தேசபக்தி, பொதுச் சேவை மற்றும் தொழில்நுட்பப் புதுமை ஆகியவற்றைக் கொண்டாடும் ஒரு தனித்துவமான நிகழ்வாக, அஞ்சல் துறை இன்று இமாச்சலப் பிரதேசத்தில் உள்ள மண்டி தலைமை அஞ்சல் அலுவலகத்திலிருந்து ரெஹர்தர் கிளை அஞ்சல் அலுவலகத்திற்கு, ட்ரோன் மூலம் தேசியக் கொடியான மூவர்ணக் கொடியை வழங்கியது. இதன் மூலம், இந்திய அஞ்சல் துறையால் மூவர்ணக் கொடி ட்ரோன் மூலம் வழங்கப்படும் முதல் நிகழ்வாக இது அமைந்துள்ளது.
சுதந்திர தினத்திற்கு முந்தைய நாள், வடகிழக்கு மண்டலத்தின் மத்திய தகவல் தொடர்பு மற்றும் மேம்பாட்டுத் துறை அமைச்சர் திரு. ஜோதிராதித்ய எம். சிந்தியா அவர்களால் இந்த முன்னெடுப்பு காணொளி வாயிலாகத் தொடங்கி வைக்கப்பட்டு செயல்படுத்தப்பட்டது. மண்டி தலைமை அஞ்சல் அலுவலகத்திலிருந்து ட்ரோன் நேரடியாகப் புறப்படுவதைக் கண்ட மத்திய அமைச்சர், அஞ்சல் துறை அதிகாரிகள் மற்றும் ட்ரோன் இயக்குபவருடன் கலந்துரையாடினார். அதனைத் தொடர்ந்து, அந்த ட்ரோன் ரெஹர்தார் கிளை அஞ்சல் அலுவலகத்தில் தரையிறங்கியது. அங்கு, மூவர்ணக் கொடி அடங்கிய பார்சலை அஞ்சல் குழுவினர் பெற்றுக்கொண்டு, அதனை ஒரு முன்னாள் ராணுவ வீரரிடம் முறைப்படி ஒப்படைத்தனர். இது அந்த நிகழ்வுக்கு ஒரு சிறப்பு முக்கியத்துவத்தைச் சேர்த்தது.
இந்நிகழ்ச்சியில் பேசிய மத்திய அமைச்சர், இமாச்சலப் பிரதேசத்தின் வானில் மூவர்ணக் கொடியின் பயணம், புவியியல் தடைகளைத் தாண்டி ஒவ்வொரு குடிமகனையும் சென்றடைய உறுதியுடன் இருக்கும் ஒரு புதிய இந்தியாவின் உணர்வைப் பிரதிபலிக்கிறது என்றார். தேசம் வந்தே மாதரத்தின் 150 ஆண்டுகளை நினைவுகூரும் இந்த சுதந்திர தினம், தேசியப் பெருமிதம், சேவை மனப்பான்மை மற்றும் விஜித் பாரத் என்ற இந்தியாவின் இலட்சியங்களை ஒன்றிணைக்கிறது என்பதால், இது கூடுதல் முக்கியத்துவம் பெறுகிறது என்றும் அவர் கூறினார்.
மூவர்ணக் கொடியானது ஒவ்வொரு வீட்டிலும் மட்டுமல்ல, ஒவ்வொரு இந்தியரின் இதயத்திலும் இருக்க வேண்டும் என்றும் மத்திய அமைச்சர் எடுத்துரைத்தார். இந்த உணர்வோடு, இந்தியா போஸ்ட் நிறுவனம், ‘ஹர் கர் மூவர்ணக் கொடி’ பிரச்சாரத்திற்கு பங்களிக்கும் வகையில், நாடு முழுவதும் உள்ள குடிமக்களுக்கு தேசியக் கொடியை விநியோகம் செய்ய ஏற்பாடு செய்துள்ளது. இதன் மூலம் மக்கள் தங்கள் வீடுகளிலிருந்தே தேசியப் பெருமிதக் கொண்டாட்டத்தில் பங்கேற்க வழிவகை செய்யப்பட்டுள்ளது.
மண்டியிலிருந்து ரெஹர்தாருக்கு ட்ரோன் மூலம் அஞ்சல் விநியோகம் செய்யப்பட்டது, வளர்ந்து வரும் தொழில்நுட்பமானது இந்திய அஞ்சல் துறையின் விரிவான பௌதீக வலையமைப்பிற்கு எவ்வாறு துணைபுரிந்து, குறிப்பாக தொலைதூர மற்றும் கடினமான நிலப்பரப்புகளில் இறுதிக்கட்ட இணைப்பை வலுப்படுத்த முடியும் என்பதை நிரூபிக்கிறது. ட்ரோன் அடிப்படையிலான அஞ்சல் பரிமாற்றத்தை ஆராய்வதன் மூலம், வழக்கமான போக்குவரத்து முறைகள் சவால்களை ஏற்படுத்தும் இடங்களிலும்கூட, அஞ்சல் மற்றும் பொதுச் சேவைகள் குடிமக்களைச் சென்றடைவதை உறுதிசெய்ய, அஞ்சல் துறை புதுமையான தீர்வுகளைத் தேடுகிறது.
தொழில்நுட்ப ரீதியாக மேம்பட்ட, அனைவரையும் உள்ளடக்கிய மற்றும் இணைக்கப்பட்ட விக்சித் பாரத் என்ற பிரதமர் திரு நரேந்திர மோடியின் தொலைநோக்குப் பார்வைக்கு இணங்க, அஞ்சல் துறையானது இமாச்சலப் பிரதேசம் மற்றும் அசாமில் அடையாளம் காணப்பட்ட 150 வழித்தடங்களில் ட்ரோன் அடிப்படையிலான அஞ்சல் அனுப்பும் திட்டத்தை செயல்படுத்த திட்டமிட்டுள்ளது. இந்த முயற்சியானது, இணைப்பை வலுப்படுத்துவதையும், கடினமான நிலப்பரப்புகளில் திறமையான அஞ்சல் விநியோகத்தை எளிதாக்குவதையும் நோக்கமாகக் கொண்டுள்ளது. மேலும் இது, “அஞ்சல் சேவை, மக்கள் சேவை” என்ற நீடித்த தத்துவத்தையும், குடிமக்களை இணைக்கவும் தேசத்திற்கு சேவை செய்யவும் புதுமை மற்றும் தொழில்நுட்பத்தைப் பயன்படுத்துவதற்கான அதன் தொடர்ச்சியான முயற்சியையும் பிரதிபலிக்கிறது.
திவாஹர்