பெர்லினில் உள்ள ஜெர்மன் நாடாளுமன்ற உறுப்பினர்களிடையே உரையாற்றியபோது, ​​இந்தியா-ஜெர்மனி பாதுகாப்புத் தொழில்துறை கூட்டாண்மைகளை மேம்படுத்த பாதுகாப்பு அமைச்சர் அழைப்பு விடுத்தார்.

ஆத்மநிர்பர் பாரத் என்பது வெறும் கொள்முதல் திட்டம் மட்டுமல்ல; அது இணைந்து உருவாக்குவதற்கும், இணைந்து மேம்படுத்துவதற்கும், இணைந்து புதுமைகளைப் புகுத்துவதற்குமான ஓர் அழைப்பு” என்று பாதுகாப்பு அமைச்சர் திரு ராஜ்நாத் சிங், ஏப்ரல் 21, 2026 அன்று பெர்லினில் உள்ள ஜெர்மன் நாடாளுமன்ற உறுப்பினர்களிடம் கூறினார். மேலும், இந்தியா மற்றும் ஜெர்மனியின் பாதுகாப்புத் தொழில் சூழல் அமைப்புகளுக்கு இடையே மேம்பட்ட ஒத்துழைப்புகளுக்காக அவர் வலுவாக வலியுறுத்தினார். ஐரோப்பிய நாடான ஜெர்மனிக்கு மேற்கொண்ட தனது மூன்று நாள் பயணத்தின் முதல் நாளில், பாதுகாப்பு மற்றும் காவல் துறைக்கான ஜெர்மன் நாடாளுமன்ற நிலைக்குழுவிடம் உரையாற்றிய பாதுகாப்பு அமைச்சர், இன்று உலகம் புதிய பாதுகாப்பு அச்சுறுத்தல்களை எதிர்கொண்டுள்ளதாகவும், தொழில்நுட்ப மாற்றம் இந்தச் சூழலை மிகவும் சிக்கலானதாகவும், ஒன்றோடொன்று பின்னிப் பிணைந்ததாகவும் ஆக்கியுள்ளது என்றும் வலியுறுத்தினார். மாறிவரும் சூழலுக்கு ஏற்பத் தழுவிக்கொள்ளும் விருப்பத்துடன் கூடிய ஒரு புதிய அணுகுமுறை காலத்தின் தேவையாகும் என்றும் அவர் கூறினார்.

படம்.jpeg

பிரதமர் திரு நரேந்திர மோடியின் தொலைநோக்குப் பார்வை கொண்ட தலைமையின் கீழ், இந்தியா பாதுகாப்புத் துறையில் முன்னெப்போதும் இல்லாத மாற்றத்தைக் கண்டு வருகிறது என்றும், ஜெர்மன் தொழில்துறையுடனான கூட்டாண்மைகளை அதிகரிப்பது குறிப்பிடத்தக்க பரஸ்பர ஆதாயங்களை அளிக்கும் என்றும் பாதுகாப்பு அமைச்சர் வலியுறுத்தினார். “ஜெர்மனியின் முன்னணி தொழில்துறை நிறுவனங்களின் நிறுவப்பட்ட பலங்களை நாங்கள் அங்கீகரிப்பதோடு, மேம்பட்ட மற்றும் வளர்ந்து வரும் தொழில்நுட்பங்களில் புகழ்பெற்ற ஜெர்மன் மிட்டல்ஸ்டாண்டின் (சிறு மற்றும் நடுத்தர நிறுவனங்கள்) வீரியத்தையும் ஆற்றலையும் நாங்கள் பாராட்டுகிறோம். இந்தியாவிலும், நமது புத்தொழில் நிறுவனங்களும், தொழில்முனைவு மிக்க தனியார் நிறுவனங்களும், நமது பெரிய மற்றும் நிறுவப்பட்ட பாதுகாப்பு நிறுவனங்களின் திறன்களை வேகமாக மேம்படுத்தி, அவற்றுக்குத் துணைபுரிகின்றன. இது இந்தியாவும் ஜெர்மனியும் இயல்பாகவே ஒன்றுக்கொன்று துணைபுரியும் ஒரு துறையாகும், மேலும் நமது கூட்டாண்மை மேலும் ஆழமடைய முடியும்,” என்று திரு ராஜ்நாத் சிங் கூறினார்.

தற்கால உலகளாவிய சவால்களைச் சமாளிக்க, ஒருங்கிணைந்த பதிலளிப்புகள் மற்றும் நம்பகமான மூலோபாய கூட்டாண்மைகளின் அவசியத்தை திரு ராஜ்நாத் சிங் வலியுறுத்தினார். “பிரதமர் திரு நரேந்திர மோடியும், ஜெர்மன் அதிபர் திரு ஃபிரெட்ரிக் மெர்ஸும் இந்த மூலோபாய கூட்டாண்மையை முன்னெடுத்துச் செல்வதில் வலுவான முக்கியத்துவம் அளித்துள்ளனர். ஐரோப்பிய ஒன்றிய மட்டத்திலும் கருத்துக்களின் தெளிவான ஒருமித்த தன்மையை நாங்கள் காண்கிறோம்; இது இந்தியா-ஐரோப்பிய ஒன்றிய பாதுகாப்பு மற்றும் மூலோபாய கூட்டாண்மை உட்பட, இந்தியாவுடன் ஈடுபடுவதற்கான வளர்ந்து வரும் உத்வேகத்தில் பிரதிபலிக்கிறது,” என்று அவர் கூறினார்.

படம்.jpeg

இந்தியாவும் ஜெர்மனியும் வெறும் உத்திசார் பங்காளிகள் மட்டுமல்ல, தற்காலத்தின் உலகளாவிய உரையாடலை வடிவமைப்பதில் முக்கியத்துவம் வாய்ந்த குரல்களாகவும் திகழ்கின்றன என்று பாதுகாப்பு அமைச்சர் மீண்டும் வலியுறுத்தினார். “நாம் பகிரப்பட்ட விழுமியங்களால் பிணைக்கப்பட்ட, நன்கு நிலைபெற்ற ஜனநாயக நாடுகள்; மேலும், மீள்திறன், புதுமை மற்றும் உறுதியான தொழில் முனைவு உணர்வால் உந்தப்படும் ஆற்றல்மிக்க பொருளாதாரங்கள் ஆவோம். சட்டமியற்றுபவர்களாகவும், குழுவின் மதிப்பிற்குரிய உறுப்பினர்களாகவும், உங்கள் வழிகாட்டுதலும், குரலும், ஆதரவும் நமது பாதுகாப்பு மற்றும் உத்திசார் ஒத்துழைப்பின் எதிர்காலப் போக்கை மேலும் வலுப்படுத்தி வளப்படுத்தும். இந்தக் காலகட்டத்தின் சரித்திரங்கள் எழுதப்படும்போது, இந்தியா-ஜெர்மனி கூட்டாண்மையானது, நெருக்கடிக்கு பதிலளிக்கும் விதமாக அல்லாமல், இந்தப் பாதையில் ஒன்றாகப் பயணிக்கத் தேர்ந்தெடுத்த இரண்டு முதிர்ந்த ஜனநாயக நாடுகளின் நிலையான உறுதியின் மூலம் உருவாக்கப்பட்ட ராஜதந்திரத்தின் ஒரு உன்னத எடுத்துக்காட்டாகத் திகழும்,” என்று அவர் குறிப்பிட்டார்.

தற்போதைய புவிசார் அரசியல் ஸ்திரமின்மையை இனி பிராந்திய விவகாரங்களாகக் கருத முடியாது என்று திரு ராஜ்நாத் சிங் சுட்டிக்காட்டினார். அவற்றின் விளைவுகள் உலகளாவியவை என்று கூறிய அவர், அவை உள்ளூர் இடையூறுகள் அல்ல என்றும், மாறாக அவை ஏற்படுத்தும் பெரும் மனிதாபிமான இழப்புகளுக்கு அப்பால், எரிசக்தி பாதுகாப்பு, உணவுப் பாதுகாப்பு மற்றும் உலகப் பொருளாதார ஸ்திரத்தன்மை ஆகியவற்றில் தொலைநோக்குப் பார்வைகளைக் கொண்ட தீவிரமான நிகழ்வுகள் என்றும் விவரித்தார். அவர் மேலும் கூறுகையில், “தனது எரிசக்தித் தேவைகளில் கணிசமான பங்கிற்கு மேற்கு ஆசியப் பிராந்தியத்தைச் சார்ந்துள்ள இந்தியாவைப் போன்ற ஒரு வளரும் நாட்டிற்கு, ஹார்முஸ் ஜலசந்தியில் ஏற்படும் இடையூறுகள் தொலைதூர நிகழ்வுகள் அல்ல; அவை நமது பாதுகாப்பு மற்றும் பொருளாதார ஸ்திரத்தன்மையில் நேரடித் தாக்கங்களைக் கொண்ட கடுமையான யதார்த்தங்கள் ஆகும்” என்றார்.

படம்.jpeg

இந்த சவால்களையும் அவற்றின் நேரடி விளைவுகளையும் கருத்தில் கொண்டு, இந்தியா ஒரு செயலூக்கமான மற்றும் ஒருங்கிணைந்த உத்தியைக் கையாண்டதாக பாதுகாப்பு அமைச்சர் சுட்டிக்காட்டினார். மேற்கு ஆசியாவுக்கான அமைச்சர்கள் குழு, மாறிவரும் சூழ்நிலையைத் தொடர்ந்து மதிப்பீடு செய்து வருவதாகவும், அதன் தாக்கத்தைக் குறைப்பதற்கான சரியான நேரத்தில் எடுக்க வேண்டிய நடவடிக்கைகளைப் பரிந்துரைத்து வருவதாகவும் அவர் நாடாளுமன்ற உறுப்பினர்களிடம் தெரிவித்தார். “முக்கிய அமைச்சகங்களை ஒன்றிணைத்து, எரிசக்தி விநியோகத்தைப் பாதுகாத்தல், அத்தியாவசியப் பொருட்களின் இருப்பைப் பராமரித்தல், பணவீக்க அழுத்தங்களைக் கட்டுப்படுத்துதல், மற்றும் வெளிப்புற இடையூறுகளிலிருந்து குடிமக்களையும் தொழில்துறையையும் பாதுகாத்தல் ஆகியவற்றில் எங்கள் ஆலோசனைகள் கவனம் செலுத்தின. இது, உலகளாவிய நெருக்கடிகளுக்கு அமைதி, தொலைநோக்குப் பார்வை மற்றும் திறமையான நிறுவன ஒருங்கிணைப்புடன் பதிலளிக்கும் இந்தியாவின் திறனைப் பிரதிபலிக்கிறது,” என்று அவர் கூறினார்.

நாடாளுமன்ற உறுப்பினர் மற்றும் குழுவின் தலைவர் திரு தாமஸ் ரோவெகாம்ப், நாடாளுமன்ற உறுப்பினர்களுடனான கலந்துரையாடலுக்காக திரு ராஜ்நாத் சிங்கை வரவேற்றார். முன்னதாக, பாதுகாப்பு அமைச்சர், இந்தியாவுக்கும் ஜெர்மனிக்கும் இடையிலான நீடித்த கலாச்சார மற்றும் அறிவுசார் உறவுகளை வலியுறுத்தும் வகையில், பெர்லினில் உள்ள ஹம்போல்ட் பல்கலைக்கழக வளாகத்தில் குருதேவ் ரவீந்திரநாத் தாகூருக்கு மலர் அஞ்சலி செலுத்தினார்.

படம்.jpeg

20-ஆம் நூற்றாண்டின் முற்பகுதியில், குருதேவ் ரவீந்திரநாத் தாகூர் ஜெர்மனியுடன் ஆழமான மற்றும் அர்த்தமுள்ள ஒரு பிணைப்பைப் பகிர்ந்து கொண்டார். கவிஞருக்கும் ஜெர்மானிய சிந்தனையாளர்கள், கலைஞர்கள் மற்றும் பார்வையாளர்களுக்கும் இடையே நிலவிய பரஸ்பரப் போற்றுதலே இந்தப் பிணைப்பின் முக்கிய அம்சமாக விளங்கியது. ஜெர்மனியுடனான அவரது ஈடுபாடு, பண்பாட்டுப் பரிமாற்றம், அறிவுசார் உரையாடல் மற்றும் பரஸ்பர மரியாதை ஆகியவற்றில் வேரூன்றியிருந்தது. ஐரோப்பா முழுவதும் அவரது படைப்புகளை அறிமுகப்படுத்துவதிலும் பிரபலப்படுத்துவதிலும் ஜெர்மனி ஒரு குறிப்பிடத்தக்க பங்கை ஆற்றியது.

அவர் வந்தடைந்ததும், பெர்லின் விமான நிலையத்தில் பாதுகாப்பு மந்திரிக்கு இராணுவ மரியாதைகளுடன் வரவேற்பு அளிக்கப்பட்டது. மியூனிக்கிலிருந்து பெர்லினுக்கு அவர் மேற்கொண்ட பயணத்தின்போது, போர் விமானங்களின் பாதுகாப்புடன் ஒரு சிறப்பு ஜெர்மானிய விமானப்படை விமானத்தில் அழைத்துச் செல்லப்பட்டார்.

திவா‌ஹர்