லடாக்கில் சோவா-ரிக்பா மருத்துவ முறையைப் பாதுகாத்தல், மேம்படுத்துதல் மற்றும் வளர்ப்பதில் ஆற்றிய பங்களிப்பைப் பாராட்டி, லேயில் உள்ள தேசிய சோவா-ரிக்பா நிறுவனத்தின் இயக்குநரான டாக்டர் பத்மா குர்மெட்டுக்கு 2025 ஆம் ஆண்டிற்கான யூனியன் பிரதேச லடாக் மாநில விருது வழங்கப்பட்டுள்ளது.
யூனியன் பிரதேச மாநில விருது வழங்கும் விழாவின்போது, லடாக்கின் துணைநிலை ஆளுநர் வினய் குமார் சக்சேனா இந்த விருதை வழங்கினார். இந்த விழாவில், 2022-2025 ஆம் ஆண்டுகளுக்கான பல்வேறு துறைகளில் சிறப்பான பங்களிப்புகளையும் முன்மாதிரியான சேவையையும் ஆற்றிய 36 புகழ்பெற்ற ஆளுமைகள் கௌரவிக்கப்பட்டனர்.
விழாவில் உரையாற்றிய துணைநிலை ஆளுநர், தங்களின் அர்ப்பணிப்பு, சிறப்பு மற்றும் சேவையால் சமூகத்தில் அர்த்தமுள்ள தாக்கத்தை ஏற்படுத்திய தனிநபர்களை அங்கீகரிக்கும் நோக்கில் இந்த விருதுகள் வழங்கப்படுகின்றன என்று எடுத்துரைத்தார். மேலும், இளைய தலைமுறையினரைச் சிறந்து விளங்க ஊக்குவிப்பதன் முக்கியத்துவத்தையும், யூனியன் பிரதேசத்தின் நலன் மற்றும் வளர்ச்சிக்கு நேர்மறையாகப் பங்களிக்க வேண்டியதன் அவசியத்தையும் அவர் வலியுறுத்தினார்.
டாக்டர் பத்மா குர்மெத்தின் இந்த அங்கீகாரம், சோவா-ரிக்பா தேசிய நிறுவனத்திற்குப் பெரும் பெருமைக்குரிய விஷயமாகும். மேலும், லடாக்கின் வளமான பாரம்பரிய அறிவு மற்றும் சுகாதார அமைப்புகளில் ஒன்றான சோவா-ரிக்பாவைப் பாதுகாத்தல், மேம்படுத்துதல் மற்றும் முன்னேற்றுவதற்காக அவர் ஆற்றிய தொடர்ச்சியான முயற்சிகளுக்குக் கிடைத்த ஒரு முக்கிய அங்கீகாரமாகவும் இது விளங்குகிறது.
லே-யில் உள்ள சோவா-ரிக்பா தேசிய நிறுவனத்தின் பேராசிரியர்கள், ஊழியர்கள் மற்றும் மாணவர்கள், இந்த மதிப்புமிக்க கௌரவத்திற்காக டாக்டர் பத்மா குர்மெத்துக்குத் தங்கள் மனமார்ந்த வாழ்த்துக்களைத் தெரிவித்ததோடு, சோவா-ரிக்பாவின் வளர்ச்சி மற்றும் மேம்பாட்டிற்கான அவரது அர்ப்பணிப்புமிக்க சேவையில் அவர் தொடர்ந்து வெற்றி பெறவும் வாழ்த்தினர்.
திவாஹர்