உத்தரப் பிரதேசத்தின் பல்வேறு மாவட்டங்களில் உள்ள செங்கல் சூளைகளில் நடைபெறும் கொத்தடிமைத் தொழிலாளர் முறைகேடுகள் தொடர்பான 216 வழக்குகளை இந்திய தேசிய மனித உரிமைகள் ஆணையம் (NHRC) இன்று இணையவழியில் விசாரித்தது. தலைவர் நீதிபதி வி. ராமசுப்பிரமணியன் அவர்கள், பொதுச் செயலாளர் திரு. பரத் லால், பதிவாளர் (சட்டம்) திரு. ஜோகிந்தர் சிங் மற்றும் மூத்த அதிகாரிகள் முன்னிலையில் இந்த மெய்நிகர் விசாரணைக்குத் தலைமை தாங்கினார். தொழிலாளர் ஆணையர், மாவட்ட ஆட்சியர்கள் மற்றும் கூடுதல் மாவட்ட ஆட்சியர்கள் உள்ளிட்ட மாநில அரசின் மூத்த அதிகாரிகள் இந்த விசாரணையில் தீவிரமாகப் பங்கேற்றனர்.
நீதிபதி ராமசுப்பிரமணியன் அவர்களின் வருகையைப் பாராட்டினார், ஆனால் அதிகாரிகள் தங்கள் கடமைகளை விடாமுயற்சியுடன் ஆற்றியிருந்தால் இத்தகைய விசாரணை அவசியமாக இருந்திருக்காது என்று கூறினார். ஆவணங்களைச் சமர்ப்பிக்காதது, குறைந்தபட்ச ஊதிய விதிமுறைகளைப் பின்பற்றாதது உள்ளிட்ட பிற மீறல்களை அறிக்கைகள் சுட்டிக்காட்டிய போதிலும், கொத்தடிமைத் தொழிலாளர் பிரச்சினையை அதிகாரிகள் கவனிக்கத் தவறிவிட்டனர். இத்தகைய தவறுகள், 1976 ஆம் ஆண்டின் கொத்தடிமை முறை ஒழிப்புச் சட்டம் மற்றும் மத்திய துறைத் திட்டத்தின் கீழ் தொழிலாளர்களுக்கு மீட்பு, விடுதலை மற்றும் மறுவாழ்வுக்கான அவர்களின் நியாயமான கோரிக்கையை மறுக்கின்றன என்று அவர் கூறினார்.
இந்திய தேசிய மனித உரிமைகள் ஆணையத்தின் பொதுச் செயலாளர் திரு. பாரத் லால், 1976-ஆம் ஆண்டின் கொத்தடிமை முறை ஒழிப்புச் சட்டத்தை அமல்படுத்துவதிலும், கொத்தடிமைகளுக்கு மறுவாழ்வு அளிப்பதிலும் உள்ள குறைபாடுகளைச் சுட்டிக்காட்டினார். தொழிலாளர்களின் அவல நிலைக்குச் செவிசாய்த்து, சட்டத்தை அமல்படுத்துவதன் மூலம் அவர்களுக்கு ஒரு கண்ணியமான வாழ்க்கையை வழங்க வேண்டும் என்று அவர் மாவட்ட அலுவலர்களை வலியுறுத்தினார். அதிகாரிகளின் தரப்பில் ஏற்படும் எந்தவொரு தவறும் அல்லது செயலற்ற தன்மையும் இந்தத் தொழிலாளர்களை வறுமையில் தள்ளுவதோடு, அவர்கள் சுரண்டலுக்கும் பலியாகின்றனர் என்று அவர் வலியுறுத்தினார்.
தனது பரிசீலனையில் உள்ள புகார்கள் மீது மாவட்ட ஆட்சியர்களால் சமர்ப்பிக்கப்பட்ட நடவடிக்கை எடுக்கப்பட்ட அறிக்கைகளை (ATRs) ஆணையம் ஆய்வு செய்தது. அனைத்து 216 வழக்குகளும் மறுஆய்வு செய்யப்படும் என்றும், அதனைத் தொடர்ந்து மூன்று வாரங்களுக்குள் தேவையான தகவல்களும் அறிக்கைகளும் ஆணையத்திடம் சமர்ப்பிக்கப்படும் என்றும் மாநில தொழிலாளர் ஆணையர் உறுதியளித்தார். கொத்தடிமைத் தொழிலாளர் பிரச்சினைக்குத் தீர்வு காண்பதற்கான உடனடி நிவாரண நடவடிக்கைகளுக்காக, உச்ச நீதிமன்ற வழிகாட்டுதல்கள் மற்றும் பொருந்தக்கூடிய சட்டங்கள் முழுமையாகப் பின்பற்றப்படுவதை உறுதி செய்வதாகவும் அதிகாரிகள் உறுதியளித்தனர்.
திவாஹர்