இந்தியத் துணை குடியரசுத் தலைவர் திரு சி.பி. ராதாகிருஷ்ணன், இன்று உத்தரகாண்ட் மாநிலம் ரிஷிகேஷில் உள்ள அகில இந்திய மருத்துவ அறிவியல் கழகத்தின் 6வது பட்டமளிப்பு விழாவில் உரையாற்றுகையில், பட்டம் பெறும் மாணவர்களுக்கு இது ஒரு மாற்றம், சுயபரிசோதனை மற்றும் பொறுப்புணர்வை வரையறுக்கும் தருணம் என்று விவரித்தார்.
சிந்தனை மற்றும் மன ஆறுதலுக்கான உலகளாவிய மையமாகவும், இமயமலைக்கான நுழைவாயிலாகவும் ரிஷிகேஷ் விளங்கும் ஆன்மீக மற்றும் கலாச்சார முக்கியத்துவத்தை எடுத்துரைத்த துணை ஜனாதிபதி, இத்தகைய சூழல் பட்டமளிப்பு விழாவின் புனிதத்திற்கு ஆழமான அர்த்தத்தைச் சேர்க்கிறது என்று குறிப்பிட்டார்.
பட்டமளிப்பு விழா என்பது பல ஆண்டுகால ஒழுக்கமான முயற்சி மற்றும் தியாகத்தின் உச்சக்கட்டத்தை மட்டுமல்ல, சமூகம் மற்றும் தேசத்தின் மீதான ஒரு பெரிய பொறுப்பின் தொடக்கத்தையும் குறிக்கிறது என்று திரு சி.பி. ராதாகிருஷ்ணன் கூறினார். பட்டதாரிகள் தங்கள் தொழில்முறை கடமைகளை அர்ப்பணிப்புடனும் ஒரு நோக்க உணர்வுடனும் ஏற்றுக்கொள்ள வேண்டும் என்று அவர் வலியுறுத்தினார்.
கோவிட்-19 பெருந்தொற்றால் ஏற்பட்ட சவால்களைப் பற்றிப் பேசிய துணை ஜனாதிபதி, பிரதமர் திரு நரேந்திர மோடியின் தலைமையில் இந்தியா மீள்திறன், புதுமை மற்றும் அர்ப்பணிப்பை வெளிப்படுத்தியதாகக் கூறினார். 140 கோடிக்கும் அதிகமான குடிமக்கள் இலவச தடுப்பூசிகளைப் பெற்று, சுகாதாரத்திற்கான சமமான அணுகலை உறுதி செய்துள்ள இந்தியாவின் பெரிய அளவிலான தடுப்பூசி இயக்கத்தை அவர் எடுத்துரைத்தார். இந்திய விஞ்ஞானிகள் லாபத்திற்காக அல்ல, மாறாக மனிதகுலத்தின் நலனுக்காகவே தடுப்பூசிகளை உருவாக்கியுள்ளனர் என்றும் அவர் மேலும் வலியுறுத்தினார்.
100-க்கும் மேற்பட்ட நாடுகளுக்கு தடுப்பூசிகள் வழங்கப்பட்ட ‘தடுப்பூசி மைத்ரி’ முன்முயற்சியின் மூலம் இந்தியாவின் உலகளாவிய பொறுப்பையும் துணை ஜனாதிபதி அடிக்கோடிட்டுக் காட்டினார். இந்த முயற்சி “வசுதைவ குடும்பகம்” என்ற தத்துவத்தின் சாரத்தைப் பிரதிபலிப்பதாகவும், இரக்கமுள்ள மற்றும் பொறுப்பான உலகளாவிய பங்காளியாக இந்தியாவின் பங்கை வலுப்படுத்துவதாகவும் அவர் கூறினார்.
சுகாதார உள்கட்டமைப்பின் விரிவாக்கத்தை எடுத்துரைத்த திரு சி.பி.ராதாகிருஷ்ணன், கடந்த பத்தாண்டுகளில் நாடு முழுவதும் புதிய எய்ம்ஸ் நிறுவனங்கள் நிறுவப்பட்டிருப்பது, குறிப்பாக மருத்துவ வசதி குறைந்த பகுதிகளில், தரமான சுகாதாரப் பராமரிப்பு மற்றும் மருத்துவக் கல்விக்கான அணுகலை வலுப்படுத்தியுள்ளது என்று குறிப்பிட்டார். மக்களின் தேவைகளைப் புரிந்துகொண்டு அவர்களுக்குச் சேவை செய்வதில்தான் நல்லாட்சி அடங்கியுள்ளது என்று அவர் குறிப்பிட்டார்.
எய்ம்ஸ் ரிஷிகேஷைப் பாராட்டிய அவர், மருத்துவப் பராமரிப்பு, கல்வி வலிமை, ஆராய்ச்சி, புதுமை மற்றும் சமூக அர்ப்பணிப்பு ஆகியவற்றை ஒருங்கிணைத்து, இந்த நிறுவனம் சிறப்பின் ஒரு முன்மாதிரியாகத் திகழ்கிறது என்றார். குறிப்பாக அதன் தொலைமருத்துவ முயற்சிகளை அவர் பாராட்டினார். மேலும், தொலைதூர மற்றும் மருத்துவ வசதி குறைந்த மக்களைச் சென்றடைய, சுகாதாரப் பராமரிப்பு மருத்துவமனை வளாகங்களைத் தாண்டிச் செல்ல வேண்டும் என்றும் குறிப்பிட்டார்.
ஹெலிகாப்டர் அவசர மருத்துவ சேவைகள் மற்றும் சார் தாம் யாத்திரையின் போதும் தொலைதூரப் பகுதிகளிலும் மருந்துகளை விநியோகிக்க ட்ரோன்களைப் பயன்படுத்துதல் போன்ற புதுமையான சுகாதாரத் தலையீடுகளையும் துணை ஜனாதிபதி பாராட்டினார். இவை, சுகாதாரப் பராமரிப்பு வழங்குவதில் உள்ள நீண்டகால சவால்களுக்குத் திறமையான தீர்வுகள் என்றும் அவர் விவரித்தார்.
டெல்லி-டேராடூன் விரைவுச்சாலை உட்பட, இப்பகுதியில் உள்கட்டமைப்பு வேகமாக வளர்ந்து வருவதையும் துணை ஜனாதிபதி எடுத்துரைத்தார். முதலமைச்சர் திரு புஷ்கர் சிங் தாமி தலைமையிலான உத்தரகாண்ட் அரசு, அனைவரையும் உள்ளடக்கிய வளர்ச்சியை ஊக்குவிப்பதற்கும், உள்கட்டமைப்பை வலுப்படுத்துவதற்கும், சுகாதார சேவையை மேம்படுத்துவதற்கும் மேற்கொண்ட முயற்சிகளை அவர் பாராட்டினார்.
சுகாதாரம் என்பது ஒரு பொது நம்பிக்கை என்றும், தேசத்தைக் கட்டமைப்பதில் மருத்துவ வல்லுநர்கள் முக்கியப் பங்கு வகிக்கின்றனர் என்றும் திரு சி.பி.ராதாகிருஷ்ணன் வலியுறுத்தினார். தடுப்புப் பராமரிப்பு, கிராமப்புற மக்களைச் சென்றடைதல், ஆராய்ச்சி மற்றும் புத்தாக்கம் ஆகியவற்றின் மூலம் பங்களிக்குமாறும், மேலும் பரிவு, நேர்மை மற்றும் சேவை ஆகிய விழுமியங்களால் வழிநடத்தப்படுமாறும் அவர் அவர்களை வலியுறுத்தினார்.
இந்நிகழ்ச்சியில் உத்தரகாண்ட் ஆளுநர், லெப்டினன்ட் ஜெனரல் குர்மித் சிங் (ஓய்வு); உத்தரகாண்ட் முதலமைச்சர், திரு புஷ்கர் சிங் தாமி; மத்திய சுகாதாரம் மற்றும் குடும்ப நலத்துறை இணை அமைச்சர், திருமதி அனுப்ரியா படேல்; எய்ம்ஸ் ரிஷிகேஷின் தலைவர், பேராசிரியர் ராஜ் பகதூர்; கல்வித்துறைத் தலைவர், பேராசிரியர் சௌரப்; எய்ம்ஸ் ரிஷிகேஷின் நிர்வாக இயக்குநர், பேராசிரியர் மீனு சிங்; இவர்களுடன் பேராசிரியர்கள், மாணவர்கள் மற்றும் பிற முக்கிய பிரமுகர்களும் கலந்து கொண்டனர்.
எஸ்.சதிஸ் சர்மா