இந்தியா-எகிப்து கூட்டுப் பாதுகாப்புக் குழு (JDC), 2026 ஏப்ரல் 20 முதல் 22 வரை கெய்ரோவில் நடைபெற்ற தனது 11 வது கூட்டத்தில், இருதரப்பு பாதுகாப்பு ஒத்துழைப்பை மேம்படுத்துவது தொடர்பாக ஆக்கப்பூர்வமான கலந்துரையாடல்களை நடத்தியது. இந்தியக் குழுவிற்கு, இணைச் செயலாளர் (சர்வதேச ஒத்துழைப்பு) திரு அமிதாப் பிரசாத் தலைமை தாங்கினார். இக்குழுவில் பாதுகாப்பு அமைச்சகம் மற்றும் பாதுகாப்புப் படைகளின் மூத்த பிரதிநிதிகள் இடம்பெற்றிருந்தனர். எகிப்தியக் குழுவிற்கு பாதுகாப்புப் படைகள் மற்றும் பாதுகாப்பு அமைச்சகத்தின் மூத்த அதிகாரிகள் தலைமை தாங்கினர்.
முந்தைய கூட்டு பாதுகாப்பு ஒத்துழைப்புக் குழு (JDC) கூட்டத்திற்குப் பிறகு ஏற்பட்ட முன்னேற்றம் குறித்து இரு தரப்பினரும் ஒரு விரிவான மீளாய்வை மேற்கொண்டனர் மற்றும் பாதுகாப்பு ஈடுபாட்டிற்கான ஒரு தொலைநோக்கு செயல் திட்டத்தை வகுத்தனர். கட்டமைக்கப்பட்ட இராணுவ ஒருங்கிணைப்பு வழிமுறைகளை விரிவுபடுத்துதல், கூட்டுப் பயிற்சிப் பரிமாற்றங்களை வலுப்படுத்துதல், கடல்சார் பாதுகாப்பு ஒத்துழைப்பை மேம்படுத்துதல், இராணுவப் பயிற்சிகளின் வீச்சையும் சிக்கலான தன்மையையும் அதிகரித்தல் மற்றும் பாதுகாப்பு உற்பத்தி மற்றும் தொழில்நுட்பத்தில் ஒத்துழைப்பை ஊக்குவித்தல் ஆகியவற்றில் கவனம் செலுத்தும் 2026-27 ஆம் ஆண்டுக்கான இருதரப்பு பாதுகாப்பு ஒத்துழைப்புத் திட்டத்திற்கு அவர்கள் ஒப்புக்கொண்டனர்.
இந்தியப் பாதுகாப்புத் துறையின் வேகமாக வளர்ந்து வரும் உற்பத்தித் திறன்கள் குறித்து இந்தியக் குழுவினர் ஒரு விளக்கக்காட்சியை வழங்கினர். அதன் உற்பத்தி 20 பில்லியன் அமெரிக்க டாலர்களைத் தாண்டியுள்ளது என்பதையும், இந்தியா சுமார் 4 பில்லியன் அமெரிக்க டாலர் மதிப்புள்ள பொருட்களை 100-க்கும் மேற்பட்ட நாடுகளுக்கு ஏற்றுமதி செய்கிறது என்பதையும் அவர்கள் எடுத்துரைத்தனர். பாதுகாப்புத் துறை ஒத்துழைப்புத் திட்டத்தை உருவாக்க இணைந்து செயல்பட இரு தரப்பினரும் ஒப்புக்கொண்டனர். பாதுகாப்பு உற்பத்தித் துறையில் இணை மேம்பாடு மற்றும் இணை உற்பத்திக்கான வாய்ப்புகளை இரு தரப்பினரும் ஆராய்ந்து வருவதால், பாதுகாப்புத் துறை ஒத்துழைப்பு இந்தியா-எகிப்து பாதுகாப்பு உறவுகளின் முக்கியத் தூணாக உருவெடுத்து வருகிறது.
கூட்டத்தின் ஒரு பகுதியாக, முதல் கடற்படைப் பணியாளர் கலந்துரையாடல் நடைபெற்றது. இந்தியப் பெருங்கடல் பகுதியில் கப்பல் போக்குவரத்திற்கான சுதந்திரத்தை மேம்படுத்துவதில் இந்தியக் கடற்படை ஆற்றிய சிறப்பான பங்கு எடுத்துரைக்கப்பட்டதுடன், கடல்சார் பாதுகாப்பை மேம்படுத்துவதில் இந்தியாவின் தகவல் ஒருங்கிணைப்பு மையம் ஆற்றிய முக்கியப் பங்கும் சிறப்பித்துக் காட்டப்பட்டது.
இந்தியக் குழுவினர், எகிப்திய விமானப்படைத் தளபதி லெப்டினன்ட் ஜெனரல் அம்ர் அப்தெல் ரஹ்மான் சக்ரையும் சந்தித்தனர். இரு நாடுகளின் விமானப்படைகளுக்கு இடையிலான நெருங்கிய ஒத்துழைப்பிற்காக, எகிப்திய விமானப்படைத் தளபதிக்கு அக்குழுவினர் நன்றி தெரிவித்தனர்.
இந்தியக் குழுவினர் ஹெலிபோலிஸ் போர் நினைவிடத்தில் மலர்வளையம் வைத்து அஞ்சலி செலுத்தியதுடன், முதலாம் மற்றும் இரண்டாம் உலகப் போர்களின் போது தங்கள் உயிரைத் தியாகம் செய்த இந்திய வீரர்களுக்கும் அஞ்சலி செலுத்தினர்.
இந்தியா-எகிப்து பாதுகாப்பு கூட்டாண்மையில் ஒரு முக்கிய மைல்கல்லாக, பாதுகாப்பு அமைச்சர் எகிப்துக்கு மேற்கொண்ட பயணத்தின் போது, செப்டம்பர் 2022-ல் பாதுகாப்புத் துறையில் ஒத்துழைப்புக்கான புரிந்துணர்வு ஒப்பந்தம் கையெழுத்தானது. இருதரப்பு உறவுகள் 2023-ல் மூலோபாய கூட்டாண்மை நிலைக்கு உயர்த்தப்பட்டன. 11 -வது சந்திப்பு, இரு நாடுகளுக்கும் இடையிலான நெருங்கிய உறவை மீண்டும் உறுதிப்படுத்தியதுடன், பிராந்திய பாதுகாப்பு மற்றும் ஸ்திரத்தன்மைக்கான தங்களின் பரஸ்பர உறுதிப்பாட்டை வலுப்படுத்தியது.
எம்.பிரபாகரன்