற்சிகளுக்கு உள்ளாட்சி அமைப்புகள் கணிசமாகப் பங்களிக்க வேண்டும் என்றும் கட்கரி வேண்டுகோள் விடுத்தார்.
பூர்த்தி சிஞ்சன் சம்ருத்தி கல்யாண்காரி சன்ஸ்தா, கடந்த 25 ஆண்டுகளாக நீர் பாதுகாப்புப் பணியில் தொடர்ந்து ஈடுபட்டு வருகிறது. இந்த அமைப்பால் உருவாக்கப்பட்ட ‘தமஸ்வாடா மாதிரி’ நாடு முழுவதும் அங்கீகரிக்கப்பட்டு வருகிறது.
அமைப்பின் வெள்ளி விழா ஆண்டைக் குறிக்கும் வகையில், நாக்பூரில் இரண்டு நாள் தேசிய மாநாடுகள் ஏற்பாடு செய்யப்பட்டுள்ளன. இந்த வெள்ளி விழா கொண்டாட்டங்கள் இரண்டு கட்டங்களாக நடைபெறும் — மே 17, 2026 அன்று “நாக்பூர் ஜல்சம்வாத்-2026” மற்றும் மே 18, 2026 அன்று “ஜல்கிராந்தி மாநாடு”.
எம்.பிரபாகரன்