ஜிப்மரில் ரூ.172.27 கோடி மதிப்பில் 7 புதிய திட்டங்கள் தொடக்கம் – 15-வது பட்டமளிப்பு விழாவில் 816 மாணவர்களுக்குப் பட்டங்கள் வழங்கிய மத்திய அமைச்சர் ஜே.பி. நட்டா!

புதுச்சேரி, நவம்பர் 21: மத்திய சுகாதாரம் மற்றும் குடும்ப நலத்துறை அமைச்சர் ஜகத் பிரகாஷ் நட்டா, புதுச்சேரியில் உள்ள ஜவஹர்லால் முதுநிலை மருத்துவக் கல்வி மற்றும் ஆராய்ச்சி நிறுவனமான (ஜிப்மர்) மருத்துவமனையில் ரூ.172.27 கோடி செலவில் அமைக்கப்பட்டுள்ள மருத்துவச் சேவை, ஆராய்ச்சி மற்றும் மாணவர் நலன் தொடர்பான 7 புதிய திட்டங்களை இன்று தொடங்கி வைத்தார்.

புதிதாகத் தொடங்கி வைக்கப்பட்ட திட்டங்களில் ஆராய்ச்சி மற்றும் புத்தாக்க மேம்பாட்டு மையம், தன்வந்திரி இல்ல மாணவர் விடுதி, 64 ஸ்லைஸ் சிடி ஸ்கேன் கருவி, புற்றுநோய் சிகிச்சைக்கான நவீனக் கருவி, 4டி சிடி சிமுலேட்டர், நவீன இதய வடிகுழாய் சிகிச்சைக் கூடம் மற்றும் மூன்று அம்ரித் மருந்தகங்கள் ஆகியவை அடங்கும்.

இந்தப் புதிய வசதிகள் மூலம் தரமான மருத்துவச் சேவைகள் மக்களைச் சென்றடைவதுடன், மருத்துவக் கல்வி, ஆராய்ச்சி மற்றும் நோயாளிகள் நலன் மேம்படும் என எதிர்பார்க்கப்படுகிறது.

நிகழ்ச்சியில் பேசிய அமைச்சர் ஜே.பி. நட்டா, வளர்ச்சியடைந்த இந்தியா என்பது ஆரோக்கியமான இந்தியாவாகவும் இருக்க வேண்டும் என்றும், அனைவருக்கும் தரமான மருத்துவச் சேவைகள் கிடைப்பதை உறுதி செய்ய மத்திய அரசு உறுதியுடன் செயல்பட்டு வருவதாகவும் தெரிவித்தார்.

மேலும், புதுச்சேரி சேதராப்பேட்டையில் உறுப்பு மாற்று அறுவை சிகிச்சை மையம், விபத்துகளில் காயமடைந்தவர்களுக்கான சிறப்பு சிகிச்சை மற்றும் மறுவாழ்வு மையம் அமைக்க ஜிப்மர் திட்டமிட்டிருப்பதை அவர் வரவேற்றார்.

இதனைத் தொடர்ந்து நடைபெற்ற ஜிப்மரின் 15-வது பட்டமளிப்பு விழாவில் அமைச்சர் பங்கேற்று மாணவர்களுக்குப் பட்டங்களையும், கல்வியில் சிறந்து விளங்கிய மாணவர்களுக்குப் பதக்கங்களையும் வழங்கினார்.

விழாவில் மொத்தம் 816 மாணவர்களுக்குப் பட்டங்கள் வழங்கப்பட்டன. இதில் மருத்துவம், பல் மருத்துவம், மருத்துவ முனைவர் பட்டம் மற்றும் உயர் சிறப்புப் பிரிவுகளில் 592 பட்டங்களும், செவிலியர், பொது சுகாதாரம் மற்றும் துணை மருத்துவப் பிரிவுகளில் 224 பட்டங்களும் வழங்கப்பட்டன.

மேலும், பிரதமர் நரேந்திர மோடியின் தலைமையில் இந்தியாவில் எய்ம்ஸ் மருத்துவமனைகளின் எண்ணிக்கை 6-லிருந்து 23 ஆகவும், மருத்துவக் கல்லூரிகளின் எண்ணிக்கை 387-லிருந்து 863 ஆகவும் உயர்ந்துள்ளதாக அமைச்சர் தெரிவித்தார். 2029-ஆம் ஆண்டுக்குள் இளநிலை மற்றும் முதுநிலை மருத்துவப் படிப்புகளில் கூடுதலாக 75,000 இடங்களை உருவாக்க மத்திய அரசு நடவடிக்கை எடுத்து வருவதாகவும் குறிப்பிட்டார்.

ஜிப்மர் 2025–26-ஆம் ஆண்டில் மட்டும் 46,815-க்கும் அதிகமான அறுவை சிகிச்சைகளை மேற்கொண்டுள்ளதாகவும் அவர் தெரிவித்தார்.

விழாவில் புதுச்சேரி துணைநிலை ஆளுநர் கே. கைலாஷ்நாதன், ஜிப்மர் தலைவர் டாக்டர் சித்ரா சர்க்கார், இயக்குநர் டாக்டர் வீர் சிங் நேகி உள்ளிட்டோர் கலந்து கொண்டனர். மருத்துவக் கல்வி, ஆராய்ச்சி மற்றும் தரமான மருத்துவச் சேவைகளில் ஜிப்மர் தொடர்ந்து முக்கியப் பங்காற்றி வருவதாக அவர்கள் தெரிவித்தனர்.

திவாஹர்

Leave a Reply