தொடர்ந்து நடைபெற்று வரும் மேற்கு ஆசிய மோதல் மற்றும் பல்வேறு அமைச்சகங்கள், துறைகளால் எடுக்கப்பட்ட நடவடிக்கைகள் தொடர்பான நிலைமையை ஆய்வு செய்வதற்காக, பிரதமர் திரு நரேந்திர மோடி இன்று பாதுகாப்புக்கான அமைச்சரவைக் குழுவின் (CSS) கூட்டத்திற்குத் தலைமை தாங்கினார். இவ்விவகாரம் தொடர்பான நான்காவது சிறப்பு CCS கூட்டம் இதுவாகும்.
அமைச்சரவைச் செயலாளர், தற்போதைய புவிசார் அரசியல் சூழல் குறித்து மத்திய தலைமை அமைச்சருக்கு விளக்கினார். திரவ இயற்கை எரிவாயு (LNG)/திரவ எரிவாயு (LPG) மற்றும் உரங்கள் உள்ளிட்ட பெட்ரோலியப் பொருட்களின் போதுமான விநியோகத்தை உறுதி செய்வதற்காக எடுக்கப்பட்ட முயற்சிகள் குறித்து அவர் பேசினார். திரவ எரிவாயு கொள்முதலுக்கான ஆதாரங்கள் ஏற்கனவே பல்வகைப்படுத்தப்பட்டுள்ளதாகவும், முக்கிய பெட்ரோலியப் பொருட்களின் ஒட்டுமொத்த கையிருப்பு மற்றும் விநியோக நிலை போதுமானதாக இருப்பதாகவும் அவர் கூறினார். போதுமான கச்சா எண்ணெய் கிடைப்பதால், மத்திய பொதுத்துறை நிறுவனங்களின் (CPSE) சுத்திகரிப்பு நிலையங்கள் 100%-க்கும் அதிகமான பயன்பாட்டு அளவில் செயல்பட முடிகிறது. இது பெட்ரோல், டீசல் மற்றும் பிற பெட்ரோலியப் பொருட்களின் தொடர்ச்சியான உற்பத்தியை உறுதி செய்கிறது. குழாய்வழி இயற்கை எரிவாயு (PNG) இணைப்புகளை விரிவுபடுத்துவதற்கான முயற்சிகளும் எடுக்கப்பட்டுள்ளன. இதன் விளைவாக, PNG இணைப்புகளில் கணிசமான அதிகரிப்பு ஏற்பட்டுள்ளது. தேசிய எரிவாயு வலையமைப்பை விரிவுபடுத்துதல், திரவ இயற்கை எரிவாயு இறக்குமதி மற்றும் மறுவாயுவாக்கல் உள்கட்டமைப்பை மேம்படுத்துதல், நகர எரிவாயு விநியோக வலையமைப்புகளை விரிவுபடுத்துதல், மற்றும் 2026-ஆம் ஆண்டின் குழாய்வழி உள்கட்டமைப்பு ஆணையின் கீழ் காலவரையறைக்குட்பட்ட குழாய்வழி மற்றும் இறுதிநிலை இணைப்பு ஒப்புதல்கள் ஆகியவற்றின் மூலம், திரவ எரிவாயுவிற்குப் பதிலாக தொழில்துறை மாற்றீட்டை அரசாங்கம் எளிதாக்குகிறது.
கூட்டத்தின் போது, வரவிருக்கும் ராபி பருவத்திற்கான உரங்களின் தேவை மதிப்பிடப்பட்டதுடன், மாற்று உர ஆதாரங்கள் குறித்தும் விவாதிக்கப்பட்டது. உரங்களின் தடையற்ற விநியோகத்தை உறுதி செய்ய அனைத்து நடவடிக்கைகளும் எடுக்கப்படும் என்று பிரதமர் கூறினார்.
மோதல் மண்டலங்களில் உள்நாட்டு மற்றும் வெளிநாட்டுக் கொடி ஏந்திய கப்பல்களில் பணியாற்றும் மாலுமிகளின் நிலைமை குறித்தும் விவாதிக்கப்பட்டது. மாலுமிகள் மற்றும் அவர்களது குடும்பத்தினருக்கு உரிய நேரத்தில் தகவல்கள், அவசரகால உதவி மற்றும் ஆலோசனைகளை வழங்குவதற்கான ஒரு வழிமுறையை நிறுவுமாறு பிரதமர் உத்தரவிட்டார்.
இந்த மோதலின் தாக்கத்திலிருந்து குடிமக்களையும், புலம்பெயர்ந்த இந்தியர்களையும் பாதுகாக்க அனைத்து முயற்சிகளும் மேற்கொள்ளப்பட வேண்டும் என்று பிரதமர் கூறினார்.
எரிசக்தி தற்சார்பை உறுதி செய்வதற்காக, சூரிய ஆற்றல் மற்றும் புதைபடிவ எரிபொருள் அல்லாத பிற ஆதாரங்கள் உள்ளிட்ட புதுப்பிக்கத்தக்க எரிசக்தி ஆதாரங்களுக்கு முக்கியத்துவம் அளிக்கப்பட வேண்டும் என்று பிரதமர் கூறினார்.
நெருக்கடியால் எழும் சவால்களைச் சமாளிக்க, அரசாங்கம் முழுமைக்குமான அணுகுமுறை தொடர்ந்து பின்பற்றப்பட வேண்டும் என்று பிரதமர் கூறினார். குடிமக்களின் நலன்களைப் பாதுகாப்பதற்கான பொருத்தமான நடவடிக்கைகளை விரைவாகச் செயல்படுத்துவதை உறுதி செய்வதற்காக, அனைத்து நிகழ்வுகளையும் தொடர்ந்து கண்காணிக்க ஒரு ஒருங்கிணைந்த செயல்முறை அமைக்கப்பட வேண்டும் என்றும் அவர் கூறினார்.
திவாஹர்